នៅតាមវាលស្រែដែលឆ្លងកាត់បីទៅបួនភូមិ ប្រជាពលរដ្ឋនៅ ឃុំយាអង្គ ធ្លាប់ចំណាយពេលធ្វើដំណើរទៅផ្លូវជាតិយ៉ាងហោចណាស់ ១ម៉ោងតាមរយៈផ្លូវលំដែលមានប្រវែងត្រឹមតែ៣៥០០ម៉ែត្រប៉ុណ្ណោះ។ ទោះបីយ៉ាងណាក៏ដោយ ទាំងនេះវាគ្រាន់តែជារឿងដែលបានកើតឡើង នាពេលអតីតកាលបុណ្ណោះ ។ ក្រោមការឧបត្ថម្ភរបស់…
នៅតាមវាលស្រែដែលឆ្លងកាត់បីទៅបួនភូមិ ប្រជាពលរដ្ឋនៅ ឃុំយាអង្គ ធ្លាប់ចំណាយពេលធ្វើដំណើរទៅផ្លូវជាតិយ៉ាងហោចណាស់ ១ម៉ោងតាមរយៈផ្លូវលំដែលមានប្រវែងត្រឹមតែ៣៥០០ម៉ែត្រប៉ុណ្ណោះ។ ទោះបីយ៉ាងណាក៏ដោយ ទាំងនេះវាគ្រាន់តែជារឿងដែលបានកើតឡើង នាពេលអតីតកាលបុណ្ណោះ ។
ក្រោមការឧបត្ថម្ភរបស់ ធនាគារឯកទេស វីង (ខេមបូឌា) លីមីតធីត គម្រោងជួសជុលផ្លូវមួយខ្សែប្រវែង ៣,៥ គីឡូម៉ែត្រដែលបានចាប់ផ្តើមជួសជុសកាលពីខែមករា ឆ្នាំ ២០២០ ត្រូវបានបញ្ចប់ និងប្រកាសដាក់ឲ្យប្រើប្រាស់នាព្រឹកថ្ងៃទី២៩ ខែកុម្ភៈ នៅស្រុកថ្ពង ខេត្តកំពង់ស្ពឺ ។
ពិធីនេះត្រូវបានចូលរួម និងផ្តល់ជាកិត្តិយសដោយលោក ម៉ានូ រ៉ាចាន់ អគ្គនាយកនៃ ធនាគារឯកទេស វីង (ខេមបូឌា) លោក កែវ យឿន អភិបាលរងស្រុក យាអង្គ លោក ហោ ប៊ុនថែ អគ្គនាយករងនៃ ធនាគារឯកទេស វីង លោក ឡៅ សៀងហៃ នាយកគ្រប់គ្រងធនធានមនុស្សនៃធនាគារឯកទេស វីង បុគ្គលិក វីង និងប្រជាពលរដ្ឋតាមសហគមន៍ជាច្រើនផ្សេងទៀត ។
នៅក្នុងពិធីដែលមានអ្នកចូលរួមជាង ៤០០នាក់ ដែលរស់នៅក្នុងតំបន់នោះ លោក ម៉ានូ រ៉ាចាន់ បានប្រកាសបើកសម្ពោធផ្លូវដែលបានជួសជុលរួច និងដាក់ឲ្យប្រើប្រាស់ជាសាធារណៈតាមរយៈការកាត់ខ្សែបូដើម្បីជាចំណងដៃដល់ប្រជាពលរដ្ឋជាង ៦៤៧គ្រួសារក្នុងភូមិចំនួន ៤ ក្នុងឃុំយាអង្គ ។
លោក ម៉ានូ រ៉ាចាន់ បានមានប្រាសាសន៍ថា៖ «ផ្លូវនេះ មិនត្រឹមតែជួយសម្រួលដល់ប្រជាពលរដ្ឋក្នុងការទទួលបានសេវាសំខាន់ៗដូចជា ៖ ការទទួលបានហិរញ្ញវត្ថុ ការថែទាំសុខភាព ការអប់រំប៉ុណ្ណោះទេ ប៉ុន្តែវាក៏ជួយលើកកម្ពស់សេដ្ឋកិច្ចក្នុងតំបន់តាមរយៈការផ្សារភ្ជាប់ផលិតផលក្នុងស្រុកទៅនឹងទីផ្សារផងដែរ» ។
លោក កែវ យឿន បានឲ្យដឹងថា៖ «ក្នុងរដូវវស្សាម្តងៗ ប្រជាពលរដ្ឋនៅទីនេះពិតជាជួបទុក្ខលំបាកយ៉ាងខ្លាំងដោយសារពួកគាត់ត្រូវធ្វើដំណើរដោយយានជំនិះឆ្លងកាត់តាមដងផ្លូវដែលបានខូចយ៉ាងតំណំ ។ ដោយសារពិបាកនាំយកផលិតផលកសិកម្ម និងផលិតផលផ្សេងៗទៅលក់នៅឯទីផ្សារហើយ ទើបធ្វើឲ្យរបរកសិកម្មប្រជាពលរដ្ឋស្ថិតក្នុងស្ថានភាពជាប់គាំង និងមិនមានស្ថេរភាព ហើយសិស្សានុសិស្សពេលខ្លះបានខកខានទៅសាលាជាដើម» ។
លោក កែវ យឿន បានបន្ថែមថា៖ «ក្រោមការឧបត្ថម្ភរបស់ វីង ប្រជាពលរដ្ឋជាង ២,៨០០នាក់នឹងអាចប្រើប្រាស់ផ្លូវដ៏ស្អាតនេះជាប្រចាំថ្ងៃ ហើយវានឹងជួយឲ្យជីវភាពរបស់ពួកគាត់នៅទីនេះកាន់តែល្អប្រសើរ ។ ការធ្វើជំនួញអាជីវកម្មផលិតផលកសិកម្មនឹងកាន់តែកើនឡើង ហើយក្មេងៗនឹងអាចធ្វើដំណើរទៅសាលារៀនកាន់តែងាយស្រួល ក្រុមគ្រួសាររបស់ពួកគាត់នឹងអាចទៅទិញបានម្ហូបអាហារបានកាន់តែលឿនជាងមុន» ។
ប្រសិនបើហេដ្ឋារចនាសម្ព័ន្ធផ្លូវមិនល្អ ប្រជាពលរដ្ឋតាមសហគមន៍នឹងជួបឧបសគ្គក្នុងការទទួលបានសេវាសុខភាព ការអប់រំ និងសេវាសាធារណៈដទៃផ្សេងទៀត ។ តាមរយៈជំនួយឧបត្ថម្ភនេះ វីង បានប្តេជ្ញាចិត្តក្នុងការកែលម្អជីវភាពរស់នៅប្រចាំថ្ងៃរបស់ប្រជាជនកម្ពុជា តាមរយៈការធ្វើឲ្យកាន់តែល្អប្រសើរ លើការផ្តល់ជូនតម្រូវការផ្សេងៗ ដើម្បីការអភិវឌ្ឍសហគមន៍ប្រកបដោយចីរភាព ៕ ដោយសហការ (កែសម្រួលដោយ ៖ បុប្ផា)
ចែករំលែកព័តមាននេះ