ប្រទេសវៀតណាម-កូរ៉េខាងត្បូង ៖ យោងតាមYONHAPថា យន្តហោះ១គ្រឿងរបស់ក្រុមហ៊ុនអាកាសចរណ៍កូរ៉េខាងត្បូង បានហោះបកក្រោយវិញ ពេលហោះហើរទៅកាន់វៀតណាមកាលពីថ្ងៃទី២៩កុម្ភៈ បន្ទាប់ពីអាជ្ញាធរវៀតណាម រារាំងមិនឲ្យចុះនៅក្រុងហាណូយ ដែលអាចស្ថិតក្នុងក្របខណ្ឌនៃបណ្ដាវិធានការដែលប្រទេសនៅអាស៊ីអាគ្នេយ៍នោះបានចាត់ ដើម្បីរិតត្បិតមិនឲ្យបណ្ដាជនជាតិកូរ៉េខាងត្បូងចូល ខណៈប្រទេសនោះកំពុងរាតត្បាតដោយវីរុសCOVID-19។
យន្តហោះរបស់ក្រុមហ៊ុនអាកាសចរណ៍ASIANA AIRLINES INC ជាក្រុមហ៊ុនអាកាសចរណ៍ធំទី២របស់ប្រទេស បានហោះវិលមកកាន់ព្រលានយន្តហោះអន្តរជាតិINCHEON ប្រមាណ២ម៉ោងក្រោយចាកចេញឆ្ពោះទៅកាន់ក្រុងហាណូយ។
ក្រុមហ៊ុនអាកាសចរណ៍នោះថ្លែងថា បានសម្រេចឲ្យយន្តហោះជើងហោះហើរOZ729ហោះបកក្រោយវិញ ខណៈអាជ្ញាធរវៀតណាម បានស្នើឲ្យទៅចុះនៅព្រលានយន្តហោះអន្តរជាតិវ៉ានដុង ស្ថិតនៅចម្ងាយប្រមាណជា១៤០គីឡូម៉ែត្រពីព្រលានយន្តហោះណយបៃក្រុងហាណូយ។ យន្តហោះនោះដឹកអ្នកដំណើរ៤០នាក់។
ក្រុមហ៊ុនអាកាសចរណ៍កូរ៉េខាងត្បូង១ទៀត គឺក្រុមហ៊ុនKOREAN AIR LINES CO បានផ្អាករួចហើយជើងហោះហើរ២ជើងរបស់ខ្លួន មកកាន់ក្រុងហាណូយ ដែលគ្រោងនាថ្ងៃទី២៩កុម្ភៈ៕ ដកស្រង់ចេញពីវេបសាយ ៖ yna (កែសម្រួលដោយ៖ បុប្ផា)
ចែករំលែកព័តមាននេះ