ប្រទេសកូរ៉េខាងជើង ៖ បណ្ដាសារព័ត៌មានផ្លូវការរាយការណ៍នាថ្ងៃទី២៩កុម្ភៈថា មេដឹកនាំកូរ៉េខាងជើងលោកគីមជុនអ៊ុនបានព្រមានប្រាប់ដល់បណ្ដាអ្នកទទួលខុសត្រូវសំខាន់របស់បក្ស ពីបណ្ដាផលវិបាកធ្ងន់ធ្ងរ ប្រសិនបើវីរុសCOVID-19ឆ្លងចូលក្នុងប្រទេសលោក។
រដ្ឋដ៏ក្រីក្រនោះហើយស្ថិតនៅឯកោខាងការទូត មានប្រព័ន្ធសុខាភិបាលខ្សោយនិងខ្វះខាតបណ្ដាឧបករណ៍ បានបិទយ៉ាងជិតព្រំដែនរបស់ខ្លួន ដើម្បីចៀសវាងរាល់ការឆ្លងវីរុសនេះ ខណៈខ្លួនមានព្រំដែនជាប់ប្រទេស២ ដែលមានវីរុសនេះរាតត្បាតខ្លាំងគឺចិននិងកូរ៉េខាងត្បូង។
យោងតាមទីភ្នាក់ងារព័ត៌មានផ្លូវការកូរ៉េខាងជើងKCNAថា ក្នុងកិច្ចប្រជុំមួយរបស់បក្សពលករកូរ៉េ លោកគីមជុងអ៊ុនលើកឡើងថា ការតស៊ូប្រឆាំងវីរុសជារឿងសំខាន់មួយ ដើម្បីការពារប្រជាជន ដែលទាមទារឲ្យមានវិន័យខ្ពស់បំផុត។ ក្នុងករណីដែលជំងឺនោះឆ្លងហើយរាតត្បាតមិនអាចគ្រប់គ្រងបានចូលក្នុងប្រទេស នោះនឹងនាំឲ្យមានបណ្ដាផលវិបាកធ្ងន់ធ្ងរ។
KCNA រាយការណ៍ពីការដកហូតតំណែងអនុប្រធាន២រូបរបស់បក្សពលករកូរ៉េ គឹលោកRI MAN GON និងលោក PAK THAE DOKនិងពីការរំលាយចោលសាខាបក្សមួយ មកពីសង្ស័យលើរឿងពុករលួយ ដែលប៉ះពាល់ដល់បណ្ដាវិធានការបង្ការប្រឆាំងវីរុស។
កូរ៉េខាងជើងបានចាត់បណ្ដាវិធានការ ដែលតឹងតែងជាងគេបំផុតលើពិភពលោក ដោយហាមឃាត់បណ្ដាអ្នកទេសចរបរទេស មិនឲ្យចូលមកតាមរថភ្លើងឬតាមយន្តហោះជើងហោះហើរអន្តរជាតិ ហើយដាក់ឲ្យនៅដាច់ពីគេជនបរទេសមួយចំនួន ដែលមានវត្តមានក្នុងប្រទេស៕ ដកស្រង់ចេញពីវេបសាយ ៖ yahoo (កែសម្រួលដោយ៖ បុប្ផា)
ចែករំលែកព័តមាននេះ