ខេត្តប៉ៃលិន ៖ ម្ចាស់យំស្ទើរគាំង បន្ទាប់ពីបានឃើញហេតុការណ៍ផ្ទះរបស់ខ្លួន ត្រូវបានអគ្គិភ័យលេបត្របាក់អស់ទាំងស្រុង ខណៈគ្មានអ្នកនៅចាំ ដោយបិទទ្វារចាក់សោទុកចោល ស្រាប់តែប្រជាពលរដ្ឋឃើញអណ្តាតភ្លើង និងផ្សែងហុយចេញពីក្នុងផ្ទះ ក៏ផ្អើលនាំគ្នារត់ទៅជួយពន្លត់តែនៅមិនអាចជួយបានឡើយ ។ហេតុការណ៍នេះ បានកើតឡើង កាលពីវេលាម៉ោង៣ និង១០នាទីរសៀល ថ្ងៃទី២៩ កុម្ភៈ ឆ្នាំ២០២០ នៅចំណុចក្បែរផ្ទះលោកមេភូមិតាង៉ែនលើ ស្ថិតក្នុងភូមិតាង៉ែនលើ សង្កាត់ប៉ៃលិន ក្រុងប៉ៃលិន ខេត្តប៉ៃលិន បណ្តាលឲ្យខូចខាតទាំងស្រុង ព្រមទាំងឆេះអស់ម៉ូតូមួយគ្រឿង និងសម្ភារក្នុងផ្ទះផងដែរ ។
ប្រភពព័ត៍មានពីនគរបាលបានឲ្យដឹងថា ម្ចាស់ផ្ទះខាងលើមាន ឈ្មោះ រិទ្ធ ចាន់រ៉ា ភេទប្រុស អាយុ២៧ឆ្នាំ ដោយនៅមុនពេលកើតហេតុ ម្ចាស់ផ្ទះនេះ អត់ស្នាក់នៅក្នុងផ្ទះនោះទេ ព្រោះជាប់រវល់ចេញទៅធ្វើការទាំងប្តីទាំងប្រពន្ធ ។ ផ្ទះដែលទទួលរងការឆេះនេះ គឺសង់ឡើងពីឈើ ដំបូលប្រក់ស័ង្កសី មានជញ្ជាំងចាក់ស៊ីម៉ង់ត៍ ។ ប្រភពបានបន្តថា ក្រោយពីអគ្គិភ័យលេបត្របាក់រួច សម្ភារដែលខូចខាតរួមមាន ម៉ូតូ១គ្រឿង ម៉ាកវ៉េវអាល់ហ្វាស៊េរីឆ្នាំ២០១៨ និងសម្ភារប្រើប្រាស់ក្នុងផ្ទះមួយចំនួនទៀត ត្រូវឆេះអស់ទាំងស្រុង តែមិនបង្កឲ្យមានមនុស្សណារងរបួសនោះទេ ។
ពាក់ព័ន្ធនឹងមូលហេតុនេះ គឺគេមិនទាន់ដឹងច្បាស់នៅឡើយទេ កំពុងធ្វើការស្រាវជ្រាវបន្ត ហើយភ្លើងបានរលត់ទាំងស្រុង បន្ទាប់ពីមានការអន្តរាគមន៍ពន្លត់ពីរថយន្តពន្លត់អគ្គិភ័យនៃស្នងការដ្ឋាននគរបាលខេត្ត ដោយប្រើប្រាស់រថយន្ដចំនួន៣គ្រឿង ហើយប្រើទឹកចំនួន២រថយន្តផងដែរ។
ចែករំលែកព័តមាននេះ