រាជធានីភ្នំពេញ ៖ ប្រតិភូអ្នកសារព័ត៌មានល្បីៗកម្រិតពិភពលោក មកពីសហគមន៍អឺរ៉ុបចំនួន៨រូប បានមកធ្វើទស្សនកិច្ចសិក្សាស្រាវជ្រាវពីសក្ដានុពលវិស័យទេសចរណ៍នៅកម្ពុជា ក្នុងគោលបំណងដើម្បីយកទៅផ្សព្វផ្សាយបន្តប្រាប់ដល់ពិភពលោក និងភ្ញៀវទេសចរឱ្យបានដឹងបានឃើញ ខណៈដែលកម្ពុជាកំពុងត្រូវការដៃគូផ្សព្វផ្សាយបន្ថែមស្រាប់ ។ ក្រុមអ្នកសារព័ត៌មានទាំងនោះ…
រាជធានីភ្នំពេញ ៖ ប្រតិភូអ្នកសារព័ត៌មានល្បីៗកម្រិតពិភពលោក មកពីសហគមន៍អឺរ៉ុបចំនួន៨រូប បានមកធ្វើទស្សនកិច្ចសិក្សាស្រាវជ្រាវពីសក្ដានុពលវិស័យទេសចរណ៍នៅកម្ពុជា ក្នុងគោលបំណងដើម្បីយកទៅផ្សព្វផ្សាយបន្តប្រាប់ដល់ពិភពលោក និងភ្ញៀវទេសចរឱ្យបានដឹងបានឃើញ ខណៈដែលកម្ពុជាកំពុងត្រូវការដៃគូផ្សព្វផ្សាយបន្ថែមស្រាប់ ។
ក្រុមអ្នកសារព័ត៌មានទាំងនោះ មានអ្នកខ្លះជាអ្នកសរសេរBlogរបស់សារព័ត៌មាន Canberra Time និងតំណាងសមាគមបោះពុម្ពផ្សាយព័ត៌មានដទៃទៀតមកពីប្រទេសអូស្ត្រាលី អ្នកខ្លះជាអ្នកសារព័ត៌មាន TAZ សារព័ត៌មាន NZZ វិទ្យុ XY ប្រចាំទីក្រុងប៊ែរឡាំង និងប្រព័ន្ធផ្សព្វផ្សាយផ្សេងទៀតមកពីប្រទេសអាល្លឺម៉ង់ អ្នកខ្លះទៀតតំណាងមកពីទស្សនាវដ្តី Volkskrant.nl-Daily មកពីប្រទេសហូឡង់ និងមកពីប្រទេសប៊ែលហ្សុិកទស្សនាវដ្តី The Telegraph ទស្សនាវដ្តីឯករាជ្យ (Independent) ទស្សនាវដ្តីភូមិសាស្ត្រ (RGS) សារព័ត៌មានBBC សារព័ត៌មាន Metro សារព័ត៌មាន Guardian សារព័ត៌មាន Wanderlust ទស្សនាវដ្តីអាហារនិងទេសចរណ៍ ដែលសុទ្ធតែមកពីចក្រភពអង់គ្លេស ។
ទស្សនកិច្ចនេះធ្វើឡើងចាប់ពីថ្ងៃទី១៦ដល់ទី២៤ ខែកុម្ភៈ ឆ្នាំ២០២០ នៅតាមគោលដៅតំបន់ទេសចរណ៍សំខាន់ៗរួមមាន ខេត្ដសៀមរាប ខេត្ដព្រះសីហនុ ខេត្ដកំពត ខេត្ដកែប និងរាជធានីភ្នំពេញ ។ប្រតិភូអ្នកសារព័ត៌មានខាងលើនេះ បានមកដល់កម្ពុជាតាមអាកាសយានដ្ឋានអន្ដរជាតិសៀមរាប និងមានការជជែកពាក់ព័ន្ធពីការវិវត្ដថ្មីៗ និងលើកិច្ចការងារជួសជុលថែរក្សាប្រាង្គប្រាសាទ រួមជាមួយផែនការអភិវឌ្ឍន៍បន្ដទៅអនាគតរបស់ខេត្ដសៀមរាប ជាមួយភាគីកម្ពុជាផងដែរ ។
នៅថ្ងៃបន្ដបន្ទាប់ ក្រុមប្រតិភូអ្នកសារព័ត៌មាន បានចាប់ផ្ដើមដំណើរទស្សនកិច្ចតាមព្រៃ ដើម្បីសិក្សាស្វែងយល់ និងថតយករូបភាពតាមប្រាង្គប្រាសាទមួយចំនួននៅតំបន់អង្គរ និងបានទៅទស្សនាដំរីនៅព្រៃគូលែន ។ ក្រុមប្រតិភូបានទៅទស្សនាមជ្ឈមណ្ឌលពិព័រណ៍ផ្សេងៗ និងរបស់អង្គការក្រៅរដ្ឋាភិបាលមួយចំនួន ដែលមានទីតាំងក្នុងខេត្តសៀមរាបផងដែរ ដើម្បីសិក្សាស្វែងយល់ពីសិល្បៈ វប្បធម៌ អរិយធម៌ខ្មែរ ។ ក្នុងដំណើរទស្សនកិច្ចនេះ ក្រុមអ្នកសារព័ត៌មានក៏បានទៅសិក្សាស្វែងយល់ពីមុខម្ហូបខ្មែរ ដែលមានការធ្វើបទបង្ហាញយ៉ាងក្បោះក្បាយ ពាក់ព័ន្ធនឹងឈ្មោះមុខម្ហូបខ្មែរ និងរបៀបនៃការចម្អិនឲ្យមានរសជាតិឆ្ងាញ់ នៅតាមភោជនីយដ្ឋានល្បីៗក្នុងខេត្ដសៀមរាប ។
ថ្ងៃទី១៩ ខែកុម្ភៈ ក្រុមអ្នកសារព័ត៌មានបានចាកចេញទៅកាន់ខេត្ដព្រះសីហនុ ដែលជាតំបន់ឆ្នេរសមុទ្រកម្ពុជា ក្នុងគោលបំណងទៅថតយករូបភាពឆ្នេរសមុទ្រកម្ពុជាដ៏ស្រស់ស្អាត និងរមណីយដ្ឋានធំៗល្បីថ្នាក់ផ្កាយ៥កម្រិតពិភពលោក ក៏ដូចជាទទួលយកបទពិសោធន៍ស្នាក់នៅលើកោះមួយចំនួនរបស់កម្ពុជា ។ ក្រុមប្រតិភូ បានបន្ដដំណើរទៅទស្សនារមណីយដ្ឋានមួយចំនួនដែលល្បីៗរបស់ខេត្ដកំពត និងបានទៅសិក្សាស្វែងយល់ពីតំបន់ចម្ការម្រេចកំពត ដែលល្បីល្បាញពាសពេញពិភពលោកផងដែរ ។
រាជធានីភ្នំពេញ ដែលជាមជ្ឈមណ្ឌលសេដ្ឋកិច្ច ពាណិជ្ជកម្ម នយោបាយ និងជាបេះដូងនៃកម្ពុជា គឺជាគោលដៅចុងក្រោយនៃដំណើរទស្សនកិច្ចរបស់ក្រុមប្រតិភូអ្នកសារព័ត៌មាន ដោយបានទៅថតយករូបភាពស្អាតៗ តាមកន្លែងគោលដៅទេសចរណ៍ល្បីៗ និងធ្វើការសិក្សាស្វែងយល់ពីការរស់នៅប្រចាំថ្ងៃរបស់អាជីវករលក់ដូរតាមផ្សារមួយចំនួន ក៏ដូចជាទៅទស្សនាតាមទីតាំងគោលដៅកម្សាន្ដនានា ដែលបានបង្ហាញខ្លួនយ៉ាងស្រស់ស្អាត រំលេចដោយភ្លើងពណ៌បំភ្លឺលម្អទីក្រុងភ្នំពេញនាពេលរាត្រី ។
នៅចុងបញ្ចប់នៃដំណើរទស្សនកិច្ចខាងលើ ក្រុមប្រតិភូអ្នកសារព័ត៌មានល្បីៗ បានចូលជួបសម្ដែងការគួរសមជាមួយលោក សូ វិសុទ្ធី អនុរដ្ឋលេខាធិការក្រសួងទេសចរណ៍ និងលោក ថោងរដ្ឋស័ក្តិ អគ្គនាយកនៃអគ្គនាយកដ្ឋានអភិវឌ្ឍន៍ទេសចរណ៍និងសហប្រតិបត្ដិការអន្ដរជាតិ នៅទីស្ដីការក្រសួងទេសចរណ៍ និងបានជជែករៀបរាប់ពីបទពិសោធន៍នៃដំណើរទស្សនកិច្ចខាងលើ និងបានសាកសួរព័ត៌មានខ្លះៗបន្ថែមទៀត ពាក់ព័ន្ធនឹងកិច្ចការជំរុញផ្សព្វផ្សាយពីសក្ដានុពលទេសចរណ៍កម្ពុជា និងផែនការអភិវឌ្ឍន៍វិស័យទេសចរណ៍របស់រាជរដ្ឋាភិបាលកម្ពុជា សម្រាប់ការវិត្ដថ្មីៗនៃវិស័យទេសចរណ៍ពិភពលោកផង ។
ជាការឆ្លើយតប ថ្នាក់ដឹកនាំក្រសួងទេសចរណ៍បានបកស្រាយជូនក្រុមប្រតិភូអ្នកសារព័ត៌មានខាងលើយ៉ាងក្បោះក្បាយ ក៏ដូចជាបានសន្យាបន្ដកិច្ចសហប្រតិបត្ដិការល្អជាមួយគ្នាជាបន្ដទៀត ដើម្បីជំរុញផ្សព្វផ្សាយពីគោលដៅទេសចរណ៍សំខាន់ៗរបស់កម្ពុជាទៅកាន់ពិភពលោកឲ្យបានស្គាល់ពីកម្ពុជាកាន់តែច្បាស់ ក៏ដូចជាជំរុញលើកទឹកចិត្ដឲ្យភ្ញៀវទេសចរជុំវិញពិភពលោក ធ្វើដំណើរមកកម្ពុជាតាមរយៈអត្ថបទ រូបភាព វីដេអូ ដែលបានបង្ហោះលើបណ្ដាសារព័ត៌មាននានា ប្រព័ន្ធផ្សព្វផ្សាយសង្គម និងទំនាក់ទំងសង្គមផ្សេងៗរបស់ក្រុមប្រតិភូអ្នកសារព័ត៌មានល្បីៗខាងលើកាន់តែច្រើនថែមទៀត ៕
ចែករំលែកព័តមាននេះ