ខេត្តកណ្ដាល ៖ ផ្ទះឈើលើ ថ្មក្រោម១ខ្នងរួមជាមួយទ្រព្យសម្បត្តិនៅក្នុងនោះផងត្រូវបានអគ្គិភ័យឆាបឆេះ បណ្ដាលឲ្យរងការខូចខាតទាំងស្រុង ហើយបើទោះបីជាមានការជួយអន្តរាគមន៍ពីសំណាក់រថយន្តពន្លត់អគ្គិភ័យក៏ដោយ ប៉ុន្តែដោយមានការអន្តរាគមន៍ទាន់ពេលទើបមិនបានឆេះរាលដាលដល់ផ្ទះផ្សេងទៀតដែលស្ថិតនៅជិតគ្នានោះឡើយ ។ ពាក់ព័ន្ធនឹងករណីនេះបណ្ដាលមកពីទុស្សេចរន្តអគ្គិសនីនៅកន្លែងរានកុងម៉ា ។…
ខេត្តកណ្ដាល ៖ ផ្ទះឈើលើ ថ្មក្រោម១ខ្នងរួមជាមួយទ្រព្យសម្បត្តិនៅក្នុងនោះផងត្រូវបានអគ្គិភ័យឆាបឆេះ បណ្ដាលឲ្យរងការខូចខាតទាំងស្រុង ហើយបើទោះបីជាមានការជួយអន្តរាគមន៍ពីសំណាក់រថយន្តពន្លត់អគ្គិភ័យក៏ដោយ ប៉ុន្តែដោយមានការអន្តរាគមន៍ទាន់ពេលទើបមិនបានឆេះរាលដាលដល់ផ្ទះផ្សេងទៀតដែលស្ថិតនៅជិតគ្នានោះឡើយ ។ ពាក់ព័ន្ធនឹងករណីនេះបណ្ដាលមកពីទុស្សេចរន្តអគ្គិសនីនៅកន្លែងរានកុងម៉ា ។
ហេតុការណ៍ខាងលើនោះបានកើតឡើងកាលពីវេលាម៉ោង១២និង១៥នាទីថ្ងៃត្រង់ថ្ងៃទី១ ខែមីនា ឆ្នាំ២០២០ នៅភូមិមនោរម្យ ឃុំបែកចាន ស្រុកអង្គស្នួល ខេត្តកណ្ដាល ។
តាមប្រភពពីនគរបាលស្រុកអង្គស្នួលបានឲ្យដឹងថា ផ្ទះដែលទទួលរងការឆាបឆេះខាងលើនោះសង់ពីឈើលើ ថ្មក្រោម ដំបូលប្រក់ស័ង្កសី បាំងជញ្ជាំងក្ដារ មានទំហំ៥ម៉ែត្រគុណនឹង៦ម៉ែត្រ ជាកម្មសិទ្ធិរបស់ស្ត្រីម្នាក់ឈ្មោះ ហ៊ុយ សុភា អាយុ២៧ឆ្នាំ មុខរបរលក់ដូរ រស់នៅភូមិឃុំុំកើតហេតុខាងលើ ។
តាមប្រភពដដែលបានបន្តថា នៅមុនពេលកើតហេតុ មានការឆ្លងចរន្តអគ្គិសនីចេញពីកន្លែងរានកុងម៉ា ទើបបង្កជាអគ្គិភ័យឆេះរាលដាលដល់ផ្ទះទាំងមូលយ៉ាងសន្ធោសន្ធៅ ហើយខណៈនោះកម្លាំងនគរបាលនៃអធិការដ្ឋានស្រុកអង្គស្នួលដឹកនាំដោយលោកវរសេនីយ៍ឯកមាន សំណាង អធិការនគរបាលស្រុក សហការជាមួយកម្លាំងកងរាជអាវុធហត្ថស្រុក និងកម្លាំងនគរបាលឆក់ឈើនាងនិងប៉ុស្តិ៍បែកចាន ព្រមទាំងកម្លាំងប្រជាការពារផង បានចេញអន្តរាគមន៍ភ្លាមៗតែម្ដង។
តាមប្រភពដដែលបានបន្តទៀតថា សមត្ថកិច្ចខាងលើបានហៅរថយន្តពន្លត់អគ្គិភ័យរបស់ការិយាល័យបង្ការនិងពន្លត់អគ្គិភ័យនៃស្នងការដ្ឋាននគរបាលខេត្តកណ្ដាលចំនួន២គ្រឿងដែលប្រចាំការនៅសាលាស្រុកអង្គស្នួលទៅបាញ់ពន្លត់ភ្លើង ដោយប្រើប្រាស់ទឹកអស់ចំនួន៤សុីទែន ។ ពេលនោះដែរក៏មានរបស់អង្គភាពកងពលតូចទ័ពពិសេសឆ័ត្រយោង៩១១ ចំនួន២គ្រឿង ប្រើប្រាស់ទឹកអស់២សុីទែន ព្រមទាំងរថយន្តដឹកទឹក២គ្រឿងនិងបានប្រើប្រាស់ទឹកអស់ចំនួន៤សុីទែន ទើបភ្លើងរលត់ទៅវិញជាស្ថាពរ និងមិនបានឆេះរាលដល់ផ្ទះដទៃទៀតដែលស្ថិតនៅជិតនោះឡើយ ប៉ុន្តែផ្ទះកើតហេតុបានរងការខូចខាតអស់ទាំងស្រុង ៕ (កែសម្រួលដោយ ៖ ធីតា)
ចែករំលែកព័តមាននេះ