រាជធានីភ្នំពេញ ៖ បុរសម្នាក់បានងប់ងុលនឹងល្បែងស៊ីសងរហូតចាញ់អស់លុយពីខ្លួន ហើយក៏បែកគំនិតធ្វើសកម្មភាពឆបោកប្អូនថ្លៃខ្លួនឯងយកម៉ូតូស៊េរីទំនើប១គ្រឿងទៅបញ្ចាំបានប្រាក់ជិត១ពាន់ដុល្លាររួចសងថ្លៃចាញ់ល្បែងគេ។
បន្ទាប់មក បុរសម្នាក់ខាងលើបានកុហកប្រាប់ប្អូនថ្លៃនិងប្រពន្ធ ព្រមទាំងដាក់ពាក្យបណ្ដឹងកុហកទាំងនគរបាលថែមទៀតថា ខ្លួនបានរងគ្រោះ ព្រោះត្រូវចោរដាក់ថ្នាំសណ្ដំយកម៉ូតូទៅវិញ ធ្វើឱ្យប្អូនថ្លៃរួមទាំងប្រពន្ធអាចជឿខ្លះ ប៉ុន្តែចំណែកនគរបាលវិញអត់ជឿសូម្បីតែបន្តិច ។ ភ្លាមៗនោះលោកវរសេនីយ៍ឯកជឹម ស៊ីថា អធិការនគរបាលខណ្ឌដង្កោបានដឹកនាំបើកការស្រាវជ្រាវរហូតដឹងការពិតភ្លាមៗផងដែរ ។ ខណៈរឿងពិតត្រូវលាតត្រដាងបែបនេះ ស្រាប់តែបុរសនោះលត់ជង្គង់សំពះសុំទោសនគរបាលតែម្ដង បន្ទាប់មកនគរបាលបានចុះទៅដកហូតយកម៉ូតូពីកន្លែងបញ្ចាំយកទៅប្រគល់ជូនម្ចាស់វិញ។
តាមប្រភពពីនគរបាលបានប្រាប់ឲ្យដឹងថា បុរសជាជនសង្ស័យម្នាក់ខាងលើឈ្មោះ ធា រតនា អាយុ២៧ឆ្នាំ មុខរបរកម្មករសំណង់ ស្នាក់នៅក្នុងភូមិត្រពាំងថ្លឹង សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ និងមានទីលំនៅអចិន្ត្រៃយ៍ក្នុងភូមិកំណប់ ឃុំត្បែង ស្រុកកណ្ដាលស្ទឹង ខេត្តកណ្ដាល។ ចំណែកម៉ូតូមួយគ្រឿងដែលត្រូវជននេះយកទៅបញ្ចាំនោះម៉ាកហុងដាឌ្រីម ធុនសេ១២៥ ស៊េរីឆ្នាំ២០២០ ពណ៌ខ្មៅ ពាក់ស្លាកលេខ ភ្នំពេញ ១IC-៤២១៩ ដែលជាកម្មសិទ្ធិរបស់បុរសម្នាក់ត្រូវជាប្អូនថ្លៃរបស់ជនសង្ស័យ និងមិនត្រូវបានស្គាល់អត្តសញ្ញាណឡើយ។
តាមប្រភពដដែលបានបន្តថា កាលពីវេលាម៉ោង៥ល្ងាចថ្ងៃទី២៨ ខែកុម្ភៈ ឆ្នាំ២០២០ ជនសង្ស័យខាងលើនេះបានទៅដាក់ពាក្យបណ្ដឹងនៅប៉ុស្ដិ៍នគរបាលរដ្ឋបាលជើងឯកឲ្យជួយអន្តរាគមន៍ដល់ខ្លួន ដោយបានរៀបចំបំប៉ោងសភាពការណ៍ថា ខ្លួនរងគ្រោះដោយសារត្រូវចោរដាក់ថ្នាំសណ្ដំយកម៉ូតូមួយគ្រឿងម៉ាកហុងដាឌ្រីម ធុនសេ១២៥ ស៊េរីឆ្នាំ២០២០ យកទៅបាត់នៅតាមផ្លូវបេតុងមួយកន្លែង ស្ថិតនៅក្នុងភូមិរលួស សង្កាត់ជើងឯក ខណ្ឌដង្កោ រាជធានីភ្នំពេញ។
តាមប្រភពដដែលបានប្រាប់ឲ្យដឹងបន្ថែមថា ក្រោយពីទទួលបណ្ដឹងគួរឲ្យភ្ញាក់ផ្អើលនេះ នគរបាលបានមិនបានជឿឡើយ ហើយភ្លាមៗនោះលោកវរសេនីយ៍ឯកជឹម ស៊ីថា អធិការនគរបាលខណ្ឌដង្កោ បានដឹកនាំកម្លាំងបើកការស្រាវជ្រាវ រហូតដឹងថា ជននេះជាមនុស្សម្នាក់ដែលងប់ងុលនឹងល្បែងស៊ីសងខ្លាំងណាស់រហូតចាញ់អស់លុយពីខ្លួន ព្រមទាំងជំពាក់លុយគេថែមទៀត ។
តាមប្រភពដដែលបានប្រាប់ឲ្យដឹងបន្ថែមទៀតថា បន្ទាប់មកដោយគ្មានលុយសងថ្លៃចាញ់ល្បែង ជននេះក៏បែកគំនិតខ្ចីម៉ូតូពីប្អូនថ្លៃរបស់ខ្លួនជិះយកទៅបញ្ចាំនៅឯម្ដុំផ្សារឃ្លាំងរំសេវបានប្រាក់ចំនួន៩០០ដុល្លាររួចយកទៅសងគេ ក្រោយមកដោយខ្លាចប្រពន្ធនិងប្អូនថ្លៃរករឿងក៏បានប្រឌិតរឿងកុហកថា ខ្លួនត្រូវចោរដាក់ថ្នាំយកម៉ូតូទៅវិញ។លុះពេលរឿងពិតត្រូវបែកធ្លាយ ស្រាប់តែជនសង្ស័យលត់ជង្គង់សំពះសុំទោសលោកអធិការនគរបាលបាលខណ្ឌដង្កោ នូវរាល់សកម្មភាពដែលខ្លួនហ៊ានកុហក និងបំប៉ោងសភាពការណ៍បែបនេះ ហើយនគរបាលក៏បាននាំទៅកាន់កន្លែងទទួលបញ្ចាំដកហូតយកម៉ូតូប្រគល់ជូនម្ចាស់ដើមវិញ រួចធ្វើការអប់រំនិងឲ្យជននោះធ្វើកិច្ចសន្យាបញ្ឈប់ការបំប៉ោងសភាពការណ៍បែបនេះតទៅទៀត៕ (កែសម្រួលដោយ ៖ ធីតា)
ចែករំលែកព័តមាននេះ