រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា ជនសង្ស័យ១ក្រុមមានគ្នាជាង១០នាក់ប្រដាប់ដោយកាំបិតគ្រប់ដៃ បានធ្វើសកម្មភាពជិះម៉ូតូដេញតាមកាប់ទៅលើបុរសចំនួន៤នាក់ដែលកំពុងជិះម៉ូតូ២គ្រឿងបណ្តើរគ្នាចេញមកពីដើរលេង ក្នុងបំណងប្លន់យកម៉ូតូ តែមិនសម្រេចក៏នាំគ្នាជិះរត់គេចខ្លួនបាត់ស្រមោល បង្កឲ្យមានការភ្ញាក់ផ្អើលកាលពីម៉ោង២និង៣០នាទីរំលងអធ្រាត្រ ថ្ងៃទី២៩ ខែកុម្ភៈ ឆ្នាំ២០២០ ត្រង់ចំណុចខាងមុខរដ្ឋាករទឹកស្វយ័តក្រុងភ្នំពេញ តាមបណ្ដោយផ្លូវ១០៦កែងនឹងផ្លូវR5 ស្ថិតក្នុងសង្កាត់ស្រះចក ខណ្ឌដូនពេញ។
តាមសម្តីពីបុរសជាជនរងគ្រោះឈ្មោះ ធឿន ភេទប្រុស អាយុ២០ឆ្នាំ ជាជាងជួសជុលម៉ូតូ ស្នាក់នៅសង្កាត់ទួលសង្កែទី១ ខណ្ឌឬស្សីកែវ រៀបរាប់ប្រាប់ឲ្យដឹងថា នៅមុនកើតហេតុ ជនរងគ្រោះ រួមជាមួយមិត្តភក្តិម្នាក់ជិះម៉ូតូ១គ្រឿងម៉ាកហុងដាឌ្រីម ស៊េរី០១៩ ពណ៌ខ្មៅ ពាក់ស្លាកលេខ កំពង់ចាម 1U-9592 និងមិត្តភក្តិ២នាក់ទៀតបានជិះម៉ូតូ១គ្រឿងផ្សេងទៀតម៉ាកស៊ុយស៊ូគីស្មាស់វី ពណ៌ខ្មៅ ពាក់ស្លាកលេខ ភ្នំពេញ1BD-8142 ដោយជិះបណ្តើរគ្នា (មុខ ក្រោយ) មកពីដើរលេងនៅឯជ្រោយចង្វារត្រើយខាងកើត បំណងជិះត្រឡប់ទៅផ្ទះវិញនៅម្តុំទួលសង្កែ ដោយធ្វើដំណើរតាមបណ្ដោយផ្លូវព្រះមុនីវង្ស ពីជើងទៅត្បូង។
បុរសរងគ្រោះបន្តថា លុះមកដល់ចំណុចកែងនឹងផ្លូវ១០៦ ក៏ស្រាប់តែលេចមុខក្រុមជនសង្ស័យ១ក្រុមមានគ្នាជាង១០នាក់ប្រដាប់ដោយកាំបិតគ្រប់ដៃ ជិះម៉ូតូ៦ទៅ៧គ្រឿងមិនចាំម៉ាក តាមពីក្រោយជនរងគ្រោះ និងធ្វើសកម្មភាពកាប់ទៅលើជនរងគ្រោះចំដៃខាងឆ្វេង បណ្តាលឲ្យរងរបួស។
ប្រភពដដែលបន្តថា ភ្លាមៗនោះ ជនរងគ្រោះក៏ព្យាយាមបើកម៉ូតូបត់ស្តាំទៅផ្លូវ១០៦ រត់គេចពីក្រុមជនសង្ស័យទាំងភ័យស្លន់ស្លោ រហូតមកដល់ចំណុចកើតហេតុខាងលើ ជនរងគ្រោះក៏បានផ្តួលម៉ូតូចោលរត់យករួចខ្លួន ខណៈនោះមិត្តភក្តិរបស់ជនរងគ្រោះដែលជិះម៉ូតូស្មាស់វី តាមមកពីក្រោយ ក៏ត្រូវក្រុមជនសង្ស័យទាញកាំបិតដេញកាប់ ហើយពេលនោះមិត្តភក្តិជនរងគ្រោះក៏ភ័យរត់ចោលម៉ូតូផងដែរ។
ប្រភពដដែលបន្តថា បន្ទាប់មកក្រុមជនសង្ស័យក៏នាំគ្នាយកដុំថ្មវាយកម្ទេចម៉ូតូស្មាសវី បណ្ដាលឲ្យបែកចង្កៀង និងបែកកាបាំងខាងមុខ និងបំរុងលើកយកម៉ូតូហុងដាឌ្រីមរបស់ជនរងគ្រោះជិះគេចខ្លួន។ តែសំណាងល្អ ត្រូវកម្លាំងកងរាជអាវុធហត្ថខណ្ឌដូនពេញ ដែលប្រចាំការនៅគោលដៅខាងលើ ចេញមកជួយធ្វើការអន្តរាគមន៍ បណ្តាលឲ្យក្រុមជនសង្ស័យភ័យក៏នាំគ្នាជិះម៉ូតូរត់គេចខ្លួនបាត់ស្រមោលតែម្ដង។
ក្រោយពេលកើតហេតុ ជនរងគ្រោះខាងលើ រួមជាមួយមិត្តភក្តិក៏នាំគ្នាលើកម៉ូតូជិះទៅព្យាបាលរបួសនៅឯមន្ទីរពេទ្យ រង់ចាំទៅដាក់ពាក្យបណ្ដឹងនៅប៉ុស្តិ៍នគរបាលរដ្ឋស្រះចកនាព្រឹកស្អែក៕ (កែសម្រួឡដោយ ៖ បុប្ផា)
ចែករំលែកព័តមាននេះ