សហអាមេរិក ៖ បើតាមសារព័ត៌មាន CNN បានឱ្យដឹងថា វេជ្ជបណ្ឌិតកំពូលរបស់សហរដ្ឋអាមេរិក មានសំណើរសាមញ្ញមួយ គឺបញ្ឈប់ការទិញម៉ាស់ពាក់។ សាររបស់លោកឧត្តមសេនីយ៍វេជ្ជបណ្ឌិត Jerome Adams ដែលបានបង្ហោះលើបណ្តាញសង្គម Twitter កាលពីថ្ងៃសៅរ៍ គឺជាការឆ្លើយតបចំពោះការប្រឈមមុខនឹងការខ្វះខាតម៉ាស់ពាក់ការពារ ដោយសារតែប្រជាជនផ្អើលទិញយកមកទុក។
គាត់បានសរសេរលើ Twitter ថា ៖ «អ្នកទាំងអស់គ្នា ខ្ញុំនិយាយមែនទែន! ឈប់ទិញម៉ាស់ទៅ! ម៉ាស់ទាំងនោះមិនមានប្រសិទ្ធភាពក្នុងការការពារសាធារណជនទូទៅពីការឆ្លងមេរោគកូរ៉ូណាថ្មីនោះទេ។ តែប្រសិនបើក្រុមគ្រូពេទ្យមិនអាចរកទិញវាយកមកប្រើបានទេ សម្រាប់ការទៅព្យាបាលអ្នកជំងឺនោះ អ្នកទាំងអស់គ្នានឹងស្ថិតនៅក្នុងបញ្ហាធំហើយ»។
លោកវេជ្ជបណ្ឌិត Adams បាននិយាយថា ការលាងដៃរបស់អ្នកនៅផ្ទះ នៅពេលឈឺ និងសកម្មភាពបង្ការរាល់ថ្ងៃ គឺជាការការពារដ៏ល្អបំផុត។ លោកបានជម្រុញឱ្យប្រជាជនចាក់ថ្នាំបង្ការជំងឺផ្តាសាយ ព្រោះកាលណាអ្នកជំងឺផ្តាសាយកាន់តែតិច វាក៏ជួយដល់ការប្រឆាំងនឹងជំងឺកូរ៉ូណាថ្មីដែរ។
គួរបញ្ជាក់ផងដែរថា ពេលនេះ ហាងលក់ម៉ាស់ជាច្រើននៅទូទាំងអាមេរិកអស់ម៉ាស់លក់ ខណៈដែលមានការបញ្ជាទិញតាមអនឡាញមានការកើនឡើងយ៉ាងខ្លាំង៕ ដកស្រង់ចេញពីវេបសាយ ៖ edition (កែសម្រួលដោយ ៖ បុប្ផា)
ចែករំលែកព័តមាននេះ