ខេត្តបន្ទាយមានជ័យ ៖ មនុស្សម្នាក់បានបាត់បង់ជីវិត និង៤នាក់ផ្សេងទៀតបានរងរបួសធ្ងន់ស្រាល ក្នុងហេតុការណ៍គ្រោះថ្នាក់ចរាចរណ៍រវាងរថយន្តបុកគ្នាជាមួយរថយន្ត ។
ករណីគ្រោះថ្នាក់ចរាចរណ៍ខាងលើនេះបានកើតឡើងកាលពីវេលាម៉ោង៥និង៣០នាទីល្ងាចថ្ងៃទី២៨ ខែកុម្ភៈ ឆ្នាំ២០២០ នៅលើកំណាត់ផ្លូវជាតិលេខ៦ ចន្លោះបង្គោលខ្សែភ្លើងលេខ០៤៨០-០៤៨១ ស្ថិតក្នុងភូមិរំដួល ឃុំភ្នំលៀប ស្រុកព្រះនេត្រព្រះ ។
លោកវរសេនីយ៍ឯកមាស ប្ញទ្ធី អធិការនគរបាលស្រុកព្រះនេត្រព្រះបានឲ្យដឹងថា ភាគីខាងរថយន្តមួយគ្រឿងម៉ាកកូរូឡា ពណ៌ទឹកប្រាក់ ពាក់ស្លាកលេខ ភ្នំពេញ ២V-៤៦៤០ បើកបរដោយឈ្មោះ ប៊ុនចាន់ ស៊ីសុវត្ថិ ភេទប្រុស អាយុ៣៨ឆ្នាំ នៅភូមិធ្លកអណ្តូង សង្កាត់ស្លក្រាម ក្រុងសៀមរាប ខេត្តសៀមរាប និងអ្នករួមដំណើរចំនួន២នាក់ ក្នុងនោះម្នាក់ឈ្មោះ ឃឿន ប៊ុនធា ភេទប្រុស អាយុ៣៧ឆ្នាំ នៅភូមិសាលាកំរើក សង្កាត់សាលាកំរើក ក្រុងសៀមរាប ស្រុកសៀមរាប បានបាត់ជីវិតនៅនឹងកន្លែង រីឯម្នាក់ទៀតមិនស្គាល់ឈ្មោះ បានរងរបួស ។
ចំណែកភាគីខាងរថយន្តមួយគ្រឿងទៀតម៉ាកហាយឡិនឌ័រ ពណ៌ស ពាក់ស្លាកលេខ សៀមរាប ២B-១៨៨១ បើកបរដោយឈ្មោះសឿន មិនា ភេទប្រុស អាយុ៤៥ឆ្នាំ នៅភូមិតាអ៊ិន ឃមទឹកជោរ ស្រុកព្រះនេត្រព្រះ ខេត្តបន្ទាយមានជ័យ រងរបួសស្រាល និងអ្នករួមដំណើរម្នាក់រងរបួសធ្ងន់បាក់កដៃស្តាំឈ្មោះទីង គង់ ភេទស្រី អាយុ៤៦ឆ្នាំ នៅភូមិតាអ៊ីន ឃុំទឹកជោរ ស្រុកព្រះនេត្រព្រះ ។
លោកអធិការនគរបាលស្រុកព្រះនេត្រព្រះបានឲ្យដឹងថា នៅមុនពេលកើតហេតុ មានរថយន្តមួយគ្រឿងម៉ាកកូរ៉ូឡា បានបើកវ៉ាជែងរថយន្តមួយគ្រឿងស្របគ្នាក្នុងទិសដៅពីលិចទៅកើត ស្រាប់តែរេចង្កូតទៅខាងឆ្វេងដៃ ស្របពេលនោះមានរថយន្តមួយគ្រឿងម៉ាកហាយឡិនឌ័រ បានបើកបរក្នុងទិសដៅពីកើតទៅលិច បុកចំពាក់កណ្តាលចំហៀងខាងស្តាំយ៉ាងពេញមួយទំហឹង បណ្តាលឲ្យអ្នកជិះក្នុងរថយន្តម៉ាកកូរ៉ូឡាបាត់បង់ជីវិតម្នាក់នៅនឹងកន្លែង និងម្នាក់ទៀតរងរបួស ។ ចំណែកអ្នកជិះរថយន្តមួយគ្រឿងម៉ាកហាយឡិនឌ័ររងរបួសធ្ងន់ម្នាក់ និងអ្នកបើកបររបួសស្រាល។
ក្រោយពេលកើតហេតុ អ្នករងរបួសធ្ងន់និងស្រាល ត្រូវបានបញ្ជូនទៅព្យាបាលនៅមន្ទីរពេទ្យ ចំណែកសពជនរងគ្រោះម្នាក់ត្រូវបានប្រគល់ជូនក្រុមគ្រួសារដើម្បីយកទៅចាត់ចែងធ្វើបុណ្យាតាមប្រពៃណី ។ ចំពោះរថយន្តរងការខូចខាតធ្ងន់ទាំង២គ្រឿង ត្រូវបានកម្លាំងនគរបាលជំនាញចរាចរណ៍បានយកមករក្សាទុកនៅអធិការដ្ឋាននគរបាលស្រុក ដើម្បីរង់ចាំធ្វើការដោះស្រាយគ្នានៅពេលក្រោយ ៕ (កែសម្រួលដោយ ៖ ធីតា)
ចែករំលែកព័តមាននេះ