រាជធានីភ្នំពេញ ៖ គ្រូចិនសែដ៏ល្បីមកពីប្រទេសសិង្ហបុរី បានសំឡឹងអាជីវកម្មទស្សន៍ទាយ លើករាសីតាមជំនឿរបស់ចិននៅកម្ពុជា និងបានបើកអាជីវកម្មនេះជាផ្លូវការនៅក្នុងប្រទេសកម្ពុជា ហើយក៏មានចុះបញ្ជី នៅក្នុងក្រសួងពាណិជ្ជកម្មកម្ពុជាផងដែរ ដែលធ្វើអោយអាជីវកម្មក្លាយជាអាជីវស្របច្បាប់ដំបូងគេនៅកម្ពុជា ។…
រាជធានីភ្នំពេញ ៖ គ្រូចិនសែដ៏ល្បីមកពីប្រទេសសិង្ហបុរី បានសំឡឹងអាជីវកម្មទស្សន៍ទាយ លើករាសីតាមជំនឿរបស់ចិននៅកម្ពុជា និងបានបើកអាជីវកម្មនេះជាផ្លូវការនៅក្នុងប្រទេសកម្ពុជា ហើយក៏មានចុះបញ្ជី នៅក្នុងក្រសួងពាណិជ្ជកម្មកម្ពុជាផងដែរ ដែលធ្វើអោយអាជីវកម្មក្លាយជាអាជីវស្របច្បាប់ដំបូងគេនៅកម្ពុជា ។
នៅក្នុងពិធីបើកសម្ពោធ កាលពីល្ងាចថ្ងៃទី២៦ កុម្ភៈ ២០២០ លោកនឹម ច័ន្ទតារា អ្នកតំណាងរាស្ត្រមណ្ឌលកំពត ងជាលេខាធិការគណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាននៃរដ្ឋសភា បានមានប្រសាសន៍ថា នៅពេលប្រទេសមានសុខសន្តិភាព ជំនឿសាសនា ត្រូវបានបើកទូលាយ សម្រាប់ប្រជាពលរដ្ឋកាន់សាសនាផ្សេងៗមិនថា ព្រះពុទ្ធសាសនា ឬសាសនាផ្សេងៗឡើយ ខុសពីសម័យខ្មែរក្រហម ដែលត្រូវបានរំលាយសាសនាចោលទាំងអស់ ។ ជាក់ស្ដែង វត្តអារាម ត្រូវបានយកធ្វើជាក្រោលគោ ឬឃ្លាំងស្រូវ ឃ្លាំងអាវុធផ្សេងៗ ហើយលុបបំបាត់មិនអោយប្រជាជនលើអ្វីទាំងអស់ និងត្រូវបង្ខំអោយធ្វើការទាំងយប់ទាំងថ្ងៃ និងមិនអោយហូបចុកឆ្អែតឡើយ ។
លោកបន្តថា សម្រាប់បច្ចុប្បន្ននេះ ក្រោយពេលដែលកម្ពុជាបើកទូលាយលើការជឿសាសនា នានា ក៏មានសាសនាជាច្រើនចូលមកក្នុងនោះ គ្រូចិនសែទស្សន៍ទាយលើករាសី និងហុងស៊ុយនានា ក៏មានអ្នកជឿជាក់ច្រើន ជាពិសេសពីសំណាក់បងប្អូនប្រជាជនដែលជាប់សែស្រឡាយចិន ។ លោកថា៖« ប្រជាជនរស់នៅក្នុងប្រទេសកម្ពុជា មានទស្សនៈខុសៗគ្នា ហើយជំនឿសាសនាក៏ខុសៗគ្នាដែរ ដោយមិនមានការកំណត់អោយជឿលើសាសនាណាមួយឡើយ » ។
បើតាមលោកគ្រូ Wu Dao គ្រូហុងស៊ុយពីប្រទេសសិង្ហបុរី បានអោយដឹងថា លោកបានពង្រីកនៅបណ្ដាប្រទេសជាច្រើន និងទទួលបានការគាំទ្រពីសំណាក់ប្រជាពលរដ្ឋអ្នកជឿជាក់លើជំនឿជាច្រើនផងដែរ ។ បើពុំមានការជឿជាក់ ម្ល៉េះលោកនឹងមិនពង្រីកបានច្រើនប្រទេសដូច្នេះទេ ។
លោកបន្តថា មនុស្សម្នាក់ៗនៅគ្រប់ប្រទេស តែងតែមានជំនឿសាសនារៀងៗខ្លួន ។ បើទោះបីជាវិទ្យាសាស្ត្រមានការរីកចម្រើនយ៉ាងណាក្ដី ក៏មិនអាចនៅដាច់ដោយឡែកពីជំនឿសាសនាបានដែរ ពោលគឺនៅតែមានការពឹងពាក់គ្នា ដូច្នេះ តាមរយៈវត្តមានរបស់លោកនៅកម្ពុជា ក៏សង្ឃឹមថានឹងទទួលបានគាំទ្រពីសំណាក់ប្រជាពលរដ្ឋរស់នៅក្នុងប្រទេសកម្ពុជាផងដែរ ៕
ចែករំលែកព័តមាននេះ