ខេត្តកែប ៖ សមត្ថកិច្ចខេត្តកែប មានកងនគរបាល និងមន្ត្រីកងរាជអាវុធហត្ថស្រុកដំណាក់ចង្អើរ ក្នុងនោះមានមន្ត្រីកាំកុងត្រូលផងដែរ បានធ្វើការដកហូតសាច់ទាខូចគុណភាព ហៅទាស្អុយជាង១តោន ធ្វើការដុតបំផ្លាញចោល កាលពីវេលាម៉ោង៤រសៀលថ្ងៃទី២៦ កុម្ភៈ នៅចំណុចជើងភ្នំលាវ ឃុំពងទឹក ស្រុកដំណាក់ចង្អើរ ខេត្តកែប ។
យោងតាមការអោយដឹងពីលោកវរសេនីយ៍ទោ ង៉ែត ទូច ប្រធានការិយាល័យនគរបាលប្រឆាំងបទល្មើសសេដ្ឋកិច្ច ស្នងការដ្ឋាននគរបាលខេត្តកែប បាននិយាយប្រាប់អោយដឹងថា សាច់ទាទម្ងន់ជាង១តោន ដែលត្រូវឈ្មួញម្នាក់ឈ្មោះ អែម ប្រុស ភេទប្រុស អាយុ៤៦ឆាំ្ន នៅភូមិភ្នំលាវ បានទិញបន្តពីឈ្មោះ អែម ភារៈ ហើយឈ្មោះភារៈក៏បានទិញពីឈ្មោះ ទេព ទិត្យ នៅរាជធានីភ្នំពេញនោះ នគរបាលក៍ដូចមន្ត្រីកាំកុងត្រូលបានរកឃើញថា សាច់ទាជាង១តោននោះ ពិតជាខូចគុណភាពអស់ទៅហើយ ។
លោកវរសេនីយ៍ទោ ង៉ែត ទូច និយាយប្រាប់អោយដឹងថា ឆ្លងតាមការពិនិត្យជាក់ស្ដែងរកឃើញថា សាច់ទាមានទម្ងន់ជាង១តោននោះពិតជាខូចគុណភាព អាជ្ញាធរស្រុក ខេត្ត បានឯកភាពគ្នាធ្វើការដុតចោលនៅជើងភ្នំនោះតែម្ដង ។
លោកវរសេនីយ៍ទោរូបនោះនិយាយថាឈ្មួញ២នាក់ ដែលទិញបន្តសាច់នេះពីក្រុមឈ្មួញនៅរាជធានីភ្នំពេញ ត្រូវបានអាជ្ញាធរធ្វើការអបរំ និងឈប់អោយទិញបន្តយកមកលក់ទៀត ព្រោះថា សាច់ទាទាំងនេះបើប្រជាពលរដ្ឋទិញយកទៅហូប អាចនឹងប៉ះពាល់ដល់សុខភាពមិនខានឡើយ ។
តាមការកត់សម្គាល់ សាច់ទាស្អុយជាងមួយតោននេះ ទំនងចេញពីកសិដ្ឋានចិញ្ចឹមណាមួយ ដែលឈឺងាប់ ហើយម្ចាស់មិនកប់ចោល បែរជាលក់ឱ្យឈ្មួញយកទៅលក់តាមបណ្ដាខេត្ត ។ ដូច្នេះ ពិតជាគ្រោះថ្នាក់ណាស់ ដល់សុខភាពមនុស្ស ៕
ចែករំលែកព័តមាននេះ