ពិធីស្រោចស្រពព្រះសុគន្ធវារីសម្តេចសង្ឃនាយករង3ព្រះអង្គ
- ភ្នំពេញ
រាជធានីភ្នំពេញ ៖ ព្រឹកថ្ងៃសុក្រទី២៨ ខែកុម្ភៈ នៅវត្តមុនីសុវណ្ណ ហៅវត្តចំពុះក្អែក សម្តេចតេជោនាយករដ្ឋមន្ត្រី ហ៊ុន សែន អមដោយមន្ត្រីថ្នាក់ដឹកនាំនានា…
រាជធានីភ្នំពេញ ៖ ព្រឹកថ្ងៃសុក្រទី២៨ ខែកុម្ភៈ នៅវត្តមុនីសុវណ្ណ ហៅវត្តចំពុះក្អែក សម្តេចតេជោនាយករដ្ឋមន្ត្រី ហ៊ុន សែន អមដោយមន្ត្រីថ្នាក់ដឹកនាំនានា បានអញ្ជើញស្រោចស្រពព្រះសុគន្ធវារីប្រគេនសម្តេចព្រះនាយករងចំនួន៣ព្រះអង្គ ដែលព្រះមហាក្សត្រទើបត្រាស់បង្គាប់ដំឡើងនិងតែងតាំង ។
សម្តេចព្រះសង្ឃនាយករងទាំង៣ព្រះអង្គ ដែលប្រារព្ធធ្វើពិធីស្រោចស្រពព្រះសុគន្ធវារីប្រគេននេះមាន ៖
១-សម្តេចព្រះពោធិវ័ង្ស អំ លីមហេង សម្តេចព្រះសង្ឃនាយករងទី១
២-សម្តេចព្រះវនរ័ត ណយ ច្រឹក សម្តេចព្រះសង្ឃនាយករងទី២ និង
៣-សម្តេចព្រះឧត្តមវង្សា មួង រ៉ា សម្តេចព្រះសង្ឃនាយករងទី៣ ។
នៅក្នុងពិធីនោះ មានការយាងនិងនិមន្តជាអធិបតីភាពពីសំណាក់សម្ដេចព្រះអគ្គមហាសង្ឃរាជាធិបតី ទេព វង្ស សម្ដេចព្រះមហាសង្ឃរាជនៃព្រះរាជាណាចក្រកម្ពុជា សម្ដេចព្រះអភិសិរីសុគន្ធា មហាសង្ឃរាជាធិបតី បួរ គ្រី សម្ដេចព្រះមហាសង្ឃរាជគណៈធម្មយុត្តិកនិកាយនៃព្រះរាជាណាចក្រកម្ពុជា សម្ដេចព្រះមហាសុមេធាធិបតី នន្ទ ង៉ែត សម្ដេចព្រះសង្ឃនាយកនៃព្រះរាជាណាចក្រកម្ពុជា និងមានការយាងនិងអញ្ជើញចូលរួម ពីឥស្សរជនជាន់ខ្ពស់នៃស្ថាប័នព្រឹទ្ធសភា រដ្ឋសភា រាជរដ្ឋាភិបាល មន្ត្រីរាជការ ប្រជាពលរដ្ឋ ក្រុមកាយឫទ្ធិ ក្រុមកាកបាទក្រហមកម្ពុជា សិស្សានុសិស្ស និងលោកគ្រូអ្នកគ្រូយ៉ាងច្រើនកុះករ ។
សម្តេចតេជោ ហ៊ុន សែន បានសម្តែងនូវក្តីសប្បាយរីករាយក្រៃលែង ដែលបានអញ្ជើញមកចូលរួមក្នុងពិធីស្រោចស្រពព្រះសុគន្ធវារីប្រគេនសម្តេចព្រះនាយករង៣ព្រះអង្គនាពេលនេះ។សម្តេចតេជោ ក៏បានបង្ហាញពីមោទនភាពចំពោះសមិទ្ធផលផ្នែកព្រះពុទ្ធសាសនា ដែលមានការរីកចម្រើនរហូតមកដល់ពេលនេះ ។
សម្តេចតេជោ បានអរព្រះគុណចំពោះព្រះសង្ឃទាំង២គណៈ ដែលបានចូលរួមចំណែកយ៉ាងសំខាន់ក្នុងការអភិវឌ្ឍនិងលើកស្ទួយវិស័យព្រះពុទ្ធសាសនាដែលជាសាសនារបស់រដ្ឋ ។
សម្តេចតេជោថ្លែងថា ប្រទេសកម្ពុជាយើងមិនដែលកើនមានជម្លោះសាសនាឡើយ ខុសពីប្រទេសមួយចំនួនដែលតែងតែកើតមានជម្លោះសាសនា ។ សន្តិភាព ពិតជាមានតម្លៃមិនអាចកាត់ថ្លៃបាន ប្រទេសមានសន្តិភាពទើបធ្វើឲ្យព្រះពុទ្ធសាសនារីកចម្រើនមកដល់ពេលនេះ ។ សម្តេចតេជោនាយករដ្ឋមន្ត្រី ក៏បានផ្តល់នូវការកត់សម្គាល់មួយចំនួននៃរួមចំណែកក្នុងវិស័យពុទ្ធចក្រ ៖
១-តាមរយៈក្របខណ្ឌនយោបាយរបស់គណបក្សប្រជាជនកម្ពុជា គឺបានធានានូវសុខសន្តិភាព ទាំងផ្នែកអាណាចក្រនិងពុទ្ធចក្រ ដែលធ្វើឱ្យវិស័យទាំងពីររីកចម្រើនទន្ទឹមគ្នា ។
២-ប្រជាពលកម្ពុជាមានសិទ្ធិសេរីភាពពេញលេញក្នុងការជ្រើសរើសជំនឿសាសនារបស់ខ្លួនទៅតាមការជឿជាក់ទៅលើសាសនានោះ ដោយគ្មានការបង្ខិតបង្ខំ ។
៣-ដោយសារតែជីវភាពរបស់ប្រជាពលរដ្ឋមានភាពល្អប្រសើរ ទើបធ្វើឱ្យពួកគាត់មានឱកាសក្នុងការធ្វើបុណ្យទានគ្រប់ទីកន្លែង និងធ្វើឱ្យព្រះពុទ្ធសាសនាកាន់តែរីកចម្រើនទៅមុខ ។
៤-នៅពេលដែលវិស័យអាណាចក្រមានការរីកចម្រើនហើយនោះ វិស័យពុទ្ធចក្រក៏មានការរីកចម្រើនទៅតាមហ្នឹងដែរ ។
នៅក្នុងឱកាសនោះ សម្តេចតេជោ ហ៊ុន សែន បានប្រគេននិងជូនអំណោយជាថវិកាមួយចំនួនដល់ព្រះសង្ឃ និងយាយជីតាជី ដែលបាននិមន្តនិងចូលរួមក្នុងពិធីនេះ និងបានប្រគេនពរ និងជូនពរដល់ព្រះសង្ឃ យាយជីតាជី និងប្រជាពលរដ្ឋទាំងអស់សូមជួបតែសេចក្តីសុខសេចក្តីចម្រើន ។មុននឹងបញ្ចប់ ក៏មានពិធីដង្ហែសម្តេចព្រះសង្ឃ នាយករងទាំង៣ព្រះអង្គចំនួន៣ជុំធ្វើដំណើរមកកាន់បុស្បុក ដើម្បីទទួលការស្រោចស្រពព្រះសុគន្ធាវារី ទៅតាមបវេណី ៕
ចែករំលែកព័តមាននេះ