ខេត្តព្រះសីហនុ ៖ សេចក្តីរាយការបឋមឲ្យដឹងថា កាលពីថ្ងៃទី២៧ ខែកុម្ភៈ ឆ្នាំ២០២០ កម្លាំងសមត្តកិច្ចនគរបាលខេត្តព្រះសីហនុ បានធ្វើការឃាត់ខ្លួនជនជាតិចិនម្នាក់ និងឥណ្ឌូណេស៊ីម្នាក់ ពាក់ព័ន្ធករណីជួញដូរអាវុធដោយខុសច្បាប់ ។
កាលពីវេលាម៉ោង៩យប់ថ្ងៃទី២៧ ខែកុម្ភៈ ឆ្នាំ២០២០ កម្លាំងជំនាញផែនការងារនគរបាលព្រហ្មទណ្ឌ បានប្រើប្រាស់ជំនាញស៊ីជ្រៅ ធ្វើការបង្ក្រាបចាប់ឃាត់ខ្លួនបានបុរសជាជនសង្ស័យម្នាក់ ជាជនជាតិឥណ្ឌូនេស៊ី ដែលយកកាំភ្លើងខ្លី១ដើម ទៅលក់នៅចំណុចភូមិ២ សង្កាត់១ ក្រុងព្រះសីហនុ ។
បន្ទាប់ពីធ្វើការសាកសួរ ជនសង្ស័យបានសារភាពថា កាំភ្លើងខ្លីដែលយកមកលក់នេះ គឺមានបុរសជនជាតិចិនម្នាក់ ជាអ្នកអោយយកទៅលក់ ហើយបុរសជនជាតិចិននោះកំពុងច្រៀងលេងនៅខារ៉ាអូខេយីហោ ជីងទៀនជីយៀក (៣៣៣ចាស់) ជាន់ទី៤ បន្ទប់លេខ ៦៦៦ ។ បន្ទាប់មកកម្លាំងជំនាញបានបន្តទៅចាប់ឃាត់ខ្លួនបានជនសង្ស័យដែលជាម្ចាស់កាំភ្លើងម្នាក់ទៀត ។
ជនសង្ស័យទាំង២នាក់ខាងលើ ក្នុងនោះម្នាក់ឈ្មោះ KEL VIN ភេទប្រុស អាយុ៣២ឆ្នាំ ជនជាតិឥណ្ឌូនេស៊ី មុខរបរ មិនពិតប្រាកដ និងម្នាក់ទៀតឈ្មោះHUANG QIANG ភេទប្រុស ជាជនជាតិចិន ។
ពាក់ព័ន្ធនឹងករណីខាងលើនេះ ការិយាល័យនគរបាលព្រហ្មទណ្ឌកម្រិតស្រាលកំពុងបន្តនីតិវិធី ៕ (កែសម្រួលដោយ ៖ធីតា)
ចែករំលែកព័តមាននេះ