រាជធានីភ្នំពេញ ៖ ស៊ីម៉ាក់បានសម្តែងការសោកស្តាយចំពោះការយកសម្ភារៈដែលជាស្នាដៃមរតកពីបុរាណមករំលាយ ដើម្បីធ្វើជារូបសំណាក ឬវត្ថុថ្មី ក្រោយរូបភាពជំនឿសាសនានាពេលបច្ចុប្បន្ន ។
លោក ហេង រតនា អគ្គនាយករដ្ឋមជ្ឈមណ្ឌលសកម្មភាពកំចាត់មីន កម្ពុជា (CMAC) បានឲ្យដឹងនៅថ្ងៃទី២៨ កុម្ភៈនេះតាមបណ្តាញសង្គមដោយបង្ហោះរូបភាពរបស់ប្រជាជនមួយចំនួនបានកំពុងធ្វើការរំលាយប្រាក់ ឬស្ពានដែលជាស្នាដៃរបស់បុព្វបុរសសម័យយ៉ាងដូច្នេះថា ៖ ពិតជាមហាសោកស្តាយពន់ពេក និងហួសចិត្ត នៅពេលឃើញទិដ្ឋភាពនាំគ្នាប្រមែលប្រមូលវត្ថុ ឬសម្ភារធ្វើពីប្រាក់ ឬស្ពាន់ជាស្នាដៃមរតកចាស់ៗពីដូនតា (អាចមានវត្ថុខ្លះតាំងពីសម័យបូរាណ) មករំលាយយកប្រាក់ ឬស្ពាន់ ដើម្បីយកមកកសាងរូបសំណាក ឬវត្ថុថ្មីអ្វីមួយក្រោមរូបភាពជំនឿសាសនា ។
លោកបានន្តថាឃើញគំនិត និងទស្សនៈបែបនេះនឹកឃើញដល់សម័យប៉ុល ពត វាយកម្ទេចព្រះវិហារ សាលារៀន មន្ទីរទេព្យយកសរសៃដែកមកស្លរធ្វើជាដែកគោល! ? សម័យសង្គ្រាមមានឈ្មួញមួយចំនួនបានដើរប្រមូលទិញសម្ភារបែបនេះយកទៅលក់ឲ្យឈ្មួញថៃ ហើយរហូតឈានដល់លួចប្លន់កាត់ក្បាលរូបបដិមារ ឬវាយកម្ទេចរូបចម្លាក់តាមជញ្ជាំងប្រាសាទនានាផងដែរ ។ លោកបានបញ្ជាក់ថា ៖« នេះជាទង្វើនាំការគិតខុសដល់សង្គម និងជាទង្វើបំផ្លាញវប្បធម៌មរតកខ្លួនឯងដោយខ្វះប្រាជ្ញាស្មារតីយល់ដឹង ! បើចង់ធ្វើ ឬផលិតអ្វីថ្មី សូមរួបរួមទិញប្រាក់ស្ពាន់ថ្មីមកផលិតបន្តទៀត ទើបត្រឹមត្រូវ» ។
លោកក៏បានសូមអំពាវនាវក្រសួងវប្បធម៌ ក្រសួងសាសនា អាជ្ញាធរមូលដ្ឋាន គណៈសង្ឃសូមព្រះមេត្តា និងមេត្តាផ្សព្វផ្សាយអប់រំព្រមទាំងមានវិធានការច្បាប់ចំពោះករណីនេះ ! ទើបអាចផ្លាស់ប្តូរឥរិយាបថ ប្រជាជនមួយចំនួនតូចបាន និងអាចការពារស្នាដៃមរតកដូនតារបស់ខែ្មរអាចស្ថិតស្ថេរគង់វង្សយូរអង្វែង!៕ កែសម្រួលដោយ ៖ សុឃាក់
ចែករំលែកព័តមាននេះ