រាជធានីភ្នំពេញ ៖ តារាសម្តែង និងជាពិធីការិនីសម្បូរវោហារជីម មី បានប្រកាសបញ្ចប់កិច្ចសន្យាការងារជាមួយស្ថានីយទូរទូស្សន៍ PNN ហើយ បន្ទាប់ពីបានបម្រើការអស់រយៈពេល៥ឆ្នាំ ពោលគឺចាប់តាំងពី…
រាជធានីភ្នំពេញ ៖ តារាសម្តែង និងជាពិធីការិនីសម្បូរវោហារជីម មី បានប្រកាសបញ្ចប់កិច្ចសន្យាការងារជាមួយស្ថានីយទូរទូស្សន៍ PNN ហើយ បន្ទាប់ពីបានបម្រើការអស់រយៈពេល៥ឆ្នាំ ពោលគឺចាប់តាំងពី PNN បើកដំណើរការផ្សាយរហូតមកទល់បច្ចុប្បន្ន ។ ការចាកចេញនាពេលនេះរបស់ជីម មី ដោយសារបញ្ហាអ្វី ហើយនាងទៅណា ?
ជីម មី បានអះអាងប្រាប់កោះសន្តិភាពតាមសារអេឡិចត្រូនិកកាលពីថ្ងៃទី២៦ កុម្ភៈ ២០២០ថា នាងនឹងបញ្ចប់កិច្ចសន្យាជាមួយស្ថានីយទូរទស្សន៍ PNN ជាផ្លូវការនៅអំឡុងខែមីនា ឆ្នាំ២០២០ បន្ទាប់ពីនាងបានបម្រើការ៥ឆ្នាំកន្លងមកនេះ ។ នាងបញ្ជាក់ថា មូលហេតុដែលនាងមិនបន្តការងារជាមួយ PNN គឺដោយសារតែនាងត្រូវចេញទៅបំពេញការងារផ្ទាល់ខ្លួននៅឯក្រៅប្រទេសមួយរយៈ ប៉ុន្តែនាងក៏នៅមិនទាន់ច្បាស់ថានឹងចេញទៅនៅពេលណា និងមានរយៈពេលប៉ុន្មានឡើយ គ្រាន់តែ ឆាប់ៗខាងមុខនេះ ។
យ៉ាងណាក៏ដោយ បន្ទាប់ពីបានប្រកាសបញ្ចប់ការងារជាមួយPNN នាងក៏ទទួលបានការទាក់ទងច្រើនពីស្ថានីយទូរទស្សន៍ និងស្ថាប័នមួយចំនួន ប៉ុន្តែនាងនៅមិនទាន់សម្រេច ភ្លាមៗនាពេលនេះឡើយ ដោយសារតែនាងចង់ធ្វើការងារបែបឯករាជ្យ (freelancer)។ ជីម មី បញ្ជាក់បន្ថែមថា «បើទោះបីជានាងបានប្រកាសពីការចាកចេញពីPNN ក៏ដោយ ប៉ុន្តែនាងខ្ញុំក៏មិនភ្លេចស្ថានីយទូរទស្សន៍មួយនេះដែរ ព្រោះបានជ្រោងឲ្យនាងខ្ញុំមានប្រជាប្រិយភាពបន្ថែម ហើយប្រសិនបើមានឱកាសនាងខ្ញុំអាចនឹងបន្តធ្វើការងារនៅទីនេះបន្ថែមទៀត »។
ជីម មី គឺជាពិធីការិនីដ៏ស្រស់សោភា និងមានប្រជាប្រិយភាពយ៉ាងខ្លាំងនាពេលបច្ចុប្បន្ននេះ ។ មិនតែប៉ុណ្ណោះពិធីការិនីរូបនេះ ថែមទាំងមានសមត្ថភាព និងវោហារស័ព្ទមិនចេះរីងស្ងួតនោះទេ ។ ជីមមីចេះនិយាយបានភាសាថៃ, ចិន និងអង់គ្លេសបានយ៉ាងល្អ ។
តារាសម្តែងជីមមី ឬ ម៉េង ឃុននី ត្រូវគេដឹងថា នាងអាចរកប្រាក់ចំណូលបានរាប់ពាន់ដុល្លារ តាមរយៈការធ្វើពិធីការិនី តាមបណ្តាកម្មវិធីសម្ពោធក្រុមហ៊ុន ធំៗ ដោយនាងស៊ីថ្លៃ ក្នុង១ម៉ោង៥០០ដុល្លារ សម្រាប់នៅរាជធានីភ្នំពេញ និងតាមខេត្ត ជិត១ពាន់ដុល្លារ ហើយនាងថា បើកម្មវិធីនោះ ហួសពី៣ម៉ោងឡើង គឺនាងគិតលុយថែមទៀត ។
ដោយឡែកទន្ទឹមនឹងភាពជោគជ័យលើអាជីពសិល្បៈនេះ ជីមមី ត្រូវគេសង្ស័យថា នាងបានលួចបង្កាត់ភ្លើងស្នេហ៍ក្រៅឆាកជាមួយនឹងតារាសម្តែងប្រុសកូនកាត់រុស្ស៊ីលោកសួន រ៉ានីរ៉ាស៊ីនី ហៅព្រីន ស៊ីនី ប៉ុន្តែរហូតមកទល់ពេលនេះអ្នកទាំងពីរនៅមិនទាន់ទទួលស្គាល់នៅឡើយទេ ប៉ុន្តែគេធ្លាប់បានប្រទះឃើញរូបភាពស្និទ្ធស្នាលរបស់អ្នកទាំងពីរតាមបណ្តាញសង្គមជាបន្តបន្ទាប់ ៕ (កែសម្រួលដោយ ៖ បុប្ផា)
ចែករំលែកព័តមាននេះ