រាជធានីភ្នំពេញ ៖ មានករណីអគ្គិភ័យឆាបឆេះផ្ទះមួយល្វែងក្នុងបុរីវិមានភ្នំពេញ ខណៈម្ចាស់អត់នៅចាក់សោទុកចោល ស្រាប់តែមានអណ្តាតភ្លើងឆាបឆេះ បង្កការភ្ញាក់ផ្អើលដល់ប្រជាពលរដ្ឋជាអ្នកដំណើរ និងអ្នកជិតខាងនាំគ្នាវាយបំបែកកញ្ចក់ទ្វារ រួចយកបំពង់ពន្លត់អគ្គិភ័យទៅបាញ់ពន្លត់ចំនួន៦ទៅ៧បំពង់ និងប្រើប្រាស់រថយន្តពន្លត់អគ្គីភ័យ១គ្រឿងទៀត ទើបភ្លើងរលត់អស់ទាំងស្រុងនៅវេលាម៉ោង១១យប់ថ្ងៃទី២៦ ខែកុម្ភៈ ឆ្នាំ២០២០ នៅចំណុចផ្ទះមួយល្វែងក្នុងបុរីវិមានភ្នំពេញ តាមបណ្តោយផ្លូវ៥៩៨ ស្ថិតក្នុងសង្កាត់ទួលសង្កែ២ ខណ្ឌឬស្សីកែវ ។ ពាក់ព័ន្ធនឹងករណីនេះ ត្រូវបានគេសង្ស័យថាមកពីទុស្សេខ្សែភ្លើង ។
តាមប្រភពព័ត៌មានពីសមត្ថកិច្ចខណ្ឌឬស្សីកែវបានអោយដឹងថា មុនពេលកើតហេតុ ផ្ទះកើតហេតុខាងលើនេះនៅទល់មុខនឹងកន្លែងផលិតទឹកបរិសុទ្ធ ហើយម្ចាស់ផ្ទះអត់នៅបានចាក់សោទុកចោល ។
តាមប្រភពដដែលបានបន្តថា ដោយសារផ្ទះកើតហេតុកំពុងតែរៀបចំជួសជុលនៅឡើយទេ មិនដឹងជាមូលហេតុអ្វីនោះទេបានជាមានអគ្គិភ័យឆាបឆេះចេញជាអណ្តាតភ្លើងយ៉ាងសន្ធោសន្ធោ ពេលនោះមានអ្នកធ្វើដំណើរកាត់តាមផ្លូវនោះ និងអ្នកជិតខាង រួមទាំងសមត្ថកិច្ចមូលដ្ឋានចុះមកដល់ទីតាំងកន្លែងកើតហេតុរួចនាំគ្នាវាយបំបែកកញ្ចក់ទ្វារផ្ទះដើម្បីអន្តរាគមន៍បាញ់ទឹកពន្លត់ទប់ស្កាត់កុំអោយរាលដាលដល់ផ្ទះដទៃ ដោយយកបំពង់ពន្លត់អគ្គិភ័យបាញ់អស់ចំនួន៦ទៅ៧បំពង់នៅសល់តែផ្សែង លុះរថយន្តពន្លត់អគ្គិភ័យរបស់ស្នងការរាជធានីភ្នំពេញចុះមកជួយអន្តរាគមន៍ចំនួន៣គ្រឿង ដោយធ្វើការបាញ់ទឹកពន្លត់អស់មួយគ្រឿង ទើបភ្លើងបានរលត់ទាំងស្រុងតែម្តង ។
ក្នុងហេតុការណ៍អគ្គីភ័យខាងលើនេះដែរ លោក ជា ពិសី អភិបាលខណ្ឌឬស្សីកែវក៏បានសំណូមពរដល់បងប្អូនប្រជាពលរដ្ឋទាំងអស់មេត្តាបង្កើនការយកចិត្តទុកដាក់ខ្ពស់នឹងប្រុងប្រយ័ត្នដោយសារតែមួយរយៈនេះ អគ្គីភ័យបានកើតឡើងស្ទើររាល់ថ្ងៃទៅហើយ ៕ (កែសម្រួលដោយ ៖ ធីតា)
ចែករំលែកព័តមាននេះ