រាជធានីភ្នំពេញ ៖ ដើមសម្តេច ស ខេង បានបញ្ជាក់ថា ៖«នៅចំពោះមុខនេះយើងធ្វើវិសោធនកម្មច្បាប់ចរាចរណ៍ផ្លូវគោក អីញ្ចឹងយើងត្រូវចាប់ផ្តើមពីពេលណា ? ឬចាប់ផ្តើមខែកុម្ភៈ ឬខែមីនាទៅបញ្ចប់នៅខែណាពិតប្រាកដត្រូវគិតរឿងនេះ ហើយអនុគណៈកម្មការនីមួយៗត្រូវធ្វើការរឿងនេះ» ។ សម្តេច ស ខេង ក៏បានឲ្យដឹងថា អនុក្រឹត្យដែលត្រូវធ្វើវិសោនកម្មនោះត្រូវបានមកដល់សម្តេច ហើយប្រហែលជាថ្ងៃច័ន្ទសប្តាហ៍ក្រោយភាគីពាក់ព័ន្ធនឹងជួបប្រជុំ ដើម្បីពិនិត្យវិសោធនកម្មអនុក្រឹត្យត្រង់ទោសបញ្ញត្តិដែលនិយាយអំពីស្ថានភាពការផាកពិន័យ ។ ចំណុចនេះ គឺជាសកម្មភាពជាក់លាក់ ដើម្បីធ្វើការមិនដឹងទិសដៅការងារ ។ នេះបើតាមសម្តេចក្រឡាហោម ស ខេង ។ ថ្លែងក្នុងកិច្ចប្រជុំបូកសរុបលទ្ធផលការងារត្រួតពិនិត្យសកម្មភាពការចរាចរណ៍ផ្លូវគោកប្រចាំខែមករា នាព្រឹកថ្ងៃទី២៧ ខែកុម្ភៈ នាទីស្តីការក្រសួងមហាផ្ទៃថា នឹងធ្វើវិសោធនកម្មអនុក្រឹត្យច្បាប់ចរាចរណ៍ផ្លូវគោក ដោយបន្ថែមទោសបញ្ញាត្តិនៅពេលខាងមុខនេះ ។
សម្តេចបន្តការធ្វើបែបនេះ ដើម្បីការអនុវត្តន៍ច្បាប់ព្រោះឆ្នាំ២០២០នេះ គឺត្រូវតែអនុវត្តច្បាប់តែម្តង ។ សម្តេចថា ការធ្វើវិសោធនកម្មច្បាប់ត្រូវតែធ្វើការពិនិត្យឲ្យបានគ្រប់ជ្រុងជ្រោយផងដែរព្រោះថា ច្បាប់នេះត្រូវបានធ្វើវិសោនធកម្មម្តងរួចហើយ ។ ច្បាប់នេះផងដែរ ពេលមុនមិនបានគិតទូលំទូលាយ ។ សម្តេចស ខេង ក៏បានលើកឡើងថាប្រជាពលរដ្ឋទាំងអស់ត្រូវស្មើភាពចំពោះមុខច្បាប់ក្នុងការអនុវត្តច្បាប់ស្ដីពី ចរាចរណ៍ផ្លូវគោក ជាពិសេសចូលរួមទប់ស្កាត់គ្រោះថ្នាក់ចរាចរណ៍នៅកម្ពុជា ។
សម្តេចបានរំលឹកថា មន្ដ្រីរបស់ក្រសួងមហាផ្ទៃទាំងអស់ត្រូវប្រកាន់នូវសីលធម៌ និងវិជ្ជាជីវៈ ដើម្បីធ្វើយ៉ាងណាប្រជាពលរដ្ឋខ្មែររស់ដោយសុខសាន្ដដោយគ្មានការភ័យខ្លាច ។ សម្ដេចបញ្ជាក់ថា៖ «មនុស្សទាំងអស់តាមគោលការណ៍ច្បាប់ គឺស្មើភាពគ្នាចំពោះមុខច្បាប់អាហ្នឹងមួយ នគរបាលត្រូវស្ដាប់ឲ្យភ្ជាប់នៅនឹងកន្លែងស្មើភាពគ្នាចំពោះមុខច្បាប់ ឥឡូវនឹងអ្នកឈរតាមដងផ្លូវស័ក្តិប៉ុន្មាន? ហើយមន្ដ្រីចរាចរណ៍យើងស័ក្តិប៉ុន្មាន? ។ ប៉ុន្ដែអ្នកធ្វើដំណើរ ប្រជាជនក៏មានមន្ដ្រីរាជការធំក៏មាន មន្ដ្រីរាជការតូចក៏មាន ដូច្នេះ គឺស្មើភាពគ្នាចំពោះមុខច្បាប់» ។
ឆ្លៀតឱកាសនោះដែរ សម្ដេចក្រឡាហោម ស ខេង លើកឡើងទៀតថា អ្នកធ្វើដំណើរតាមផ្លូវខ្លាចសព្វថ្ងៃខ្លាចឥទ្ធិពលប៉ូលិស ហើយធ្វើដំណើរតាមម៉ូតូនៅពេលថ្ងៃពាក់មួកសុវត្ថិភាព១០០% ឬ៩៩% ។ ក៏ប៉ុន្ដែនៅពេលយប់ អ្នកធ្វើដំណើរតាមម៉ូតូមិនសូវពាក់មួកសុវត្ថិភាពទេ ជាពិសេសគ្រោះថ្នាក់ចរាចរណ៍នៅពេលយប់ក៏ច្រើនផងដែរ ។ ដើម្បីឲ្យពួកគាត់គោរពច្បាប់ចរាចរណ៍ទាំងពេលយប់ និងពេលថ្ងៃ សម្ដេចក្រឡាហោម អំពាវនាវ ឲ្យភាគីពាក់ព័ន្ធបន្ដរឹតបន្ដឹងច្បាប់ចរាចរណ៍បន្ថែមទៀត ដើម្បីកាត់បន្ថយគ្រោះថ្នាក់ចរាចរណ៍ ។ សម្ដេចបន្ថែមថា សមត្ថកិច្ចត្រូវគោរពប្រជាពលរដ្ឋ ត្រូវលើកដៃគោរពពួកគាត់ ហើយត្រូវណែនាំពួកគាត់ នៅពេលធ្វើខុសទៅនឹងច្បាប់ ៕
ចែករំលែកព័តមាននេះ