ខេត្តបាត់ដំបង ៖ តាមពិត ជនដែលកម្លាំងការិយាល័យព្រហ្មទណ្ឌកំរិតស្រាលតាមចាប់ខ្លួនបាន ពាក់ព័ន្ធនឹងករណីវាយ«ប្លន់»នារីបម្រើការនៅក្លិបខារ៉ាអូខេកាលពីប៉ុន្មានថ្ងៃមុន គឺជាអ្នករត់តាក់ស៊ីដ៏ទំនើងប្រចាំមូលដ្ឋានម្នាក់ ហើយមុនពេលធ្វើសកម្មភាពប្លន់នារីរងគ្រោះ ជននេះបានជិះរថយន្តចូលទៅចាក់សាំងនៅក្នុងស្ថានីយប្រេងមួយកន្លែង ក្នុងស្រុកថ្មគោល មិនព្រមឲ្យលុយ ហើយព្យាយាមបើករត់គេចបាត់ លុះពេលយប់ជ្រៅ ជននេះក៏ជិះរថយន្តធ្វើសកម្មភាព«ប្លន់»នៅក្នុងបាត់ដំបងតែម្ដង។ នេះបើតាមប្រវត្តិដែលមន្ត្រីបានទម្លាយឲ្យដឹងក្រោយពេលត្រូវចាប់ខ្លួន ។
លោកឈឿង គឹមសុង នាយការិយាល័យព្រហ្មទណ្ឌកំរិតស្រាលនៃស្នងការខេត្តបានឲ្យដឹងថា ជនសង្ស័យ ឈ្មោះ សេក ផល្លា អាយុ៣១ឆ្នាំ មានមុខរបររត់តាក់ស៊ី រស់នៅភូមិប្រគាប ឃុំរូងជ្រៃ ស្រុកថ្មគោល។ជននេះ ត្រូវកម្លាំងរបស់លោក សហការជាមួយកម្លាំងអធិការស្រុកថ្មគោល ក្រោមការបញ្ជាផ្ទាល់ពីលោកស្នងការខេត្ត និងលោកស្នងការរងទទូលផែនព្រហ្មទណ្ឌ ធ្វើការស្រាវជ្រាវរយៈពេល៣ថ្ងៃ ទើបឈានដល់ការឃាត់ខ្លួនបាន កាលពីរសៀលថ្ងៃទី២៦ កុម្ភៈ ខណៈដែលជននេះកំពុងសម្ងំនៅនឹងផ្ទះរបស់ខ្លួន ។
លោក នាយការិយាល័យរូបនេះបានប្រាប់ថា ជាមួយនឹងការឃាត់ខ្លួននោះ យើងដកហូតបានរថយន្តម៉ាកហាយឡិនឌ័រ ពណ៌ប្រផេះ (ពណ៌គយ) ពាក់ស្លាកលេខភ្នំពេញ 2AI-9709 ជារថយន្តជិះធ្វើសកម្មភាពប្លន់, កាបូបដៃ១ និងគ្រឿងអលង្ការមួយចំនួនផង ដែលគេអះអាងថា ជារបស់នារីរងគ្រោះឈ្មោះ ធី រត្ថា អាយុ២៧ឆ្នាំ បំរើការខារ៉ាអូខេ ស្នាក់នៅបន្ទប់ជួលក្នុងភូមិរំចេក៤ សង្កាត់រតនៈ ក្រុងបាត់ដំបង (ចំណុចកើតហេតុ) ។
ជាមួយនឹងការឃាត់ខ្លួននេះ បើតាមចម្លើយបឋមរបស់ជនសង្ស័យឈ្មោះ សេក ផល្លា ដែលបានសារភាពប្រាប់សមត្ថកិច្ចថា ខ្លួនពិតជាបានធ្វើសកម្មភាពវាយប្លន់នារីរងគ្រោះនោះមែន ។ ជននេះបានសារភាពទៀតថា នៅយប់កើតហេតុនេះ ខ្លួនបានជិះរថយន្តវិលវល់នៅក្នុងក្រុងបាត់ដំបង ព្រោះខ្លួនមិនហ៊ានត្រឡប់ទៅផ្ទះភ្លាមៗ ដោយសារខ្លួនចាក់សាំងគេមិនឲ្យលុយនៅស្រុកថ្មគោល ។ លុះនៅពាក់កណ្ដាលអាធ្រាត្រ នាយប់កើតហេតុ ខ្លួនបានឃើញនារីម្នាក់ជិះម៉ូតូតាមផ្លូវ ខ្លួនក៏ជិះដេញតាមដល់ចំណុចកើតហេតុ ឃើញនារីនោះឈប់ម៉ូតូ ខ្លួនក៏ឈប់រថយន្តដែរ ហើយចុះទៅវាយនារីនោះដូលប្លន់យកកាបូបដៃ រួចឡើងបើករថយន្តត្រឡប់ក្រោយ គេចទៅផ្ទះវិញទៅផ្ទះទាំងយប់ ។ ជនចិត្តស្លុយនេះ បានបញ្ជាក់ថា នៅពេលខ្លួនធ្វើសកម្មភាពប្លន់នោះ រថយន្តខ្លួនមិនពាក់ស្លាកលេខខាងក្រោយទេ ខ្លួនបានដោះចេញ ព្រោះខ្លាចម្ចាស់ស្ថានីយប្រេងដែលខ្លួនចាក់មិនឲ្យលុយតាមស្វែងរក។
មន្ត្រីប៉ុស្ដិមូលដ្ឋាន បាននិយាយប្រាប់ពីប្រវត្តិលោកចោររត់តាស៊ីខាងលើនេះថា ជនសង្ស័យឈ្មោះ សេក ផល្លា នេះ ជាជនទំនើងបង្កបញ្ហាគ្រប់បែបយ៉ាងនៅក្នុងមូលដ្ឋាន។ ជននេះតែងបង្កភាពភ័យខ្លាចដល់អ្នកភូមិ ។ មន្ត្រីប៉ុស្ដិ៍ប្រាប់ថា អ្នកភូមិតែងផ្អើលនាំគ្នាអូសដៃកូនៗរត់ចូលផ្ទះព្រោងព្រាត នៅពេលឃើញជននេះបើករថយន្តចូលភូមិម្ដងៗ ព្រោះខ្លាចជននេះបើករថយន្តបុក ។ ជននេះ ធ្លាប់មានប្រវត្តិប្រើប្រាសថ្នាំញៀន តែជននេះមានអាជីពជាអ្នករត់តាក់ស៊ី ។ គេធ្លាប់ឮអ្នកដំណើរខ្លះនិយាយថា ម៉ូយដែលធ្លាប់ជិះតាក់ស៊ីជនទំនើងនេះ តែងសុំចុះតាមផ្លូវជាញឹកញាប់ ដោយសារតែជននេះបើកសាហាវពេក។
សូមបញ្ជាក់ថា កាលពីវេលាម៉ោងជិត១រំលងអធ្រាត្រ ឈានចូលថ្ងៃទី២៣ កុម្ភៈ មានជនមិនស្គាល់អត្តសញ្ញាណម្នាក់ ជិះរថយន្តម៉ាកហាយឡិនឌ័រពណ៌ប្រផេះ បានតាមស្ទាក់វាយប្លន់យកកាបូប ពីនារីបំរើការខារ៉ាអូខេម្នាក់ ពេលនាងជិះម៉ូតូទៅដល់ខាងមុខផ្ទះជួល ដែលស្ថិតនៅភូមិរំចេក៤ សង្កាត់រតនៈ ក្រុងបាត់ដំបង ។ នៅក្នុងកាមេរ៉ាសុវត្ថិភាព គេឃើញសកម្មភាពជនសង្ស័យ បានបើករថយន្តទៅឈប់ក្បែរនាង ហើយចុះទៅវាយនាងបណ្ដាលឲ្យដូល រួចប្លន់យកកាបូបដៃមួយរត់ឡើងរថយន្តបើកត្រឡប់ក្រោយគេចខ្លួនដោយសុវត្ថិភាពទាំងកណ្ដាលយប់ ខណៈនារីរងគ្រោះស្រែកឡាំប៉ាផ្អើលគេកណ្ដាលយប់។
លោកឧត្តមសេនីយត្រី ជេត វណ្ណនី ស្នងការរងខេត្តបានមានប្រសាសន៍ថា ក្រោយពេលកើតហេតុ លោកស្នងការខេត្ត បានបញ្ជាឲ្យកម្លាំងជំនាញគ្រប់ការិយាល័យ និងកម្លាំងនៅតាមបណ្ដាអធិការស្រុក និង ក្រុង ធ្វើការស្រាវជ្រាវរកមុខសញ្ញាជនសង្ស័យដែលប្លន់នោះ ។ លោកស្នងការរងបានបញ្ជាក់ថា នៅពេលធ្វើការស្រាវជ្រាវមន្ត្រីជំនាញ បានទទូលព័ត៌មានជាច្រើនពីសាក្សីនានា ដែលជាតម្រុយ រហូតកំណត់មុខសញ្ញានេះបាន និងឈានដល់ការចាប់បានទាំងមនុស្ស ទាំងរថយន្តដែលជិះធ្វើសកម្មភាព ថែមទាំងដកហូតបានវត្ថុតាងដែលជននេះ ប្លន់បានពីនារីរងគ្រោះផងដែរ។ ពេលនេះ ជនសង្ស័យកំពុងស្ថិតនៅការិយាល័យជំនាញ ដែលមន្ត្រីជំនាញកំពុងសួរនាំ ដើម្បីចាត់ការតាមនីតិវិធីហើយ។
ចែករំលែកព័តមាននេះ