រាជធានីភ្នំពេញ ៖ ដើម្បីពង្រឹងការគោរពច្បាប់ចរាចរណ៍ផ្លូវគោកមន្ត្រីជំនាញកម្ពុជានឹងទៅសិក្សាពីប្រព័ន្ធរៀបចំបំពាក់តាមរថយន្ត ដើម្បីចាប់រថយន្តមិនគោរពច្បាប់ចរាចរណ៍មកដាក់តាមអនុវត្ត ។ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណៈការ និងដឹកជញ្ជូនបានលើកឡើងក្នុងកិច្ចប្រជុំត្រួតពិនិត្យការងារសុវត្ថិភាពចរាចរណ៍ផ្លូវគោកប្រចាំខែមករា ឆ្នាំ២០២០ ស្តីការក្រសួងមហាផ្ទៃថា លោកនឹងនាយឧត្តមសេនីយ៍ ហ៊ឹម យ៉ាន អគ្គស្នងការរងនគរបាលជាតិត្រូវបានភាគីចិនបានអញ្ជើញទៅសិក្សាពីរៀបដាប់ប្រព័ន្ធត្រួតពិនិត្យរថយន្តបើកលើសល្បើនកំណត់ដោយសារតែផ្ទុះជំងឺកូរ៉ូណាក៏ផ្អាកវិញ ។
លោកបញ្ជាក់ថា ៖«គេឲ្យយើងទៅមើលពីរបៀបតម្លើងប្រព័ន្ធត្រួតពិនិត្យឡានហៅថា ប្រព័ន្ធបីឌូ ដោយនៅគ្រប់ឡានទាំងអស់ អីចឹងពេលបើកលឿនប្រព័ន្ធ GPS ដឹងភ្លាមគ្រប់ឡានទាំងអស់ ។ អីញ្ចឹងនឹងត្រៀមទៅមើលការងារនេះនៅប្រទេសចិននៅពេលជំងឺកូរ៉ូណាចុះថយ» ។ ជាមួយគ្នានោះដែរ លោកទេសរដ្ឋមន្ត្រីក៏បានលើកឡើងពីស្លាកលេខឡានដែលគ្មាន QR Code ថា បានដាក់ដំណើរតាំងពីឆ្នាំ២០១៧មកម្ល៉េះ ប៉ុន្តែរហូតមកដល់ពេលនេះក៏នៅមានស្លាកលេខ រថយន្តភាគច្រើនអត់មាន QR Code ផងដែរ ។
ចំណុះនេះបានធ្វើឲ្យជនខិលខូចមួយចំនួនធ្វើស្លាកលេខដែលគ្មាន QR Code ផងដែរ ។ កន្លងមកដោយមានការសហការគ្នាជាមួយ នគរបាល ជាតិក៏បានចាប់បានកន្លែងធ្វើស្លាកលេខក្លែងក្លាយ សេះហោះផងដែរ ។ លោកបន្តថា ការដាក់ QR Code ធ្វើឲ្យមានភាពងាយស្រួលដោយគ្រាន់តែយកទូរស័ព្ទ ស្គែនដឹងថា ស្លាកលេខត្រឹមត្រូវ ឬមិនត្រូវផងដែរ ។ លោកបញ្ជាក់ថា ៖« ចំណុចនេះខ្ញុំធ្វើលិខិតទៅរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ដើម្បីស្នើសុំការពិភាក្សាគ្នាក្នុងករណីសុំប្តូរស្លាកលេខទាំងអស់ដែលគ្មាន QR Code ដោយមិនគិតថ្លៃ» ៕
ចែករំលែកព័តមាននេះ