រាជធានីភ្នំពេញ ៖ ឃ្លាំងស្តុកវត្ថុធាតុដើមដែលភាគច្រើនក្រណាត់នាំមកពីប្រទេសចិន នៅរោងចក្រផលិតអំបោះមួយកន្លែង ដែលទើបតែសាងសង់រួច និងដំណើរការក្នុងពេលថ្មីៗនេះត្រូវបានអគ្គីភ័យឆាបឆេះយ៉ាងសន្ធោសន្ធៅ ហើយបានធ្វើឲ្យកម្មករកម្មការិនីដែលកំពុងបម្រើការងារនៅទីនោះនាំគ្នារត់ចេញទាំងព្រលឹងចុងសក់គ្រប់ៗគ្នា តែគ្មាននរណាម្នាក់រងគ្រោះនៅក្នុងហេតុការណ៍នេះឡើយ ។ ហេតុការណ៍នេះមានការភ្ញាក់ផ្អើលវេលាម៉ោង១២និង១០នាទីថ្ងៃត្រង់ ថ្ងៃទី២៦ ខែកុម្ភៈនេះ ដែលរោងច្រនោះមានយីហោ« XINLONGTAL (Cambodia) INDUSTRIAL CO,LTD » មានទីតាំងស្ថិតនៅតាមបណ្ដោយផ្លូវ៥០ម៉ែត្រ ក្នុងភូមិពាម សង្កាត់ព្រៃស ខណ្ឌដង្កោ ។
ចំណែកឯកម្លាំងអាជ្ញាធរ និងសមត្ថកិច្ចខណ្ឌដង្កោបានចេញទៅអន្តរាគមន៍ភ្លាមៗ និងបានហៅរថយន្តពន្លត់អគ្គីភ័យពីអង្គភាពនានាចំនួន៤៩គ្រឿងទៅបាញ់ពន្លត់ផងដែរ ។ ចំណែកអគារឃ្លាំងដែលភ្លើងឆាបឆេះនោះមានទំហំ 1៦ម៉ែត្រគុណនឹង៦០ម៉ែត្រ ដែលមានម្ចាស់ឈ្មោះ អ៊ឹង ប៊ុនប៉េង អាយុ៥៥ឆ្នាំ ជនជាតិខ្មែរ នៅសង្កាត់អូរឬស្សី៤ ខណ្ឌ៧មករា រាជធានីភ្នំពេញ ។ ហើយគាត់បានជួលឲ្យទៅបុរសជនជាតិចិនដែលមានឈ្មោះ LIN XIANMIAN. សញ្ជាតិចិន កាន់លិខិតឆ្លងដែនលេខ P CHN EE 6716330 ។ នៅពេលកំពុងមានការឆាបឆេះនោះមានស្ត្រីជនជាតិចិន២នាក់ ដែលទំនងជាគ្រួសារថៅកែរោងចក្រ ឬក៏មានភាគហ៊ុនក្នុងការរកស៊ីនេះដែរ បាននាំគ្នាលុតជង្គង់លើកដៃសំពះថ្វាយបង្គំបណ្ដើរ និយាយបួងសួងជាភាសាចិនបណ្ដើរ និងយំផងសុំឲ្យកុងម៉ាជួយឲ្យភ្លើងរលត់ភ្លើង ដែលមើលទៅគួរឲ្យអាណិតពួកគាត់ខ្លាំងណាស់ ។
តាមប្រភពព័ត៌មានពីកម្មករដែលបម្រើការងារនៅក្នុងរោងចក្រមួយនេះបាននិយាយថា រោងចក្រដែលត្រូវភ្លើងឆាបឆេះឃ្លាំងនេះ គឺជារោងច្រផលិតអំបោះដែលមានកម្មករបម្រើការងារត្រឹមតែប្រមាណ១០០នាក់ប៉ុណ្ណោះ និងចែកចេញជា២វេន គឺវេនថ្ងៃ និងវេនយប់ថែមទៀតផង ។
ប្រភពដដែលបានបន្តថា ដោយឡែកនៅមុនពេលកើតហេតុខណៈដែលកម្មករកំពុងតែធ្វើការងារស្រាប់តែឮសូសំឡេងផ្ទុះឡើងបន្តិច ក្រោយមកក៏មានអណ្ដាតភ្លើងឆាបឆេះខ្សែភ្លើងរួចក៏រាលដល់សំឡីនិងក្រណាត់យ៉ាងឆាប់រហ័ស ដែលជាហេតុបង្កឲ្យមានការភ្ញាក់ផ្អើយ៉ាងខ្លាំង ។ ភ្លាមៗនោះកម្មករបាននាំគ្នារត់ចេញក្រៅរោងចក្រយ៉ាងប្រសាច តែក៏មានមួយចំនួនបាននៅរួមគ្នាជាមួយតំណាងរោងចក្រជួយពន្លត់ភ្លើងដែរ ប៉ុន្តែពន្លត់យ៉ាងណាក៏មិនឈ្នះដែរព្រោះភ្លើងឆេះខ្លាំងពេកទើបរាយការណ៍ជូនសមត្ថកិច្ចខណ្ឌដង្កោជួយ ៕
ចែករំលែកព័តមាននេះ