៣ ទម្លាប់ងាយៗជួយឲ្យអាជីវកររកលុយបានកាន់តែច្រើន !
លោក ប៊ីជេ ហ្វក (BJ Fogg) ដែលជាអ្នកស្រាវជ្រាវមកពីសាកលវិទ្យាល័យ Stanford បានចំណាយពេលប្រមាណ ៣០ឆ្នាំមកហើយដើម្បីសិក្សាពីការធ្វើការររបស់មនុស្ស ។…
លោក ប៊ីជេ ហ្វក (BJ Fogg) ដែលជាអ្នកស្រាវជ្រាវមកពីសាកលវិទ្យាល័យ Stanford បានចំណាយពេលប្រមាណ ៣០ឆ្នាំមកហើយដើម្បីសិក្សាពីការធ្វើការររបស់មនុស្ស ។ លោកបានប្រទះឃើញថា មនុស្សអាចសម្រេចបានកិច្ចការកាន់តែច្រើនដោយបង្កើតទម្លាប់ការងារដែលពួកគេធ្វើជារៀងរាល់ថ្ងៃ និងការផ្តល់រង្វាន់ដល់ខ្លួនឯងសម្រាប់ការផ្លាស់ប្តូរ ។
លោកបានជំរុញឲ្យមនុស្សព្យាយាមរួមបញ្ចូលទម្លាប់ងាយៗជារៀងរាល់ថ្ងៃ ហើយខាងក្រោមនេះគឺជាទម្លាប់ដែលអាជីវករគួរតែរួមបញ្ចូលក្នុងជីវភាពរស់នៅប្រចាំថ្ងៃរបស់ពួកគេប្រសិនបើពួកគេចង់រកចំណូលបានកាន់តែច្រើន៖
១. កុំបើកប្រព័ន្ធសង្គមពេលដែលទំនេរ
ប្រសិនបើការងាររបស់អ្នកទាក់ទិននឹងប្រព័ន្ធសង្គមច្រើន វាមិនមែនជាបញ្ហាទេ តែសម្រាប់អាជីវករដែលងាយនឹងត្រូវបានរំខានដោយការចូលមើលប្រព័ន្ធសង្គមលេងនោះវាអាចបង្កការប៉ះពាល់ដល់ការងារបាន ។ ប្រសិនបើអ្នកចង់សម្រាក អ្នកគួរតែដើរជុំវិញកន្លែងធ្វើការ ឬទៅនិយាយជាមួយនឹងមិត្តរួមការងារជាដើម និងចៀសវាងប្រព័ន្ធសង្គមដែលមិនមានប្រយោជន៍ដាច់ខាត ។
២. ពេលដែលអង្គុយនៅតុប្រជុំ អ្នកត្រូវកត់ត្រាឲ្យបានល្អ
អាជីវករភាគច្រើនត្រូវជួបមនុស្សជាច្រើនដើម្បីអាចសម្រេចបានកិច្ចការណាមួយបានមិនថាជាបុគ្គលិក អតិថិជន ឬដៃគូអាជីវកម្មណាមួយទេ ។ ដោយហេតុដូចនេះ ការមានទម្លាប់កត់ត្រារាល់ពេលអ្នកជួបនឹងអ្នកដទៃនឹងមានអត្ថប្រយោជន៍យ៉ាងខ្លាំងព្រោះវាអនុញ្ញាតឲ្យអ្នកទំនាក់ទំនងទៅកាន់មនុស្សដែលអ្នកត្រូវការធ្វើការជាមួយបានទាន់ពេលវេលា ។ លើសពីនេះទៅទៀត អ្នកគួរតែមានទម្លាប់កត់ត្រាឲ្យបានច្បាស់លាស់ពីពេលវេលានៃការណាត់ជួបប្រជុំ ឈ្មោះអ្នកចូលរួម និងតំណែងរបស់អ្នកចូលរួមផងដែរដើម្បីជៀសវាងបញ្ហា ។
៣. បន្ទាប់ពីអានអ៊ីមែលដែលសំខាន់ហើយ អ្នកត្រូវឆ្លើយតបវិញ
អាជីវករអាចត្រូវធ្វើការច្រើនជាមួយនឹងអ៊ីមែលមិនថាពីបុគ្គលិក អតិថិជន ឬដៃគូអាជីវកម្មដទៃឡើយ ហើយអ៊ីមែលភាគច្រើនទាមទារឲ្យពួកគេឆ្លើយតបភ្លាមៗផងដែរ ។ ការមិនអាចឆ្លើយតបបានទាន់ពេលវេលាអាចបង្កការរអាក់រអួលនៃការងាររបស់អ្នក និងអ្នកដទៃ ។ ប៉ុន្តែវិធីសាស្ត្រមួយសម្រាប់ពេលដែលអ្នករវល់ និងត្រូវការពេលគិតមុននឹងឆ្លើយតប អ្នកអាចឆ្លើយតបសិនថា «ខ្ញុំនឹងត្រួតពិនិត្យមើលឲ្យបានលម្អិត និងឆ្លើយតបទៅអ្នកវិញក្នុងពេលឆាប់ៗ» ។ ដើម្បីប្រាប់ថាអ្នកបានទទួលអ៊ីមែលនេះហើយ ៕ កែសម្រួលដោយ ៖ សុឃាក់
ចែករំលែកព័តមាននេះ