ខេត្តក្រចេះ ៖ ក្រុមមន្ត្រីជំនាញអភិរក្សនិយាយថា កូនផ្សោតមួយក្បាលថ្មីទៀត ត្រូវបានគេប្រទះឃើញកំពុងហែលក្នុងទឹកទន្លេមេគង្គ នៅអន្លង់ផ្សោតកាំពី ជាមួយនិងមេរបស់វាដ៏ធំមួយក្បាល។ ការប្រទះឃើញកូនផ្សោតថ្មីមួយក្បាលនេះ ក៏ត្រូវបានក្រុមមន្ត្រីអ្នកស្រាវជ្រាវអះអាងថា គឺជាកូនផ្សោតទី៣…
ខេត្តក្រចេះ ៖ ក្រុមមន្ត្រីជំនាញអភិរក្សនិយាយថា កូនផ្សោតមួយក្បាលថ្មីទៀត ត្រូវបានគេប្រទះឃើញកំពុងហែលក្នុងទឹកទន្លេមេគង្គ នៅអន្លង់ផ្សោតកាំពី ជាមួយនិងមេរបស់វាដ៏ធំមួយក្បាល។ ការប្រទះឃើញកូនផ្សោតថ្មីមួយក្បាលនេះ ក៏ត្រូវបានក្រុមមន្ត្រីអ្នកស្រាវជ្រាវអះអាងថា គឺជាកូនផ្សោតទី៣ ដែលត្រូវបានចាប់កំណើតនៅដើមឆ្នាំ២០២០នេះ ដែលបានកើតចេញពីពពួកមេផ្សោតដែលរស់នៅក្នុងអន្លង់ផ្សោតកាំពីស្ថិតនៅក្នុងឃុំសំបុក ស្រុកចិត្របុរី។
ក្រុមមន្ត្រីអភិរក្សបានលើកឡើង ដោយធ្វើការសន្និដ្ឋានថា កូនផ្សោតតូចមួយក្បាលនេះ គឺអាចទើបនិងកើតក្នុងអំឡុងរយៈពេលប៉ុន្មានថ្ងៃមុននេះ ដោយសារផ្សោតនៅតូច ទើបក្រុមមន្ត្រីជំនាញមិនអាចពិនិត្យដឹងថា ជាញីឬក៏ឈ្មោលនៅឡើយទេ។ កូនផ្សោតនេះ ក៏ត្រូវបានក្រុមអ្នកស្រាវជ្រាវរបស់អង្គការអភិរក្សប្រទះឃើញកំពុងតែ ហែលលេងក្នុងទឹកទន្លេជាមួយមេរបស់វាកាលពីថ្ងៃទី២៣ ខែកុម្ភៈ ។
នាយរងខណ្ឌរដ្ឋបាលជលផល និងជាប្រធានឆ្មាំអភិរក្ស លោក ម៉ុក ពន្លក បានថ្លែងឱ្យដឹងនៅថ្ងៃទី២៦ ខែ
កុម្ភៈ នេះថា គិតមកទល់ថ្ងៃនេះ កូនផ្សោតមួយក្បាលនេះ បានចាប់កំណើតមានរយៈពេលជិត១សប្តាហ៍មកហើយ ដោយមានសុខភាពមាំមួន ។ រាប់ទាំងកូនផ្សោតមួយក្បាល ដែលក្រុមមន្ត្រីរបស់លោក បានប្រទះឃើញនេះ គឺជាកូនផ្សោតក្បាលទី៣ ដែលបានកើតជាបន្តបន្ទាប់នាដើមឆ្នាំ២០២០ ខណៈការងាប់របស់សត្វផ្សោតតូចធំ បង្កដោយសារជំងឺឈឺចាស់ និងដោយសារកត្តាផ្សេងៗនាដើមឆ្នាំ២០២០នេះ គឺនៅមិនទាន់ កើតមាននៅឡើយនោះទេ ។
បើតាមលោក ម៉ុក ពន្លក ប្រធានឆ្មាំអភិរក្សសត្វផ្សោតទន្លេមេគង្គខេត្តក្រចេះ និងជានាយរងខណ្ឌរដ្ឋបាលជលផល លោកធ្លាប់បានប្រាប់ឲ្យដឹង កាលពីពេលថ្មីៗនេះថា សព្វថ្ងៃទន្លេមេគង្គខេត្តក្រចេះ មានសត្វផ្សោតរស់នៅក្នុងចន្លោះពី៥៥ ទៅ៦០ក្បាល ។ សត្វផ្សោតទាំងអស់នេះ សព្វថ្ងៃកំពុងតែរស់នៅតាមអន្លង់ចំនួន៥អន្លង់ធំៗ ក្នុងទន្លេមេគង្គខេត្តក្រចេះ ។ អន្លង់ទាំងនោះ មានដូចជាអន្លង់ខ្សាច់ ម្កាក់ អន្លង់កោះដំបង អន្លង់កោះផ្តៅ អន្លង់កន្ទុយកោះរងាវ និងអន្លង់ផ្សោតកាំពី។
ក្នុងចំណោមអន្លង់ធំៗទាំង៥ គឺអន្លង់ផ្សោតកាំពីមានសត្វផ្សោតរស់នៅច្រើនជាងគេក្នុង ចន្លោះចាប់ពី២០ទៅ៣០ក្បាល ។ ដោយលោកបានធ្វើការប៉ាន់ប្រមាណក្នុងឆ្នាំ២០២០នេះ សត្វផ្សោតគឺអាចមានកំណើនដល់ទៅជិត២០ក្បាល តាមរយៈការបង្កកំណើត ។
ចែករំលែកព័តមាននេះ