រាជធានីភ្នំពេញ ៖ ដើម្បីអនុវត្តច្បាប់ឲ្យមានប្រសិទ្ធភាពនិងកាត់បន្ថយគ្រោះថ្នាក់ចរាចរណ៍ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានប្រកាសធានាការពារមន្ត្រីនគរបាលចរាចរណ៍ដែលចាប់មន្ត្រីថ្នាក់ធំជាងខ្លួនដែលមិនគោរពច្បាប់ចរាចរណ៍ ។…
រាជធានីភ្នំពេញ ៖ ដើម្បីអនុវត្តច្បាប់ឲ្យមានប្រសិទ្ធភាពនិងកាត់បន្ថយគ្រោះថ្នាក់ចរាចរណ៍ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានប្រកាសធានាការពារមន្ត្រីនគរបាលចរាចរណ៍ដែលចាប់មន្ត្រីថ្នាក់ធំជាងខ្លួនដែលមិនគោរពច្បាប់ចរាចរណ៍ ។ ក្នុងក្នុងពិធីសម្ពោធដាក់ឲ្យប្រើប្រាស់ជាផ្លូវការអគារសិក្សា ទីចាត់ការ អគាររដ្ឋបាល ឃុំ និងសមិទ្ធផលនានានៅក្នុងស្រុកកំចាយមារ នាព្រឹកថ្ងៃ
ទី២៥ ខែកុម្ភៈ ឆ្នាំ២០២០ សម្តេចក្រឡាហោមថ្លែងថា ៖ «ខ្ញុំនិងសម្តេចតេជោបានកំណត់ហើយ កាល
ណាខុសច្បាប់គឺផ្តន្ទាទោស ហើយបើមិនចង់ឲ្យផ្តន្ទាទោសគឺគោរពច្បាប់ ហើយគោរពច្បាប់គឺដើម្បីជីវិតរបស់គាត់ ។
ឥឡូវម៉ូតូបើកអត់ពាក់មួកពីមុនមកខ្ញុំចេញវិធានការអប់រំ ដោយចាប់ទាំងម៉ូតូនិងមនុស្សដើម្បីឲ្យនៅជាមួយប៉ូលិស ដល់ពេលយកមួកមកទើបឲ្យទៅ ។ ប៉ុន្តែលើកនេះយើងនឹងពិចារណា បើគាត់ជិះម៉ូតូហើយមិនពាក់មួក យើងអនុវត្តវិធានការដូចមុនដដែល ដោយឃាត់ទាំងមនុស្សនិងម៉ូតូនៅដដែល ដោយឲ្យយកមួកមកទើបឲ្យទៅប៉ុន្តែពេលក្រោយនេះឲ្យទៅដូចមុនតែបង់ផាកពិន័យសិន» ។
សម្តេចក្រឡាហោមគូសបញ្ជាក់ថា ៖ «រដ្ឋមិនចង់បានលុយនេះទេ ប៉ុន្តែចង់កាពារអាយុជីវិតប្រជាជន ។ បើលោកឯងមិនចង់ឲ្យគេផាកពិន័យ លោកឯងគោរពច្បាប់ មិនខាតដំណើរត្រូវពាក់មួក ។ អុីចឹងយើងសុំដូរឡើងវិញ ពីមុនយកការអប់រំសំខាន់ ប៉ុន្តែពេលនេះយកការអប់រំមកដាក់បន្ទាប់ ហើយការអនុវត្តច្បាប់មុនគេវិញ» ។សម្តេចក្រឡាហោម ស ខេង បានលើកឡើងថា ក្នុងនាមជាប្រធានគណៈកម្មាធិការជាតិសុវត្ថិភាពចរាចរណ៍គោក សម្តេចសម្រេចបែបនេះហើយនិងមានការពិភាក្សាគ្នារហូតឈានដល់ វិសោធនកម្មអនុក្រឹត្យ បន្ទាប់មកសិក្សាវិសោធនកម្មច្បាប់ចរាចរណ៍ផ្លូវគោកផងដែរ ។
សម្តេចក្រឡាហោម បានលើកឡើងថា ៖«យើងយកការអនុវត្តច្បាប់សំខាន់ បន្ទាប់មកយើងយកការអប់រំ ។ ការអប់រំកន្លងមកប្រើកម្លាំងច្រើនតែមិនមានប្រសិទ្ធភាពទេ ដូច្នេះមានតែយកការអនុវត្តច្បាប់ជាធំវិញ» ។សម្តេចក្រឡាហោម ស ខេង បានគូសបញ្ជាក់ទៀតថា ច្បាប់ធ្វើឡើងសម្រាប់មនុស្ស គ្រប់គ្នា មិនមែនសម្រាប់អ្នកណាម្នាក់ មិនមែនសម្រាប់ក្មេង ចាស់ ប្រុស ស្រី អ្នកតូច អ្នកធំនោះទេ គឺប្រជាជនទាំងអស់នៅក្រោមច្បាប់ ។សម្តេចក្រឡាហោមបញ្ជាក់ថា ៖ «ទាំងអស់គ្នាស្មើភាពចំពោះមុខច្បាប់ អត់មានលើកលែងអ្នកណាទេ ឲ្យតែខុសច្បាប់ ។ អ្នកខ្លះថា ទេ !
ប៉ូលិសចរាចរណ៍ស័ក្តិ១ ដល់ចាប់ឧត្តមសេនីយ៍ប៉ូលិសពាក់ផ្កាយ៣ ចាប់ឧត្តមសេនីយ៍យោធាពាក់ផ្កាយ
៣ អត់ត្រូវទេ ធ្វើអីុចឹង ។ ខ្ញុំសួរថា តើធ្វើម៉េចបានត្រូវ ? តែច្បាប់ចែងថា មនុស្សមានសិទ្ធិស្មើគ្នាចំពោះមុខច្បាប់ ទោះបីអ្នកឯងផ្កាយ៤ក៏ដោយ បើកឡានបុកគេ ប៉ូលិសផ្កាយមួយ ឬស័ក្តិមួយ ឬក៏ពលបាលត្រីទេ ក៏ចាប់បានដែរ ព្រោះមានសិទ្ធិចំពោះមុខច្បាប់ ។ សម្តេចក្រឡាហោមបានលើកឡើងថា ទោះបីជាមានស័ក្តិ ឬតូនាទីជាតំណាងរាស្ត្រដែលធ្វើច្បាប់យ៉ាងណាក្តី ក៏ត្រូវអនុវត្តច្បាប់ដែរ និងតួនាទីរដ្ឋមន្ត្រីបើមិនគោរពច្បាប់ក៏ខុស ផ្កាយ៤ក៏ដោយបើធ្វើខុសច្បាប់គឺខុស» ។សម្តេច ស ខេង បញ្ជាក់ថា ៖ «អុីចឹងសុំឲ្យអស់លោកប៉ូលិសធ្វើទៅ ហើយមានអីឆ្លើយដាក់ខ្ញុំមក ខ្ញុំការពារ បើមិនអុីចឹងអត់ហ៊ានធ្វើទេ គ្រាន់តែដោះមួកមករួចខ្លួននោះ! រឿងហ្នឹអត់ទេ គឺអ្នកណាក៏ដោយត្រូវតែអនុវត្តច្បាប់» ។
នៅក្នុងខែមករា ឆ្នាំ២០២០កន្លងមក គ្រោះថ្នាក់ចរាចរណ៍បានសម្លាប់មនុស្សចំនួនច្រើនព្រោះថាខែមករាមានពិធីបុណ្យច្រើន ។ ចំណុចនេះ គឺរាជរដ្ឋាភិបាលមានការព្រួយបារម្ភដល់ ខែកុម្ភៈ ដែលមិនទាន់ចប់ក្តី ចំនួនអ្នកស្លាប់មានការថយចុះបើប្រៀបធៀបនឹងខែមករាកន្លងមក ។ មានន័យថា ខែមុនស្លាប់៩០នាក់ ថយមកត្រឹម៦០នាក់ ប៉ុន្តែទោះបីជាថយចុះយ៉ាងណាក្តី ការអប់រំវាសំខាន់ ។សម្តេចក្រឡាហោមបញ្ជាក់ថា យើងត្រូវដូរពីការអប់រំសំខាន់មកការអនុវត្តច្បាប់សំខាន់ជាងវិញ ៕
ចែករំលែកព័តមាននេះ