រាជធានីភ្នំពេញ ៖ បន្ទាប់ពីប្រទេសបើកឲ្យដឹកវត្ថុធាតុដើមគ្រប់ផ្លូវដែលធ្វើបានពីចិនមកកម្ពុជា សម្តេច តេជោ ហ៊ុន សែន នាយករដ្ឋមន្ត្រីបានអះអាងថា កម្ពុជានឹងបញ្ជូនយន្តហោះផ្ទាល់ខ្លួនទៅដឹកវត្ថុធាតុដើមពីប្រទេសចិន ដើម្បីមកផ្គត់ផ្គង់រោងចក្រចៀសវាងការបិទ ។ ថ្លែងក្នុងពិធីសម្ពោធដាក់ឱ្យប្រើប្រាស់ផ្លូវជាតិលេខ៥៨ តភ្ជាប់ពីខេត្តបន្ទាយមានជ័យទៅ ខេត្តឧត្តរមានជ័យ នាព្រឹកថ្ងៃទី២៦ ខែកុម្ភៈនេះ ។
សម្តេចតេជោ បានបញ្ជាក់យ៉ាងដូច្នេះថា ៖«ចំណុចនេះ មុនលោក វ៉ាង វិនធៀន (Wang Wentian) ឯកអគ្គរដ្ឋទូតចិនប្រចាំកម្ពុជា បាននិយាយទាក់ទិននឹងការបញ្ជូនឲ្យបានឆាប់នូវវត្ថុធាតុដើមជាក្រណាត់ ដែល៦០ភាគរយ កម្ពុជាត្រូវយកពីប្រទេសចិន ។ អីញ្ចឹងខ្ញុំសង្ឃឹមថា លោកទូតនឹងជួយចូលរួមចំណែកដើម្បីជួយសម្រាប់ឲ្យរដ្ឋាភិបាលចិនបញ្ជូនសាច់ក្រណាត់មកកម្ពុជា តាមនាវាក្តីយន្តហោះក្តីមកកម្ពុជា» ។ សម្តេចបញ្ជាក់ថា ៖«ខ្ញុំសង្ឃឹមថា មិត្តចិនអាចធ្វើបាន ប្រសិនបើក្រណាត់ខ្លះដឹកតាមយន្តហោះក៏ត្រូវតែដឹក ដើម្បីកុំឲ្យបិទរោងចក្រនៅកម្ពុជា ។ ខ្ញុំគិតថា ចិនធ្វើបានព្រះយន្តហោះចិនច្រើនណាស់ ព្រោះចិនធ្លាប់ដឹកមកខ្លះហើយ ។ ដូច្នេះធ្វើបែបនេះកុំឲ្យកម្មករយើងខ្វះវត្ថុធាតុដើមហើយបិទរោងចក្រ» ។
សម្តេចតេជោ បានប្រកាសបើកគ្រប់ច្រកសម្រាប់ចិនក្នុងការបើកឲ្យមិត្តចិនដឹកវត្ថុធាតុដើមរបស់ខ្លួន ដើម្បីយកមកផ្គត់ផ្គង់រោងចក្រនៅកម្ពុជា ដើម្បីចៀសវាងការបិទរោងចក្រ ។ សម្តេចថា ៖«ខ្ញុំគិតថា មិត្តចិនអាចធ្វើទៅបាន ហើយកម្ពុជាក៏អាចខិតខំធ្វើទៅបាន បើសាច់ក្រណាត់ខ្លះត្រូវដឹកតាមយន្តហោះក៏ត្រូវដឹក ដើម្បីសង្គ្រោះរោងចក្រនៅកម្ពុជាកុំបិទ ហើយកុំឲ្យកម្ពុជាជួបប្រទះខ្វះវត្ថុធាតុដើម ហើយបិទរោងចក្រ» ។
ប្រមុខរាជដ្ឋាភិបាលគូសបញ្ជាក់ថា ៖«អីញ្ចឹងដឹកតាមយន្តហោះដឹងមកដឹកតាមកប៉ាល់ដឹកមក ហើយយើងអាចជួលយន្តជួយយន្តហោះដឹកវត្ថុធាតុដើម ដោយមិនចាំដឹកភ្ញៀវនោះទេ ព្រោះសាច់ក្រណាត់រោងចក្រមួយចំនួនមានឯករោងចក្រមួយចំនួនកាន់តែហោច»។ សម្តេចក៏បានផ្តល់យោបល់ថា ការដឹកវត្ថុធាតុដើមពីចិនអាចធ្វើតាមផ្លូវទឹក និងផ្លូវអាកាស ដើម្បីផ្គត់ផ្គងវត្ថុធាតុដើមនៅកម្ពុជាចៀសវាងការបិទរោងចក្រនៅកម្ពុជា ។ ប្រសិនបើមានការបិទ ឬផ្អាកដំណើររោងចក្រកម្មករ កម្មការិនី និងផ្អាកការងារធ្វើ ។
ជាមួយគ្នានោះដែសម្តេចតេជោក៏បានលើកឡើងថា ទោះបីជាសម្តេចធ្លាប់លើកឡើងថា បើសិនរោងចក្រផ្អាកកម្មករអាចទទួលបានប្រាក់បៀវត្សចំនួន៦០ភាគរយនៃចំនួនប្រាក់បៀវត្សអប្បរមា១៩០ដុល្លារប្រហាក់ប្រហែល១២០ដុល្លារក្តី ក៏សម្តេចបញ្ជាក់ថា សម្តេចមិនចង់ឲ្យមានការបិទរោងចក្រនៅកម្ពុជានោះទេ ។ សម្តេចថា៖ «យល់ល្អយើងត្រូវដោះស្រាយឲ្យប្រញាប់ប្រញាល់ អីញ្ចឹងខ្ញុំគិតថា មានតែយន្តហោះចិន និងយន្តហោះកម្ពុជាបញ្ជូនទៅដឹកវត្ថុធាតុដើមផ្តល់ឲ្យរោងចក្រ អីញ្ចឹងយើងអាចខាត់បង់មួយចំនួនការដឹកជញ្ជូន ប៉ុន្តែយើងជំនួសមកវិញនូវការរក្សាបាននូវការងារធ្វើប្រាក់ចំណូលរបស់កម្មករ និងចង្វាក់ផលិតកម្មរបស់រោងចក្រ ដែលអាចឲ្យរោងចក្រចៀសវាងនូវការបិទ» ៕
ចែករំលែកព័តមាននេះ