ខេត្តក្រចេះ ៖ កូនសត្វផ្សោតទើបកើតថ្មីមួយក្បាលដែលមានអាយុកាលប្រហែលជាពីរថ្ងៃ ត្រូវបានគេប្រទះឃើញក្នុងក្រុមហ្វូងផ្សោតធំដែលមានចំនួនប្រមាណជាបួនក្បាល ត្រង់ចំនុចអន្លង់ផ្សោតកាំពី ក្នុងភូមិកាំពី ឃុំសំបុក ស្រុកចិត្របុរី ខេត្តក្រចេះ កាលពីថ្ងៃទី២៣ ខែកុម្ភៈ ឆ្នាំ២០២០ ដោយក្រុមការងារស្រាវជ្រាវសត្វផ្សោត ។ កូនសត្វផ្សោតថ្មីនេះជាកូនផ្សោតទីបីហើយ ដែលត្រូវបានអ្នកវិទ្យាសាស្ត្រកត់ត្រាថា ទុកនៅដើមឆ្នាំ២០២០ ។ នេះបើយោងតាមផេកអង្គការ WWF-កម្ពុជា ។
កាលពីដើមខែកុម្ភៈកន្លងទៅនេះផងដែរ ក្រុមការងារស្រាវជ្រាវ និងតាមដានសត្វផ្សោតទន្លេមេគង្គនៃរដ្ឋបាលជលផល ខណ្ឌរដ្ឋបាលជលផលខេត្តក្រចេះ និងស្ទឹងត្រែង និងអង្គការ WWF-កម្ពុជា បានចុះសិក្សា និងតាមដានចំនួនសត្វផ្សោតទន្លេមេគង្គ ដោយជិះទូក និងថតរូបសត្វផ្សោតទន្លេមេគង្គ ដើម្បីធ្វើការវិភាគអត្តសញ្ញាណរបស់សត្វផ្សោត ដែលរស់នៅតាមដងទន្លេមេគង្គ ចម្ងាយ១៩០ គ.ម ចាប់ពីទីរួមខេត្តក្រចេះ ទៅដល់ព្រំប្រទល់ឡាវក្នុងខេត្តស្ទឹងត្រែង ។ ខណៈពេលនោះក្រុមការងារក៏បានកត់ត្រាទុកនូវកំណើតកូនផ្សោតថ្មីចំនួនពីរក្បាលរួចហើយផងដែរ ៕
ចែករំលែកព័តមាននេះ