ខេត្តមណ្ឌលគិរី ៖ ជនសង្ស័យម្នាក់ដែលបានចូលទៅកាប់រានដីព្រៃក្នុងដែនជម្រកការពារសត្វព្រៃកែវសីមា ត្រូវបានមន្ត្រីជំនាញឃាត់ខ្លួន កាលពីរសៀលថ្ងៃទី២៥ ខែកុម្ភៈ ឆ្នាំ២០២០ ចំណុចភ្នំស្រទ្បៅ ស្ថិតនៅភូមិពូហ្យាម ឃុំសែនមនោរម្យ ស្រុកអូររាំង ។
ប្រធានមន្ទីរបរិស្ថានខេត្តមណ្ឌលគិរីបានឱ្យដឹងថា មន្ត្រីឧទ្យានុរក្សដែនជម្រកសត្វព្រៃកែវសីមា ចាប់ជនសង្ស័យចូលមកកាប់រានដីព្រៃយកជាកម្មសិទ្ធឈ្មោះ សុខ ជា ភេទប្រុស អាយុ២២ ឆ្នាំ ជនជាតិពូន រស់នៅភូមិពូត្រែង ឃុំដាក់ដាំ ស្រុកអូររាំង ខេត្តមណ្ឌលគិរី។ មន្ត្រីជំនាញដកហូតវត្ថុតាងរួមមាន រណាយន្ត១គ្រឿង និងកាំបិត១ដើម ។ បច្ចុប្បន្ន ជនសង្ស័យត្រូវបានបញ្ជូនមកមន្ទីរបរិស្ថានខេត្តមណ្ឌលគីរីដើម្បីកសាងសំណុំរឿងទៅតាមនីតិវីធីច្បាប់។
ជុំវិញការកាប់រានយកដីព្រៃយកធ្វើជាកម្មសិទ្ធិនេះ គេឃើញរដ្ឋបាលសាលាខេត្តមណ្ឌលគិរី បានចេញសេចក្ដីណែនាំនិងអំពាវនាវ ស្ដីអំពីច្បាប់កាប់រានយកដីព្រៃដែលជាដែនជម្រកសត្វព្រៃ ដោយខុសច្បាប់ ហើយក៏សូមឲ្យបងប្អូនប្រជាពលរដ្ឋ និងសហគមន៍ ព្រៃឈើចូលរួមការពារទាំងគ្នា គឺដើម្បីថែរក្សាជិវ:ចម្រុះ និងបរិស្ថានទេសចរ ប៉ុន្តែសកម្មភាពកាប់ព្រៃយកដីហាក់មិនមានភាពថមថយនោះទេ ៕ (កែសម្រួលដោយ ៖ ធីតា)
ចែករំលែកព័តមាននេះ