រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា ស្ត្រីម្នាក់មិនស្គាល់អត្តសញ្ញាណនោះទេ វ័យប្រហែល25ទៅ26ឆ្នាំ ត្រូវជនសង្ស័យចំនួន2នាក់ចាប់នារីរងគ្រោះបំពានសេពសន្ថវៈនៅក្នុងគុម្ពត្រែងក្បែរនឹងរង្វង់មូលនាងមច្ឆាបានសម្រេច ហើយត្រូវក្រុមសន្តិសុខឃើញស្តែងនឹងភ្នែក រួចឃាត់ខ្លួនបានម្នាក់ភ្លាមៗប្រគល់ឱ្យសមត្ថកិច្ចនាំយកទៅសួរនាំ ចំណែកម្នាក់ទៀតរត់គេចខ្លួន រីឯស្ត្រីរងគ្រោះសន្លប់ស្តូកស្តឹងតែម្តង បង្កឱ្យមានការភ្ញាក់ផ្អើលកាលពីម៉ោង2និង30នាទីរំលងអធ្រាត្រឈានចូលថ្ងៃទី26 ខែកុម្ភៈ ឆ្នាំ2020 ស្ថិតក្នុងសង្កាត់ជ្រោយចង្វារ ខណ្ឌជ្រោយចង្វារ ។
សេចក្តីរាយការណ៍បន្តថា ជនសង្ស័យដែលត្រូវចាប់ខ្លួនបានឈ្មោះ សុខ ពុធ ភេទប្រុស អាយុ26ឆ្នាំ ស្នាក់នៅបច្ចុប្បន្នមិនប្រាកដ មានស្រុកកំណើតនៅខេត្តព្រៃវែង ចំណែកជនសង្ស័យម្នាក់រត់គេចខ្លួនបាត់ មិនស្គាល់អត្តសញ្ញាណនោះទេ មុខរបរជាអ្នកលក់អំពៅ។ រីឯស្ត្រីរងគ្រោះអាយុប្រហែល២៥ទៅ២៦ឆ្នាំ។
បើតាមប្រភពពីក្រុមសន្តិសុខបានឱ្យដឹងថា មុនកើតហេតុ ខាងសន្តិសុខពួកគាត់នាំគ្នាយាមកាមតាមគោលដៅនីមួយៗ រួចហើយក៏ប្រទះឃើញនៅមាត់បឹងនៅក្បែរនឹងរង្វង់មូលនាងមច្ឆា ដោយឃើញជនសង្ស័យ២នាក់នាំស្ត្រីម្នាក់ដែលមិនស្គាល់អត្តសញ្ញាណនោះទេ យកចូលទៅគុម្ពត្រែង ហើយបំពានសេពសន្ថវៈរួមគ្នាទាំង2នាក់តែម្តង ដោយមិនដឹងថាបានប៉ុន្មានដងនោះទេ ទើបស្ត្រីរងគ្រោះសន្លប់ស្តូកស្តឹងនៅនឹងកន្លែងកើតហេតុ។
ប្រភពដដែលបញ្ជាក់ទៀតថា ភ្លាមៗនោះដែរ ក្រុមសន្តិសុខក៏នាំគ្នាទៅដល់ធ្វើការចាប់ឃាត់បានជនសង្ស័យម្នាក់ ចំណែកជនសង្ស័យម្នាក់ទៀតរត់គេចខ្លួនបាត់ ។ ហើយពេលដែលគាត់ទៅដល់ភ្លាមៗនោះ គឺរូបគាត់បានឃើញស្តែងៗផ្ទាល់នឹងភ្នែកតែម្តង ខណៈជនសង្ស័យកំពុងតែធ្វើសកម្មភាព។
ចំណែកឯជនសង្ស័យដែលឃាត់ខ្លួនបាននោះ បធិសេធថា ខ្លួនមិនបានធ្វើសកម្មភាពនោះទេ គឺម្នាក់ទៀតជាអ្នកលក់អំពៅជាអ្នកធ្វើ ហើយខ្លួនគ្រាន់តែជួយចាប់ដៃ និងចាប់ជើងនោះទេ។
ជនសង្ស័យខាងលើឱ្យដឹងទៀតថា មុនកើតហេតុ គឺខ្លួនបានចេញពីខេត្តព្រៃវែង មកដល់ភ្នំពេញរយៈពេល10ថ្ងៃ ដើម្បីរកការងារធ្វើ ហើយរាល់ថ្ងៃគឺជួយលក់ស្រា និងខ្ចៅស្ងោ លុះពេលមួយសន្ទុះក្រោយមក ក៏មានស្ត្រីម្នាក់ជាជនរងគ្រោះមិនដឹងថា គាត់ស្រវឹងមកពីណានោះទេ បានជាមកដល់កន្លែងកើតហេតុ ហើយផឹកស្រាបៀរអស់2កំប៉ុង រួចហើយក៏និយាយថា ចង់ដេកជាមួយគាត់ ទើបភ្លាមៗនោះដែរ ក៏កើតជារឿងបែបនេះតែម្តងទៅ ។
ក្រោយពេលកើតហេតុ រថយន្តសង្គ្រោះរបស់មន្ទីរពេទ្យកាល់ម៉ែត បានមកដឹកយកជនរងគ្រោះទៅព្យាបាលបាត់ទៅ ចំណែកឯជនសង្ស័យវិញ ត្រូវបានសមត្ថកិច្ចកសាងសំណុំរឿងបញ្ជូនខ្លួនទៅកាន់តុលាការ ដើម្បីចាត់ការទៅតាមនីតិវិធី ៕ (កែសម្រួលដោយ ៖ បុប្ផា)
ចែករំលែកព័តមាននេះ