នៅភ្នំពេញ ផ្នែកជំនឿសាសនាមានជិត៧០០ទីតាំង
- ភ្នំពេញ
រាជធានីភ្នំពេញ ៖ នៅរាជធានីភ្នំពេញ មានវត្តអារាម និងទីកន្លែងសក្ការៈរបស់សាសនានានា ៦៨៧ទីតាំង ។ វត្តមហានិកាយ១៤២វត្ត ,វត្តធម្មយុត្តិកនិកាយចំនួន៧វត្ត ,សាលាឆទាន១២កន្លែង…
រាជធានីភ្នំពេញ ៖ នៅរាជធានីភ្នំពេញ មានវត្តអារាម និងទីកន្លែងសក្ការៈរបស់សាសនានានា ៦៨៧ទីតាំង ។ វត្តមហានិកាយ១៤២វត្ត ,វត្តធម្មយុត្តិកនិកាយចំនួន៧វត្ត ,សាលាឆទាន១២កន្លែង…
រាជធានីភ្នំពេញ ៖ នៅរាជធានីភ្នំពេញ មានវត្តអារាម និងទីកន្លែងសក្ការៈរបស់សាសនានានា ៦៨៧ទីតាំង ។ វត្តមហានិកាយ១៤២វត្ត ,វត្តធម្មយុត្តិកនិកាយចំនួន៧វត្ត ,សាលាឆទាន១២កន្លែង ,អ៊ិស្លាមសាសនា១២វិហារ ,សុរ៉ាវ១៨ ,សាលាអង្គការ៥ និងសមាគម៩ ,គ្រឹស្ដសាសនាមានវិហារ១០៤ អង្គការ១៤ សមាគម៥៩, ទីស្នាក់ការថ្វាយបង្គំរបស់គ្រឹស្ដសាសនា១៨១ទីតាំង ,សាសនាមហាយានមានចំនួន៧១វិហារ ខុងបឹង១វិហារ គង់ស៊ីអ៊ីម១៣ វិហារ មឹឡឹក៥វិហារ អ៊ីក្វាន់តាវ២០វិហារ មហាធម្មមេត្រីជប៉ុន២វិហារ ,មហាយានវៀតណាមមាន១១វត្ត និងបាហៃមាន១វិហារ ។
យោងតាមរបាយការណ៍របស់រដ្ឋបាលរាជធានីភ្នំពេញឱ្យដឹងថា វត្តទូទាំងរាជធានីភ្នំពេញសរុបចំនួន១៤៩វត្ត ក្នុងនោះវត្តគណៈមហានិកាយ១៤២វត្ត និងវត្តគណៈធម្មយុត្តិចំនួន៧វត្ត សាលាឆទានមានចំនួន១២កន្លែង ព្រះសង្ឃសរុបចំនួន៨៥៣៥អង្គ ភិក្ខុ៣៤៣១អង្គ សាមណេរ៥១០៤អង្គ ក្នុងនោះព្រះសង្ឃសរុបខាងមហានិកាយ៨៤០៥អង្គ ភិក្ខុ៣៣៨៦អង្គ សាមណេរ៥០១៩អង្គ ។ ខាងធម្មយុត្តិសរុប១៣០អង្គ ភិក្ខុ៤៥អង្គ សាមណេរ៨៥អង្គ ។ គណៈកម្មការអាចារ្យវត្តមានចំនួន១៩៧៤នាក់ សីលវ័ន្ដសីលវតីចំនួន ១៣៤២នាក់ សិស្សនិស្សិតស្នាក់តាមវត្តដើម្បីបន្តការសិក្សាតាមគ្រឹះស្ថានសិក្សានានា ក្នុងរាជធានីភ្នំពេញមានចំនួន៣០៧៩នាក់ កើន៥៧៥នាក់ ។
សម្រាប់ពាហិរសាសនា អ៊ីស្លាមសាសនាមានចំនួន១២វិហារ សុរ៉ាវ១៨សាលា អង្គការ៥ និងសមាគម៩ បរិស័ទសរុបចំនួន៧២០៥ ប្រុស៧២០៥នាក់ ស្រី៣៣៩៧នាក់ បើធៀបនឹងប្រជាជនរាជធានីភ្នំពេញស្មើនឹង០.៤២% ។
រីឯគ្រឹស្ដសាសនាមានវិហារ១០៤ ទីស្នាក់ការថ្វាយបង្គំ១៨១ អង្គការ១៤ សមាគម៥៩ មាននិកាយចំនួន១០និកាយ បរិស័ទសរុប២១០៤៨នាក់ ស្រី១១២៦៥នាក់ ប្រុស៩៧៨៣នាក់។ បើធៀបនឹងប្រជាជនរាជធានីភ្នំពេញស្មើនឹង១.២៤% ។
ចំណែកសាសនាមហាយានមានចំនួន៧១វិហារ ខុងបឹង១វិហារ គង់ស៊ីអ៊ីម១៣វិហារ មឹឡឹក៥វិហារ អ៊ីក្វាន់តាវ២០វិហារ ។ មហាធម្មមេត្រីជប៉ុន២វិហារ បរិស័ទសរុប៤៨៧១នាក់ ប្រុស២០៩៧នាក់ ស្រី២៧៧៤នាក់ បើធៀបនឹងប្រជាជនក្នុងរាជធានីភ្នំពេញ ស្មើនឹង០.២៩% ។
សម្រាប់មហាយានវៀតណាមវិញ មាន១១វត្ត បរិស័ទសរុប១១១៤នាក់ ប្រុស៤៣០នាក់ ស្រី៦៨៤នាក់ បើធៀបនឹងប្រជាជនរាជធានីភ្នំពេញស្មើនឹង០.០៧% ។ កាវដាយមាន១វិហារ បរិស័ទសរុប១០០នាក់ ប្រុស៤០នាក់ ស្រី៦០នាក់ ស្មើនឹង០.០១% នៃប្រជាជនរាជធានីភ្នំពេញ ។ បាហៃមាន១វិហារ បរិស័ទសរុប២៧នាក់ ប្រុស១០នាក់ ស្រី១៧នាក់ ។ បើយើងសរុបរួមបរិស័ទ នៃពាហិរសាសនាទាំងអស់មានចំនួន៣៣២៥១នាក់ ប្រុស១៥៧៣៨នាក់ ស្រី១៧៥១៣នាក់ ស្មើនឹង១.៩៦% នៃប្រជាជនរាជធានីភ្នំពេញ ។
របាយការណ៍ដដែលឱ្យដឹងទៀតថា ក្នុងឆ្នាំ២០១៩នេះ ខាងពាហិរសាសនា បានធ្វើសកម្មភាពដូចជា៖ ការផ្សព្វផ្សាយគោលលទ្ធិ ភាគច្រើនបានប្រព្រឹត្តទៅនៅតាមទីតាំងរបស់គេ រីឯសកម្មភាពដែលបានធ្វើនៅតាមទីសាធារណៈមានចំនួនតិចជាងឆ្នាំមុន ។ ចំពោះការធ្វើសន្និបាត និងសន្និសិតជាទ្រង់ទ្រាយធំមានចំនួនតែ២លើកប៉ុណ្ណោះ ។ បានសុំបន្តអាណត្តិ តាមគោលការណ៍របស់ក្រសួងធម្មការ និងសាសនាចំនួន២៩ទីតាំង ផ្លាស់ប្ដូរទីតាំងចំនួន៨ទីតាំង ផ្លាស់ប្ដូរសមាសភាពអ្នកដឹកនាំ៧ទីតាំង។ សុំបើកទីតាំងថ្មីចំនួន៨ទីតាំង ។ ជាមួយនេះក្រសួងធម្មការ និងសាសនា បានផ្សព្វផ្សាយគោលការណ៍ច្បាប់បទដ្ឋានគតិយុត្តិនានា ដែលពាក់ព័ន្ធនិងពាហិរសាសនា ដល់អ្នកដឹកនាំទីតាំង ពាហិរសាសនាទាំងអស់ក្នុងរាជធានីភ្នំពេញ ចំនួន២៧៨នាក់ ។
ចំណែកមន្ទីរធម្មការនិងសាសនារាជធានីភ្នំពេញបានបន្តផ្សព្វផ្សាយនូវខ្លឹមសារ សំខាន់ៗមួយចំនួនដូចជា គោលនយោបាយរបស់រាជរដ្ឋាភិបាល និងច្បាប់របស់រដ្ឋដែលពាក់ព័ន្ធនឹងពាហិរសាសនា ។ ចលនាពង្រឹងនិងជម្រុញការការពារសន្ដិសភាព អនុវត្តគោលនយោបាយភូមិឃុំមានសុវត្ថិភាព ទប់ស្កាត់គ្រឿងញៀន ការអនុវត្តច្បាប់ចរាចរ និងបង្កើនធនធានខាងសាសនា សម្ដៅធានានិរន្តរភាព នៃសាសនា នីមួយៗ ដោយបានចលនាតាមបណ្ដាទីតាំងពាហិរសាសនា ក្នុងការចូលរួមពិសានំបញ្ចុកសាមគ្គី និងអំបុកថែជាតិ សាសនា ព្រះមហាក្សត្រ ផងដែរ ។
របាយការណ៍ដដែលបានបញ្ជាក់ថា សាសនាមួយចំនួននៅតែមានចំណុចអសកម្មកើតមានដូចជា៖ មានទីតាំងមួយចំនួនគ្មានច្បាប់អនុញ្ញាត ប៉ុន្តែនៅតែបន្តធ្វើសកម្មភាព ទីតាំងមួយចំនួននៅតែមិនទាន់បង្កលក្ខណៈងាយស្រួលក្នុងការទាក់ទង ផ្ដល់ផលលំបាកក្នុងការគ្រប់គ្រង ។
អ្នកគ្រប់គ្រងពាហិរសាសនា ភាគច្រើននៅតែមិនទាន់យល់ដឹងផ្នែករដ្ឋបាលទូទៅ ពោលគឺពេលរៀបចំលិខិតស្នាម ផ្សេងៗ នៅមានភាពខ្វះចន្លោះច្រើន ។ ការរួមចំណែកលើការងារសង្គម ហាក់មានការថយចុះច្រើន បើធៀបនឹងឆ្នាំ មុនៗ ។ ខាងព្រះពុទ្ធសាសនា បានជំរុញការគោរពប្រតិបត្តិធម៌ វិន័យ និងសកម្មក្នុងការទប់ស្កាត់ភាពអសកម្មទាំងឡាយ ដោយជំរុញការអនុវត្តខ្លឹមសារអាទិភាព៤ចំណុច តាមស្មារតីអង្គប្រជុំមន្ត្រីសង្ឃក្នុងរាជធានីភ្នំពេញ ។ សកម្មក្នុងការកសាងសំណង់នានា សម្រាប់វត្ត នីមួយៗ ទទួលលទ្ធផលលើសឆ្នាំមុនទ្វេដង ។
ចំពោះបាតុភាព ផ្សេងៗដែលកើតមានក្នុងព្រះពុទ្ធសាសនា នៅវត្តច្បារអំពៅចៅអធិការវត្ត ហោ សុខុន បានធ្វើសកម្ម ផ្សេងៗ ប្រាសចាកពីវិន័យព្រះពុទ្ធសាសនានិងបំពេញតួនាទីក្នុងនាមជាចៅអធិការវត្តមិនបានត្រឹមត្រូវ គណៈសង្ឃនាយកសម្រេចឱ្យលាចាកសិក្ខាបទ ។
ការបិណ្ឌបាត្រនៅតាមទីដែលហាមឃាត់នៅតែកើតមាន ទោះបីស្ថាប័នសង្ឃបានដាក់ចេញនូវបញ្ញត្តិ ផ្សេងៗ ជាបន្តបន្ទាប់ក្ដី ។ ការរៃអង្កាសយកព្រះពុទ្ធសាសនាធ្វើជាខែលក្នុងមួយឆ្នាំនេះ កើតមានចំនួន២១៦ករណី តែរយៈពេល២ខែចុងក្រោយ ហាក់មានការថយចុះច្រើនទៅវិញ ។ ជនក្លែងបន្លំជាបព្វជិត ធ្វើសកម្មភាព ផ្សេងៗ ប៉ះពាល់តម្លៃព្រះពុទ្ធសាសនា និងសង្គម មាន៦ករណី តែរយៈពេល២ខែចុងក្រោយ សកម្មភាពនេះបាត់ទាំងស្រុង ។
បានតែងតាំងគណៈកម្មការអាចារ្យដែលផុតអាណត្តិ បានតែងតាំងគណៈកម្មការអាចារ្យវត្តដែលផុតអាណត្តិចំនួន២១វត្ត មានសមាសភាពសរុបចំនួន២៨៤រូប ។ បានចេញលិខិតអនុញ្ញាតបំបួសកុលបុត្រសរុបចំនួន២៧៤រូប កើនលើសឆ្នាំមុនចំនួន៩៧រូប ។ ខាងពាហិរសាសនា ក្នុងឆ្នាំនេះមានការប្រែប្រួលច្រើនក្នុងការអនុវត្តច្បាប់រដ្ឋ ដោយបានអនុវត្តកាន់តែល្អ ។
ការធ្វើសកម្មភាពផ្សព្វផ្សាយភាគច្រើនទៅតាមទីតាំងផ្ទាល់ជារូបភាព តូចៗ ឯការផ្សព្វផ្សាយជាទ្រង់ទ្រាយធំ ហាក់មានតិចតួច ។ បានយកចិត្តទុកដាក់ល្អជាងឆ្នាំមុនក្នុងការចូលរួមក្នុងការការពារសន្ដិសុខ សណ្ដាប់ធ្នាប់ និងការអំពាវនា ផ្សេងៗ របស់ប្រមុខរាជរដ្ឋាភិបាល ៕ (កែសម្រួលដោយ ៖ បុប្ផា)
ចែករំលែកព័តមាននេះ