រាជធានីភ្នំពេញ ៖ ដើម្បីអនុវត្តច្បាប់ឲ្យមានប្រសិទ្ធភាព និងការបន្ថយគ្រោះថ្នាក់ចរាចរណ៍សម្តេចក្រឡា ហោម សខេង ឧបនាយករដ្ឋមន្ត្រីបានប្រកាសធានាការពារមន្ត្រីប៉ូលិសចរាចរណ៍ដែលចាប់មន្ត្រីថ្នាក់ធំៗជាងខ្លួនដែលមិនគោរពច្បាប់ចរាចរណ៍ ។ ថ្លែងក្នុងក្នុងពិធីសម្ពោធដាក់ឲ្យប្រើប្រាស់ជាផ្លូវការ អគារសិក្សាទីចាត់ការ អគាររដ្ឋបាលឃុំ និងសមិទ្ធផលនានា នៅក្នុងស្រុកកំចាយមារ ខេត្តព្រៃវែង នាព្រឹកថ្ងៃទី២៥ ខែកុម្ភៈនេះថា៖« ខ្ញុំ និងសម្តេចតេជោបានកំណត់ហើយ ការណាខុសច្បាប់ គឺផ្តន្ទាទោស ហើយបើមិនចង់ផ្តន្ទាទោស គឺគោរពច្បាប់ ហើយគោរពច្បាប់ គឺដើម្បីជីវិតរបស់គាត់ ។
ឥឡូវម៉ូតូបើកអត់ពាក់មួក ពេលមុនមកខ្ញុំចេញវិធានការអប់រំ ដោយចាប់ទាំងម៉ូតូ និងមនុស្ស ដើម្បីឲ្យនៅជាមួយប៉ូលិសដល់ពេលយកមួកមកទើបឲ្យទៅ ។ ប៉ុន្តែលើកនេះយើងនឹងពិចារណា បើគាត់ជិះម៉ូតូ ហើយមិនពាក់មួក យើងអនុវត្តវិធានការដូចមុនដដែល ដោយឃាត់ទាំងមនុស្ស និងម៉ូតូនៅដដែលដោយឲ្យយកមួកមកទើបទៅឲ្យទៅ ប៉ុន្តែពេលក្រោយនេះឲ្យទៅដូចមុន តែបង់ផាកពិន័យសិន» ។
សម្តេចគូសបញ្ជាក់ថា ៖«រដ្ឋមិនចង់បានលុយនេះទេ ប៉ុន្តែចង់កាពារអាយុជីវិតប្រជាជន បើលោកឯងមិនចង់ឲ្យគេផាកពិន័យលោកឯងគោរពច្បាប់មិនខាតដំណើរត្រូវពាក់មួក ។ អីញ្ចឹងយើងសុំដូរឡើងវិញពីមុនយកការអប់រំសំខាន់ ប៉ុន្តែពេលនេះយកការអប់រំមកដាក់បន្ទាប់ ហើយការអនុវត្តច្បាប់មុនគេវិញ» ។ សម្តេចស ខេង បានលើកឡើងថា ក្នុងនាមជាប្រធានគណៈកម្មាធិការជាតិសុវត្ថិភាពចរាចរណ៍គោកសម្តេច សម្រេចបែបនេះហើយ នឹងមានការពិភាក្សាគ្នារហូតឈានដល់វិសោធនកម្មអនុក្រឹត្យបន្ទាប់សិក្សាវិសោនធកម្មច្បាប់ចរាចរណ៍ផ្លូវគោកផងដែរ ។
សម្តេចស ខេង បានគូសលើកឡើងទៀតថា៖«យើងយកការអនុវត្តច្បាប់សំខាន់ បន្ទាប់មកយើងយកការអប់រំ ។ ការអប់រំកន្លងមកប្រើកំលាំងច្រើនតែមិនមានប្រសិទ្ធភាពនោះទេ ដូច្នេះមានតែយកការអនុវត្តន៍ច្បាប់ជាធំវិញ »។ សម្តេចក្រឡាហោម សខេង បានគូសបញ្ជាក់ទៀតថា ច្បាប់ធ្វើឡើងសម្រាប់មនុស្សគ្រប់គ្នាមិនមែនសម្រាប់អ្នកណាម្នាក់មិនមែនសម្រាប់ក្មេង ចាស់ ប្រុស ស្រី អ្នកតូច អ្នកធំនោះ ទេ គឺប្រជាជនទាំងអស់នៅក្រោមច្បាប់ ។
សម្តេចបញ្ជាក់ថា ៖«ទាំងអស់គ្នាស្មើភាពចំពោះមុខច្បាប់ អត់មានលើកលែងអ្នកណាទេ ឲ្យតែខុសច្បាប់ ។ អ្នកខ្លះថា ទេ! ប៉ូលិសចរាចរណ៍ស័ក្តិ១ ដល់ចាប់ឧត្តមសេនីយ៍ប៉ូលិសពាក់ផ្កាយ៣ ចាប់ឧត្តមសេនីយ៍យោធា ពាក់ផ្កាយ៣ អត់ត្រូវទេធ្វើអីចឹង ។ ខ្ញុំសួរតើ ធ្វើម៉េចបានត្រូវ ? តែច្បាប់ចែងថា មនុស្សមានសិទ្ធិ ស្មើគ្នាចំពោះមុខច្បាប់ ទោះបីអ្នកឯងផ្កាយ៤ ក៏ដោយបើកឡានបុកគេ ប៉ូលិសផ្កាយមួយ ឬស័ក្តិមួយ ឬក៏ពលបាលត្រីទេ ក៏ចាប់បានដែរ ព្រោះមានសិទ្ធិភាពចំពោះមុខច្បាប់ ។
សម្តេចក៏បានលើកឡើងថា ទោះបីជាមានស័ក្តិ ឬតួនាទីជាអ្នកតំណាងរាស្ត្រ ដែលធ្វើច្បាប់យ៉ាងណាក្តីបើមិនគោរពច្បាប់ឲ្យអនុវត្តក៏ត្រូវអនុវត្តច្បាប់ដែរ និងតួនាទីរដ្ឋមន្ត្រី បើមិនគោរពច្បាប់ក៏ខុស ផ្កាយ៤ក៏ដោយ បើធ្វើខុសច្បាប់ គឺខុស» ។ សម្តេច ស ខេង បញ្ជាក់ថា ៖«អីញ្ចឹងសុំឲ្យអស់លោកប៉ូលិសធ្វើទៅ ហើយមានអីឆ្លើយដាក់ខ្ញុំមក ខ្ញុំការពារ អីញ្ចឹងអត់ហ៊ានធ្វើទេ គ្រាន់តែដោះមួកមករួចខ្លួននោះ ! រឿងនឹងអត់ទេ គឺអ្នកណាក៏ដោយត្រូវតែអនុវត្តច្បាប់» ៕
ចែករំលែកព័តមាននេះ