ខេត្តមណ្ឌលគិរី ៖ បើតាមសេចក្តីរាយការណ៍បានឱ្យដឹងថា នេះជារឿងពិតមួយដែលបានកើតឡើងកាលពីជិត១០០ឆ្នាំមុន បណ្តាលឲ្យមានចម្ងល់មកទល់នឹងបច្ចុប្បន្ន ហើយប្រែក្លាយទីតាំងភូមិជនជាតិដើមភាគតិចឈ្មោះ «ក្រង់» ទៅជាតំបន់ប្រវត្តិសាស្ត្រគួរឲ្យចាប់អារម្មណ៍ទៀតផង។ ជុំវិញដំណើររឿងនេះ មន្ទីរបរិស្ថានខេត្តមណ្ឌលគិរី…
ខេត្តមណ្ឌលគិរី ៖ បើតាមសេចក្តីរាយការណ៍បានឱ្យដឹងថា នេះជារឿងពិតមួយដែលបានកើតឡើងកាលពីជិត១០០ឆ្នាំមុន បណ្តាលឲ្យមានចម្ងល់មកទល់នឹងបច្ចុប្បន្ន ហើយប្រែក្លាយទីតាំងភូមិជនជាតិដើមភាគតិចឈ្មោះ «ក្រង់» ទៅជាតំបន់ប្រវត្តិសាស្ត្រគួរឲ្យចាប់អារម្មណ៍ទៀតផង។
ជុំវិញដំណើររឿងនេះ មន្ទីរបរិស្ថានខេត្តមណ្ឌលគិរី កាលពីព្រឹកថ្ងៃទី២៥ ខែកុម្ភៈ ឆ្នាំ២០២០ បានឲ្យដឹងថា លោក កែវ សុភគ៌ ប្រធានមន្ទីរបរិស្ថានខេត្ត រួមទាំងក្រុមការងារដែនជម្រកសត្វព្រៃកែវសីមា បានចុះល្បាតក្នុងភូមិសាស្ត្រដែនជម្រកសត្វព្រៃកែវសីមា ហើយបានចូលទៅពិនិត្យទីតាំងប្រវត្តិសាស្ត្រមួយកន្លែង ដែលមានអាយុកាលប្រមាណជិត១សតវត្សរ៍នោះ គឺផ្នូរសពជនជាតិបារាំងម្នាក់ដែលបានបាត់បង់ជីវិតក្នុងសម័យដែលប្រទេសកម្ពុជាស្ថិតក្រោមអាណានិគមនិយមបារាំង។
បច្ចុប្បន្នផ្នូរសពជនជាតិបារាំងម្នាក់នេះ ត្រូវបានអ្នកជំនាន់មុនរៀបចំជាស្មសាន ដោយមានចម្លាក់ចារឹកនៅលើផ្ទាំងថ្មជាភាសាបារាំង អំពីប្រវត្តិនៃសិលានេះ។ ផ្នូរសពនេះ ត្រូវបញ្ចុះនៅក្នុងព្រៃមួយកន្លែង ស្ថិតក្នុងភូមិហ្គាទី ឃុំស្រែព្រះ ស្រុកកែវសីមា ខេត្តមណ្ឌលគិរី ក្នុងដែនជម្រកសត្វព្រៃកែវសីមា និងមានចម្ងាយប្រមាណជាង២០គីឡូម៉ែត្រ ពីឃុំស្រែព្រះ ដែលសម្បូរទៅដោយបងប្អូនជនជាតិដើមភាគតិចព្នងរស់នៅ។
តាមការជួបសម្ភាសន៍ និងសាកសួរអំពីប្រវត្តិសាវតាផ្នូរសពពីអ្នកភូមិ និងចាស់ទុំ ដែលជាជនជាតិភាគតិចព្នង បានឲ្យដឹងថា ភូមិហ្គាទី កាលពីមុនមានឈ្មោះហៅថា ភូមិក្រង់ ស្ថិតក្នុងឃុំស្រែព្រះ ស្រុកកែវសីមា។ នៅក្នុងអំឡុងឆ្នាំ១៩៣១ មានមេទ័ពជាជនជាតិបារាំងឈ្មោះ ហ្គាទី (Gatille) បានបាត់បង់ជីវិតដោយសារកាំបិតរបស់បងប្អូនជនជាតិដើមភាគតិចដែលរស់នៅតំបន់នោះ ហើយទាហានឈ្មោះ ហ្គាទី នេះ ក៏ជាមេទ័ពធំម្នាក់ប្រចាំភូមិភាគឦសាន ទើបជាប់ឈ្មោះហ្គាទី ជាភូមិជំនួសឲ្យឈ្មោះភូមិក្រង់វិញ។
ផ្នូរសពរបស់ជនជាតិបារាំង ដែលមានឈ្មោះដូចគ្នាទៅនឹងឈ្មោះភូមិហ្គាទី បានក្លាយជាមន្ទិលមួយរបស់អ្នកចំណូលថ្មី និងអ្នកដំណើរដែលបានឆ្លងកាត់ ហើយពួកគេបានស្វែងរកការបកស្រាយថា ឈ្មោះភូមិ និងឈ្មោះសពក្នុងផ្នូរ មានអ្វីទាក់ទងគ្នា។ យ៉ាងណាមិញ មន្ទីរបរិស្ថានខេត្តមណ្ឌលគិរី មិនទាន់មានឯកសារណាមួយយកមកបង្ហាញជាទឡ្ហីករណ៍នៅឡើយទេ ដោយនឹងស្វែងរក និងស្រាវជ្រាវបន្ថែមទៀត៕ (កែសម្រួលដោយ ៖ បុប្ផា)
ចែករំលែកព័តមាននេះ