រាជធានីភ្នំពេញ ៖ អាចថា «ស្លឹកឈើជ្រុះ មិនឆ្ងាយពីគល់» ពេលនេះ អ្នកណាក៏ចាប់អារម្មណ៍ ស្រាប់តែឃើញកូនស្រីបណ្តូលចិត្តរបស់អ្នកនាង យុគ ចិន្តា…
រាជធានីភ្នំពេញ ៖ អាចថា «ស្លឹកឈើជ្រុះ មិនឆ្ងាយពីគល់» ពេលនេះ អ្នកណាក៏ចាប់អារម្មណ៍ ស្រាប់តែឃើញកូនស្រីបណ្តូលចិត្តរបស់អ្នកនាង យុគ ចិន្តា ផ្ចង់អារម្មណ៍ការងារ ជាពិធីការិនី។ កូនស្រីរូបនោះ បានផ្តល់តួនាទីដំណើរការកម្មវិធីប្រគំតន្ត្រីមួយរបស់សាលាស្រណោះតន្ត្រី។ មាតាបិតា សិស្ស ដែលបានចូលរួមទស្សនាចាប់អារម្មណ៍គ្រប់គ្នា ។
ពិសេសអ្នកម្តាយ យុគ ចិន្តា ញញឹមបិទមាត់មិនជិតនោះទេ ពេលឃើញកូនស្ងួនគោរពឱវាទតាមបែបនេះ។ កូនស្រីអ្នកនាង យុគ ចិន្តា កំពុងរៀននៅថ្នាក់វិទ្យាល័យមួយ នាក្រុងភ្នំពេញ នៅសល់៣ឆ្នាំទៀតបញ្ចប់បាក់ឌុប។ ក្រោយពេលរៀនចប់ លេចឭថា អ្នកនាងយុគ ចិន្តា និងបញ្ជូនកូនស្រី យុគ ដាពេជ្រ ទៅសិក្សានៅក្រៅប្រទេស។
ដាពេជ្រ ក្រៅពីមានសម្រស់ស្អាត រាងខ្ពស់ល្អ ចេះជំនាញច្រើនខាងផ្នែកសិល្បៈ ដូចជាច្រៀងជាមួយតន្ត្រីព្យាណូ ចេះរាំរបាំបុរាណខ្មែរជិត១០របាំ ហើយ៦ខែចុងក្រោយកំពុងហាត់រៀនហ្គីតា។ ថ្មីៗនេះ ក៏បានបន្ថែមផ្នែកពិធីការិនីមួយទៀត ចំកន្លែងដែលម្តាយមានបទពិសោធន៍។
យុគ ចិន្តា បានឱ្យដឹងថា ក្រៅពីចេះជំនាញសិល្បៈខាងលើ អ្នកនាងភ្ញាក់ផ្អើលពេលឃើញកូនស្រី ស្រាប់តែគ្រូចាត់តាំងឱ្យធ្វើជាពិធីការិនីប្រគំតន្ត្រីមួយ។ កន្លងមក អត់ដែលដឹងថា កូនចង់ផ្នែកនេះទេ ដឹងតែច្រៀង និងលេងហ្គីតា។ លុះពេលឃើញបែបនេះ ក៏ជួយបង្ហាញគន្លឹះខ្លះៗ ដើម្បីដំណើរការឱ្យរលូន។
យ៉ាងណាមិញ អ្នកនាង យុគ ចិន្តា នៅតែយល់ថា កូនស្រីមិនទាន់និយាយបានកម្រិតប្រសើរ ទាល់តែខំហ្វឹកហាត់បន្តទៀត ព្រោះស្តាប់ទម្ងន់សំឡេងគឺមានដុង ទាល់តែមានការបង្ហាញថែមទើបទៅមុខបាន។ ប្រសិនបើកូនចង់ផ្នែកនេះនឹងជម្រុញ ព្រោះថា អាជីពនេះបង្ហាញភាពថ្លៃថ្នូរ ណាមួយក្រៅពីភាសាជាតិ ដាពេជ្រ ចេះស្ទាត់ជំនាញខាងភាសាអង់គ្លេស។ កូនស្រីរូបនេះចូលចិត្តសិល្បៈ ឆាប់ចាប់បានណាស់ប្រាប់យល់ ធ្វើបាន។ ចំពោះចិត្តជាម្តាយចង់ឱ្យរកស៊ីបើកមុខរបរវិញច្រើនជាង តែបើចិត្តគេទៅខាងហ្នឹងមានតែជម្រុញ។
ចំណែកកូនស្រី យុគ ចិន្តា បាននិយាយថា ពិធីការិនីពិតជាពិបាក ហើយខ្លួនយល់ថា ហ្នឹងធ្វើឱ្យបាន។ អ្នកម៉ាក់ប្រាប់ថា បើស្រឡាញ់អ្វី ត្រូវជំនះធ្វើឱ្យបាន កុំឆាប់ចុះចាញ់ប្រឹងឱ្យអស់លទ្ធភាព។ ធ្វើជាកូនស្រីត្រូវចេះទន់ភ្លន់ សុភាពរាបសា។ ម្ល៉ោះហើយពេលអ្នកម៉ាក់ឃើញនាងចេះរាំរបាំ ចេះច្រៀង គាត់ប្រាប់ថា ត្រូវបង្ហាញអ្វីដែលជាវប្បធម៌ខ្មែរ អត្តសញ្ញាណខ្មែរឱ្យបរទេសបានស្គាល់។
មានមួយចំណុចទៀតគាត់ផ្តាំថា ប្រសិនបើទៅរៀននៅក្រៅប្រទេស បើមានគេចង់ហាត់រាំរបាំខ្មែរកូនត្រូវបង្រៀនគេទៅ ដើម្បីឱ្យគេស្គាល់ជាតិយើង ។ ក្នុងនាមនាងជាកូនខ្មែរ និងធ្វើអ្វីដែលល្អ ជួយផ្សព្វផ្សាយវប្បធម៌ដូចបណ្តាំអ្នកម៉ាក់ប្រាប់ឱ្យល្អបំផុត។ (កែសម្រួលដោយ ៖ បុប្ផា)
ចែករំលែកព័តមាននេះ