ជប៉ុន ៖ ក្រុមហ៊ុនទូរស័ព្ទដៃជប៉ុន Tone Mobile ទទួលបានការចាប់អារម្មណ៍យ៉ាងខ្លាំង ចាប់តាំងពីវាបានដាក់ចេញនូវម៉ូដែល Tone e20 ដែលជាស្មាតហ្វូនដំបូងបង្អស់របស់ពិភពលោក…
ជប៉ុន ៖ ក្រុមហ៊ុនទូរស័ព្ទដៃជប៉ុន Tone Mobile ទទួលបានការចាប់អារម្មណ៍យ៉ាងខ្លាំង ចាប់តាំងពីវាបានដាក់ចេញនូវម៉ូដែល Tone e20 ដែលជាស្មាតហ្វូនដំបូងបង្អស់របស់ពិភពលោក ដែលរារាំងអ្នកប្រើប្រាស់មិនឱ្យថតរូបអាសអាភាស(អាក្រាត)។
ទូរស័ព្ទ Tone e20 មិនមែនជាទូរស័ព្ទដែលមានភាពទាក់ទាញទេ ហើយ Spec របស់វាក៏មិនគួរឱ្យចាប់អារម្មណ៍ដែរ។ ប៉ុន្តែវាធ្វើរឿងមួយ ដែលមិនមានទូរស័ព្ទផ្សេងទៀតបានធ្វើដោយវាប្រើបញ្ញាសិប្បនិម្មិត AI ដើម្បីការពារអ្នកប្រើប្រាស់មិនឱ្យថតរូបអាក្រាតរបស់ពួកគេ ឬអ្នកណាម្នាក់ផ្សេងទៀត។ ផ្តោតសំខាន់លើឪពុកម្តាយដែលចង់ឱ្យទូរស័ព្ទទៅកូនៗប្រើប្រាស់។
មុខងារចម្បងរបស់ទូរស័ព្ទថ្មីត្រូវបានគេហៅថា «Smartphone Protection» ដែលវានឹងដឹងភ្លាមៗរាល់ពេលអ្នកប្រើប្រាស់យកទូរស័ព្ទទៅថតរូបអាសអាភាស។ ពេលដែលទូរស័ព្ទដឹងថា រូបដែលអ្នកថតជារូបអាសអាភាស វានឹងមិនអនុញ្ញាតឱ្យអ្នករក្សាទុកវានៅក្នុងអង្គចងចាំឡើយ។
ក្រៅពីប្រព័ន្ធការពាររូបភាពអាក្រាតរបស់ខ្លួនទូរស័ព្ទ Tone e20 គឺជាទូរស័ព្ទប្រភេទធូរថ្លៃ (Budget Phone)។ វាមានអេក្រង់ទំហំ ៦.២អ៊ីញប្រភេទ HD + IPS LCD ជាមួយនឹង RAM ទំហំ ៤ជីហ្កាប៊ីត និងមានអង្គផ្ទុកទិន្នន័យ៦៤ជីហ្កាប៊ីត កាមេរ៉ាខាងក្រោយមាន ៣គ្រាប់ និងមានកាមេរ៉ា Selfie ទំហំ ៨មេហ្គាភិចស៊ែល។ វាត្រូវបានលក់ក្នុងតម្លៃ ១៨០ដុល្លារ ហើយបច្ចុប្បន្នមានលក់តែនៅប្រទេសជប៉ុន
ប៉ុណ្ណោះ៕
ចែករំលែកព័តមាននេះ