រាជធានីភ្នំពេញ ៖ យុវជនម្នាក់បាត់បង់ជីវិតភ្លាមៗនៅកន្លែងកើតហេតុ និង២នាក់ទៀតរងរបួសធ្ងន់ត្រូវបានរថយន្តឯកជនដឹកយកទៅសង្គ្រោះ បន្ទាប់ពីជនរងគ្រោះទាំង៣នាក់ជិះម៉ូតូមួយគ្រឿងសង្ស័យគេចពីគេដេញតាម ស្រាប់តែទៅបុកពីក្រោយរថយន្តមួយគ្រឿង បណ្តាលឱ្យមានអ្នកបាត់បង់ជីវិត និងរងរបួសធ្ងន់ ។
ហេតុការណ៍ខាងលើនេះបង្កឲ្យមានការភ្ញាក់ផ្អើលកាលពីវេលាម៉ោង១និង១០នាទីរំលងអធ្រាត្រឈានចូលថ្ងៃទី២៥ខែ កុម្ភៈ ឆ្នាំ២០២០ នៅចំណុចស្តុប២០០៤ តាមបណ្តោយផ្លូវសហព័ន្ធរុស្ស៊ី ស្ថិតក្នុងភូមិតាងួន សង្កាត់កាកាបទី១ ខណ្ឌពោធិ៍សែនជ័យ ។
ជនរងគ្រោះទាំង៣នាក់ខាងលើរួមមាន ឈ្មោះ ភា សម្ភស្ស ភេទប្រុស អាយុ ១៨ឆ្នាំ មុខរបរជាងជួសជុលរថយន្ត រស់នៅភូមិព្រៃជីសាក់ សង្កាត់ចោមចៅទី៣ ខណ្ឌពោធិ៍សែនជ័យ បានបាត់បង់ជីវិត ចំណែកបុរស២នាក់ដែលរងរបួសធ្ងន់មិនស្គាល់អត្តសញ្ញាណនោះទេ ។ ជនរងគ្រោះទាំង៣នាក់ជិះម៉ូតូមួយគ្រឿងម៉ាកហុងដាប៊ីត ពណ៌ក្រហមលាយស ពាក់ស្លាកលេខ ភ្នំពេញ ១GR-៣០៨០ ។
តាមប្រភពព័ត៌មានពីប្រជាពលរដ្ឋនៅកន្លែងកើតហេតុបាននិយាយថា មុនពេលកើតហេតុ គេឃើញជនរងគ្រោះទាំង៣នាក់ជិះម៉ូតូមួយគ្រឿងក្នុងល្បឿនយ៉ាងលឿន និងឃើញម៉ូតូផ្សេងទៀតដេញពីក្រោយម៉ូតូរបស់ជនរងគ្រោះ លុះពេលជិះឆ្លងស្តុបដោយមិនបានមើលរថយន្តម៉ាកឡិចស៊ីសមួយគ្រឿងកំពុងឈប់ចតនៅតាមចិញ្ចើមផ្លូវ ស្រាប់តែជនរងគ្រោះបើកទៅបុករថយន្តពីក្រោយយ៉ាងពេញទំហឹង បណ្តាលឲ្យជនរងគ្រោះម្នាក់បាត់បង់ជីវិតភ្លាមៗនៅកន្លែង និងជនរងគ្រោះ២នាក់ទៀតរងរបួសយ៉ាងធ្ងន់ធ្ងរត្រូវបានរថយន្តឯកជនដឹកយកទៅសង្គ្រោះភ្លាមៗផងដែរ ។
តាមប្រភពព័ត៌មានពីបុរស២នាក់ត្រូវជាមិត្តភក្តិរបស់ជនរងគ្រោះដែលជិះម៉ូតូមួយគ្រឿងផ្សេងទៀតបានឱ្យដឹងថា ពួកគាត់នាំគ្នាមកពីដើរលេងនៅម្តុំវត្តបទុម និងបានធ្វើដំណើរមកផ្ទះវិញ ដោយជនរងគ្រោះទាំង៣នាក់ខាងលើជិះម៉ូតូមួយគ្រឿងម៉ាកហុងដាប៊ីត ចំណែកពួកគាត់ទាំង២នាក់ជិះម៉ូតូមួយគ្រឿងផ្សេងទៀតម៉ាកស្គូពី បន្ទាប់មកពួកគាត់ជិះម៉ូតូមកផ្ទះមុន ស្រាប់តែមានអ្នកឃើញហេតុការណ៍ទូរស័ព្ទប្រាប់ថា មិត្តភ័ក្ដិរបស់ពួកគាត់ជួបគ្រោះថ្នាក់ចរាចរណ៍ បណ្តាលឱ្យបាត់បង់ជីវិតម្នាក់បាត់ទៅហើយ ទើបពួកគាត់មកកន្លែងកើតហេតុភ្លាមៗផងដែរ ។
ក្រោយពេលកើតហេតុ សមត្ថកិច្ចនគរបាលចរាចរណ៍រាជធានីភ្នំពេញធ្វើលិខិតប្រគល់ជនរងគ្រោះម្នាក់ដែលបាត់បង់ជីវិតអោយទៅក្រុមគ្រួសារដើម្បីយកទៅធ្វើបុណ្យតាមប្រពៃណី ចំណែកម៉ូតូត្រូវបានមន្ត្រីជំនាញយកទៅរក្សាទុករង់ចាំ និងប្រគល់ឱ្យក្រុមគ្រួសារវិញ ៕ (កែសម្រួលដោយ ៖ ធីតា)
ចែករំលែកព័តមាននេះ