ចិន ៖ ប្រទេសចិនបានហាមឃាត់ប្រជាជនមិនឱ្យលក់ទិញ និងបរិភោគសត្វព្រៃចំពេលមានការផ្ទុះឡើងនៃវីរុស COVID-19 ដែលជាប់ទាក់ទងនឹងទីផ្សារលក់ដុំសាច់សត្វព្រៃនៅកណ្តាលទីក្រុង Wuhan ខេត្ត Hubei ។
គណៈកម្មាធិការសម្រេចចិត្តខ្ពស់បំផុតរបស់ប្រទេស គឺគណៈកម្មាធិការអចិន្ត្រៃយ៍នៃសភាតំណាងប្រជា
ជនជាតិបានគាំទ្រសំណើមួយកាលពីថ្ងៃច័ន្ទ ដែលថា «ហាមឃាត់ការធ្វើពាណិជ្ជកម្មសត្វព្រៃខុសច្បាប់លុបចោលទំលាប់អាក្រក់នៃការបរិភោគសត្វព្រៃហួសកំរិត និងការពារអាយុជីវិតនិងសុខភាពរបស់ប្រជាជន»។ នេះបើតាមអ្វីដែលទីភ្នាក់ងារសារព័ត៌មាន AFP បានដកស្រង់សំដីរបស់សារព័ត៌មានរដ្ឋ។ ការហាមឃាត់នេះ មានចំណាត់ការភ្លាមៗពីពេលនេះតទៅ ។
គណៈកម្មាធិការនេះ បានធ្វើការសម្រេចចិត្តជំនួសឱ្យច្បាប់ចុងក្រោយ ដែលត្រូវបានអនុម័ត បន្ទាប់ពីវាត្រូវបានប្រកាសកាលពីថ្ងៃច័ន្ទថា ការប្រជុំសភាប្រចាំឆ្នាំនៃសភាប្រជាជនជាតិនឹងត្រូវបានពន្យារពេលដោយសារតែការផ្ទុះជម្ងឺកូរ៉ូណាថ្មី។
នៅប្រទេសចិនសត្វព្រៃត្រូវបានប្រើសម្រាប់ម្ហូបអាហារឱសថបុរាណនិងរោមសត្វ។ លោក Li Shuo ទីប្រឹក្សាគោលនយោបាយជាន់ខ្ពស់សកលនៃអង្គការបរិស្ថាន Greenpeace នៅទីក្រុងប៉េកាំងបានប្រាប់ទីភ្នាក់ងារព័ត៌មាន Bloomberg ថា ការបញ្ឈប់ប្រជាជនមិនឱ្យធ្វើពាណិជ្ជកម្មនិងប្រើប្រាស់ផលិតផលបែបនេះ នឹងមានបញ្ហាប្រឈមមួយផ្នែក ដោយសារតែភាពស្មុគស្មាញក្នុងការកំណត់អ្វីដែលបង្កើតជាសត្វព្រៃនិងការសម្រេចថាតើថ្នាំចិនគួរតែរងផលប៉ះពាល់ឬអត់។
ភាគច្រើននៃមនុស្សដំបូងដែលធ្លាក់ខ្លួនឈឺ នៅខែធ្នូ ឆ្នាំ២០១៩ ត្រូវបានប៉ះពាល់នឹងសត្វព្រៃនៅផ្សារលក់ដុំអាហារសមុទ្រហួណានដែលមានសត្វជាច្រើនរួមមាន បសុបក្សី ពស់ និងសត្វប្រចៀវ ។ គេនៅមិនទាន់ដឹងថា វីរុសនោះមានប្រភពមកពីណានៅឡើយទេ ប៉ុន្តែក្រុមអ្នកជំនាញជឿជាក់ថា វាអាចឆ្លងពីសត្វទៅមនុស្សនៅផ្សារហួណានមុនពេលរាលដាលរវាងមនុស្ស។
ដោយសារតែហេតុនេះហើយ ប្រទេសចិនបានហាមឃាត់ការធ្វើពាណិជ្ជកម្មសត្វព្រៃជាបណ្តោះអាសន្ននៅក្នុងខែមករា រហូតដល់ការរីករាលដាលទូទាំងប្រទេសត្រូវបានគ្រប់គ្រង។ កាលពីដើមខែនេះ អាជ្ញាធរបានរឹបអូសយកសាកសពសត្វកករាប់រយ ពីកន្លែងស្តុកទឹកមួយនៅភាគអាគ្នេយ៍នៃទីក្រុង Pingguo៕
ចែករំលែកព័តមាននេះ