រាជធានីភ្នំពេញ ៖ សម្តេចតេជោនាយករដ្ឋមន្ត្រី ហ៊ុន សែន បញ្ជាក់ថា កម្ពុជាពិតជាទទួលបានយុត្តិធម៌ពិត មិនដូចការលើកឡើងរបស់មនុស្សមួយចំនួនពាក់ព័ន្ធនឹងអ្នកជិះលើនាវា Westerdam នោះទេ ។ សម្តេចតេជោ បានសរសេរលើបណ្តាញសង្គមនៅថ្ងៃទី២២ ខែកុម្ភៈ យ៉ាងដូច្នេះថា ៖ «ការមិនទទួលខុសត្រូវរបស់ជនបរទេសខ្លះលើការពិនិត្យសុខភាពរបស់ភ្ញៀវទេសចរដែលជិះលើនាវាWesterdam បានធ្វើឱ្យកម្ពុជាក្លាយជាជនរងគ្រោះនៃទង្វើមនុស្សធម៌របស់ខ្លួន អស់រយៈពេលជិតមួយសប្តាហ៍ ។ទេវតាពិតជាមានភ្នែក ពេលនេះអ្វីៗច្បាស់លាស់ហើយដែលកម្ពុជាទទួលបានយុត្តិធម៌មកវិញ» ។
សម្តេចតេជោបានអះអាងថា មិនមានមនុស្សណាម្នាក់ដែលជិះលើនាវាខ្នាតយក្សWesterdam ឆ្លង Covid.19 នោះទេ ។ សម្រាប់ខ្ញុំកំពុងវាយកូនគោលនៅ City golf នៅភ្នំពេញមិនមែនស្ថិតក្នុងមន្ទីរ ពេទ្យនៅ Singapore ដូចពួកបិសាចឃោសនានោះដែរ ។ តាមរយៈការ Comment នៅលើហ្វេសប៊ុក នាយប់ថ្ងៃទី២១ ខែកុម្ភៈ ឆ្នាំ២០២០ សម្តេចតេជោ ហ៊ុន សែន បានលើកឡើងថា បើសម្តេចជានាយករដ្ឋមន្ត្រីម៉ាឡេស៊ីវិញ ពេលនេះសម្តេចនឹងដករដ្ឋមន្ត្រីក្រសួងសុខាភិបាលចោលតែម្តង ដោយសារតែភាពខ្ជីខ្ជា ខ្វះការរទទួលខុសត្រូវធ្វើឲ្យប៉ះពាល់ដល់ជាតិសាសន៍៤១ប្រទេស ។
ការលើកឡើងរបស់សម្តេចតេជោ ហ៊ុន សែន គឺបន្ទាប់ពីក្រសួងសុខាភិបាលម៉ាឡេស៊ីបានប្រកាសលទ្ធផលថ្មីមួយទៀត ចំពោះការពិនិត្យសុខភាពស្ត្រីចំណាស់ជនជាតិអាមេរិកដែលធ្វើដំណើរតាមនាវ Wester dam ចូលចតនៅកម្ពុជា ហើយហោះទៅកាន់ប្រទេសម៉ាឡេស៊ីនោះឡើងវិញឃើញថា «អវិជ្ជ មាន» ពោលគឺមិនមានមេរោគកូរ៉ូណាថ្មី (COVID-19)ឡើយ ។ លទ្ធផលនេះ ខុសពីលទ្ធផលពិនិត្យកាលពី៥ថ្ងៃ
មុន ដែលខ្លួនបានរកឃើញថា ស្ត្រីខាងលើមានមេរោគកូរ៉ូណាថ្មី បណ្តាលឱ្យអ្នកដំណើរជាច្រើនត្រូវខកខានដំណើរវិលត្រឡប់ទៅប្រទេសរបស់ខ្លួនវិញ។
សម្តេចតេជោ ហ៊ុន សែន បានចូលទៅ Comment នៅលើហ្វេសបុ៊ករបស់នារីម្នាក់ឈ្មោះ«Khek Khemrath» ដោយសរសេរថា៖« ហេតុតែពូស្រែកម្តងហើយម្តងទៀត ក៏ព្រោះតែចង់ឱ្យភាពយុត្តិធម៌សម្រាប់កម្ពុជាយើងផង សម្រាប់មនុស្សជាង២.០០០នាក់នៅលើនាវាផង ពិសេស យុត្តិធម៌សម្រាប់ស្ត្រីជនជាតិអាមេរិក ដែលគេចាត់ទុកថាឆ្លងជំងឺ Covid.19 ។ ទម្រាំបានយុត្តិធម៌ វិបត្តិមនុស្សធម៌បានកើត ឡើងអស់មួយសប្តាហ៍ ។ បើពូជានាយករដ្ឋមន្ត្រីម៉ាឡេស៊ីវិញពូនឹងដករដ្ឋមន្ត្រីសុខាភិបាលចោលដោយ សារការធ្វើការខ្ជីខ្ជា ខ្វះការទទួលខុសត្រូវ ដែលធ្វើឲ្យប៉ះពាល់ដល់ជាតិសាសន៍៤១ប្រទេស ។ ប្រទេសយើងក្រ តែយើងមានការទទួលខុសត្រូវលើកិច្ចការមនុស្សធម៌នេះ» ។
សូមបញ្ជាក់ថា ស្ត្រីជនជាតិអាមេរិកជាអ្នកដំណើរតាមនាវា Westerdam ដែលក្រសួងសុខាភិបាលម៉ាឡេស៊ី ពិនិត្យឃើញមានករណីកូរ៉ូណាថ្មី(Covid-19) ពេលចាកចេញពីនាវាហោះចេញពីកម្ពុជាទៅកាន់ប្រទេសម៉ាឡេស៊ី កាលពីថ្ងៃទី១៥ ខែកុម្ភៈនោះ ពេលនេះត្រូវបានលោកជំទាវឧបនាយករដ្ឋមន្ត្រីម៉ាឡេស៊ី Wan Azizah Wan Ismail ប្រកាសថា ពេលនេះស្ត្រីនោះពុំមានផ្ទុកមេរោគ Covid-19 ទេ ។
កាលពីពេលកន្លងទៅ ក្រសួងសុខាភិបាលកម្ពុជា បានប្រតិកម្មយ៉ាងខ្លាំងចំពោះការប្រកាសរបស់ក្រសួង សុខាភិបាលម៉ាឡេស៊ី ដែលថាខ្លួនរកឃើញករណីជំងឺកូរ៉ូណាថ្មី នៅលើស្ត្រីជនជាតិអាមេរិកនេះ ហើយថែមទាំងទាមទារឱ្យម៉ាឡេស៊ី ពិនិត្យឱ្យបានច្បាស់លាស់ឡើងវិញ ដោយ សារតែកម្ពុជាបានសហការជាមួយអង្គការសុខភាពពិភពលោក(WHO) ពិនិត្យសុខភាពអ្នកដំណើរទាំងអស់នៅលើនាវា Westerdam មុននឹងអនុញ្ញាតឱ្យចុះចេញពីនាវា ហើយហោះចេញពីកម្ពុជា ឃើញថាមិនមាននរណាម្នាក់មានមេរោគកូរ៉ូណាថ្មីនោះទេ ។
រដ្ឋមន្ត្រីក្រសួងសុខាភិបាលលោក ម៉ម ប៊ុនហេង បានថ្លែងអំណរគុណមជ្ឈមណ្ឌលប្រយុទ្ធនឹងជំងឺឆ្លងនៃសហរដ្ឋអាមេរិក(US-CDC) ដែលបានបញ្ជាក់ការពិតថា «ស្ត្រីជនជាតិអាមេរិក វ័យ ៨៣ឆ្នាំ មិនមានផ្ទុកមេរោគ Covid-19 ទេ» ។ លោករដ្ឋមន្ត្រីមានប្រសាសន៍ទៀតថា ការផ្តល់នូវព័ត៌មាននេះកាន់តែផ្តល់នូវភ័ស្តុតាងថ្មីថែមទៀត ដែលសបញ្ជាក់ថា ការៀបចំចាត់ចែង គ្រប់គ្រងទទួលត្រួតពិនិត្យអ្នកដំណើរនៃនាវា Westerdam បានប្រព្រឹត្តទៅស្របតាមស្តង់ដារអន្តរជាតិត្រឹមត្រូវ ។
លោករដ្ឋមន្ត្រីក៏បញ្ជាក់ផងដែរថា ការធ្វើតេស្តរកមេរោគ Covid-19 ទាំងអស់ នៅកម្ពុជា បានធ្វើឡើងនៅវិទ្យាស្ថានប៉ាស្ទ័កម្ពុជា ដែលជាសមាជិកមួយក្នុងបណ្តាញវិទ្យាស្ថានប៉ាស្ទរ័ពិភពលោក ដែលមាន៣២វិទ្យាស្ថាន និងមានវត្តមានក្នុង២៥ប្រទេសជុំវិញពិភពលោក ។ អ្នកនាំពាក្យមជ្ឈមណ្ឌលប្រយុទ្ធប្រឆាំង នឹងជំងឺឆ្លងរបស់សហ រដ្ឋអា មេរិក(US-CDC) លោក Richard Quartarone) បានបញ្ជាក់ច្បាស់លាស់ថា អ្នកដំណើរទាំងអស់នៃកប៉ាល់ទេសចរណ៍ Westerdam គឺត្រូវបានគេធ្វើតេស្តយ៉ាងល្អិតល្អន់រកមេរោគ Covid-19 ហើយលទ្ធផលពិតជាបានបង្ហាញថា «អវិជ្ជមាន» ដោយក្នុងនោះរួមមានទាំងស្ត្រីអាមេរិកវ័យ៨៣ឆ្នាំម្នាក់ផងដែរ ។
នេះបើតាមការដកស្រង់ការផ្សាយរបស់សារព័ត៌មានអាមេរិក US Today កាលពីថ្ងៃសៅរ៍ ទី២២ ខែកុម្ភៈ ឆ្នាំ២០២០ ។ លោក Richard Quartarone លើកឡើងយ៉ាងដូច្នេះថា «ខ្ញុំបានបញ្ជាក់រួចទៅហើយថា អ្នកដំណើរទាំងអស់ត្រូវបានធ្វើតេស្ត ហើយពួកគេគ្មានផ្ទុកវីរុសកូរ៉ូណា (Covid-19) នោះឡើយ រួមទាំងមនុស្សម្នាក់គឺស្ត្រីជនជាតិអាមេរិកវ័យ៨៣ឆ្នាំ ដែលត្រូវបានធ្វើតេស្តរកឃើញវិជ្ជមាន នៅម៉ាឡេស៊ីនោះផងដែរ ។ ស្ត្រីជនជាតិអាមេរិកនៅម៉ាឡេស៊ីនោះ ប្រហែលអាចមានជំងឺផ្លូវដង្ហើម ប្រសិនបើវាជាការពិតនោះ, វាមិនមែនជាមេរោគ Covid-19 នោះទេ» ៕
ចែករំលែកព័តមាននេះ