ខេត្តសៀមរាប ៖ សហព័ន្ធកីឡាទូកកានូ និងរ៉ូអ៊ីងកម្ពុជា និងរដ្ឋបាលខេត្តសៀមរាប សហការរៀបចំការប្រកួតកីឡាទូកប្រពៃណីខ្នាតអន្តរជាតិ(ទូកនាគ) ជ្រើសរើសជើងឯកប្រចាំភូមិភាគបឹងទន្លេសាប ដណ្តើមពានរង្វាន់សម្តេចក្រឡាហោម ស ខេង លើកទី២ ឆ្នាំ២០២០ នៅបឹងឈូក នៃស្រុកបន្ទាយស្រី ខេត្តសៀមរាបដោយមានប្រតិភូ គ្រូបង្វឹក កីឡាករ កីឡាការិនី សរុបចំនួន៨០នាក់មកពីសមាគមទូកប្រពៃណីខ្នាតអន្តរជាតិចំនួន៤ខេត្ត (សៀមរាប បន្ទាយមានជ័យ កំពង់ឆ្នាំង និងពោធិសាត់)ចូលរួមផងដែរ។
ចូលរួមជាគណៈអធិបតីក្នុងឱកាសនោះមានលោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម អនុប្រធានទី១សហព័ន្ធកីឡាទូកកានូ និងរ៉ូអ៊ីងកម្ពុជា តំណាងខ្ពង់ខ្ពស់សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានសហព័ន្ធកីឡាទូកកានូ និងរ៉ូអុីងកម្ពុជា និងលោក ទៀ សីហា អភិ អភិបាលខេត្តសៀមរាប។
បើតាមរបាយការណ៍របស់គណៈកម្មការរៀបចំការប្រកួត ឲ្យដឹងថា ការប្រកួតអនុវត្តតាមរូបមន្តជម្រុះ ក្នុងនោះរួមមានវិញ្ញាសាប្រកួតទូកប្រពៃណីខ្នាតអន្តរជាតិ(ទូកនាគ)ចម្ងាយ១ ពាន់ម៉ែត្រ និង៥រយម៉ែត្រផ្នែកបុរស ។ នៅក្នុងកម្មវិធីនោះក៏មានការប្រកួតដកស្រង់បច្ចេកទេសលើវិញ្ញាសាទូកកានូ-កាយ៉ាក់ចម្ងាយ៥រយម៉ែត្រ និងប្រភេទទូករ៉ូអ៊ីងចម្ងាយ៥រយម៉ែត្រផងដែរ ។
នៅក្នុងការប្រកួតនេះ សមាគមកីឡាទូកប្រពៃណី ខ្នាតអន្តរជាតិខេត្តសៀមរាប ទទួលបានជ័យលាភី លេខ១ទាំងវិញ្ញាសា១ពាន់ម៉ែត្រ និង៥រយម៉ែត្រ ខេត្តបន្ទាយមានជ័យជាប់ចំណាត់ថ្នាក់លេខ២ និងខេត្តកំពង់ឆ្នាំងជាប់ចំណាត់ថ្នាក់លេខ៣ ។
ក្នុងឱកាសនោះដែរ លោករដ្ឋមន្ត្រី ប៉ាន សូរស័ក្តិ មានប្រសាសន៍ថា បច្ចុប្បន្ននេះ ប្រភេទកីឡាទូកប្រពៃណីខ្នាតអន្តរជាតិ«ទូកនាគ» ទូកកានូ និងទូករ៉ូអ៊ីងនៅកម្ពុជា កំពុងទទួលបានការចាប់អារម្មណ៍ និងគាំទ្របណ្តើរៗពីមហាជន ចាប់តាំងពីសហព័ន្ធបានកែទម្រង់រចនាសម្ព័ន្ធគ្រប់គ្រងរបស់ខ្លួន ។ លោកផ្តល់អនុសាសន៍ថា ដើម្បីឱ្យប្រភេទកីឡាទូកកានូ-កាយ៉ាក់ ទូករ៉ូអ៊ីង និងទូកប្រពៃណីខ្នាតអន្តរជាតិកាន់តែមានវឌ្ឍនភាពទាំងបរិមាណ និងគុណភាព ឆ្ពោះទៅព្រឹត្តិការណ៍ស៊ីហ្គេមលើកទី៣២ឆ្នាំ២០២៣ ចាំបាច់ត្រូវខិតខំបណ្តុះបណ្តាល និងបង្កើនបរិមាណកីឡាករ-កីឡាការិនីបន្ថែមទៀត ។
សមាគមកីឡាទូករាជធានី-ខេត្ត និងក្រសួងពាក់ព័ន្ធ ចាំបាច់ណាស់ត្រូវមានទូកផ្ទាល់ខ្លួន ដើម្បីងាយស្រួលក្នុងការហ្វឹកហាត់ជាមួយនឹងការខិតខំស្វែងរកដៃគូសហការ និងក្រុមហ៊ុនឧបត្ថម្ភបន្ថែមទៀត ដើម្បីបង្កើតព្រឹត្តិការណ៍ប្រកួតឱ្យបានកាន់តែច្រើនក្នុងមួយឆ្នាំៗតាមដែលអាចធ្វើបាន ។
ការប្រកួតកីឡាទូកប្រពៃណីខ្នាតអន្តរជាតិជ្រើសរើសជើងឯកភូមិភាគ ពានរង្វាន់សម្តេចក្រឡាហោម ស ខេង លើកទី២ ឆ្នាំ២០២០ បែងចែកជា៥ភូមិភាគ រួមមានភូមិភាគរាជធានីភ្នំពេញ ភូមិភាគវាលរាប ភូមិភាគនិរតី ភូមិភាគបឹងទន្លេសាប និងភូមិភាគឦសាន ។
មុនការរៀបចំនៅភូមិភាគបឹងទន្លេសាប សហ ព័ន្ធកីឡាទូកកានូ និងរ៉ូអ៊ីងកម្ពុជា បានរៀបចំរួចហើយនៅភូមិភាគវាលរាប និងភូមិភាគនិរតី ៕ (កែសម្រួលដោយ ៖ បុប្ផា)
ចែករំលែកព័តមាននេះ