ខេត្តបាត់ដំបង ៖ ធ្លាប់មានប្រវត្តិជាប់គុកស្ទើររាប់ភ្លេច ដោយសារប្រព្រឹត្តអំពើចោរកម្ម ហើយចុងក្រោយនេះ ទើបចេញពីគុកបានប្រហែលជាងកន្លះខែប៉ុណ្ណោះ ឥឡូវអតីតទណ្ឌិត វឿន វិត អាយុ២៧ឆ្នាំ…
ខេត្តបាត់ដំបង ៖ ធ្លាប់មានប្រវត្តិជាប់គុកស្ទើររាប់ភ្លេច ដោយសារប្រព្រឹត្តអំពើចោរកម្ម ហើយចុងក្រោយនេះ ទើបចេញពីគុកបានប្រហែលជាងកន្លះខែប៉ុណ្ណោះ ឥឡូវអតីតទណ្ឌិត វឿន វិត អាយុ២៧ឆ្នាំ រូបនេះ ត្រូវបានកម្លាំងសមត្ថកិច្ចចាប់ខ្លួនបញ្ជូនចូលគុកសារជាថ្មី ក្រោយពីជនសកម្មរូបនេះ ធ្វើសកម្មភាពចូលចាក់ស្ត្រីម្នាក់ដល់ក្នុងបន្ទប់យ៉ាងសាហាវ រួចប្លន់យកកាបូបលុយរត់គេចខ្លួន ដែលបង្កឱ្យមានការភ្ញាក់ផ្អើលទាំងព្រលឹម នៅចំកណ្ដាលក្រុងបាត់ដំបង។ ទាំងព្រឹក! ជិះកង់កញ្ចាស់១ រួចលូនតាមទ្វារសម្រុកទៅចាក់ស្ត្រីម្នាក់ក្នុងបន្ទប់ (វីដេអូ)
លោកឆាង វណ្ណឆៃ អធិការក្រុងបាត់ដំបងបាននិយាយថា អតីតទណ្ឌិតឈ្មោះរឿន វិុត អាយុ២៧ឆ្នាំ ស្នាក់នៅសំណង់បណ្តោះអាសន្ន (ជិតក្លិបជ័យជំនះ) ស្ថិតក្នុងភូមិកម្មករ សង្កាត់ស្វាយប៉ោ ក្រុងបាត់ដំបង ។ ជននេះ ត្រូវបានកម្លាំងជំនាញរបស់លោកតាមចាប់ខ្លួនបាន បន្ទាប់ពីជននេះ ធ្វើសកម្មភាពប្លន់ស្ត្រីម្នាក់បានសម្រេចរួចរត់គេចខ្លួនបានប្រហែលជាង៩ម៉ោង។ លោកអធិការបានបញ្ជាក់ថា ជននេះទើបចេញពីគុកកាលពីពេលថ្មីៗកន្លងទៅនេះ តែមិនរាងចាលទេ ហើយបានប្រព្រឹត្តបទល្មើសឧក្រិដ្ឋបន្ថែមទៀត ឥឡូវត្រូវបានចាប់ខ្លួនជាថ្មី ក្នុងបទល្មើសប្លន់។
សូមបញ្ជាក់ថា អតីតទណ្ឌិតជាប់គុកស្ទើររាប់ភ្លេចឈ្មោះវឿន វិត នេះ ត្រូវកម្លាំងសមត្ថកិច្ចចាប់ខ្លួនជាថ្មីនេះ ដោយសារតែជននេះ ជាប់សង្ស័យក្នុងអំពើប្លន់ដ៏សាហាវមួយ កាលពីវេលាម៉ោង៦និង១៥នាទីព្រឹកថ្ងៃទី២៣ កុម្ភ: នៅចំណុចភូមិអូរតាគាំ១ សង្កាត់ទូលតាឯក ក្រុងបាត់ដំបង ។ ជននេះ បានជិះកង់កញ្ចាស់ទៅឈប់ក្បែរផ្ទះជនរងគ្រោះ រួចលូនចូលតាមទ្វារមុខចូលទៅចាក់ម្ចាស់ផ្ទះឈ្មោះ យ៉ាន់ គឹមយឿត ស្រីអាយុ៥៦ឆ្នាំ ដែលកំពុងដេកក្នុងបន្ទប់ម្នាក់ឯងបណ្ដាលឱ្យរងរបួសជាទម្ងន់។
ជននេះ បានដណ្ដើមយកបានកាបូបចំនួន២ តែពេលរត់ចេញក្រៅផ្ទះ ជននេះបានទម្លាក់ចោលកាបូប១ ប៉ុន្តែគេមិនដឹងថា មានសម្ភារ:អ្វីខ្លះនៅក្នុងកាបូបនោះទេ។ សមត្ថកិច្ចបានកំណត់មុខសញ្ញាប្លន់នេះភ្លាមៗ ដោយសារសកម្មភាពជននេះជាប់នៅក្នុងកាមេរ៉ាសុវត្ថិភាព និង កង់កញ្ចាស់មួយរបស់ជននេះ ដែលរត់ចោល។ ជាមួយនឹងការចាប់ខ្លួននេះ អតីតទណ្ឌិត វឿន វិត បានសារភាពថា ខ្លួនពិតជាបានចូលប្លន់ស្ត្រីរងគ្រោះខាងលើនេះមែន។ ខ្លួនបានបានប្រើប្រាសកូនកាំបិតចាក់ទៅលើស្ត្រីរងគ្រោះ នៅពេលប្រតាយប្រតប់គ្នានៅក្នុងបន្ទប់។
ជននេះបាននិយាយអំពីមូលហេតុដែលខ្លួនសម្រេចចិត្តចូលប្លន់ និងប្រើកាំបិតចាក់ស្ត្រីរងគ្រោះយ៉ាងដូច្នេះថា«ពេលចូលដល់ក្នុងបន្ទប់ ខ្ញុំឃើញគាត់កំពុងដេកលក់ តែពេលខ្ញុំដើរជាន់សម្ភារ ធ្វើឱ្យគាត់ភ្ញាក់ហើយស្រែក ។ ដំបូងខ្ញុំ មិនចង់ចាក់គាត់ទេ ហើយខ្ញុំប្រាប់គាត់កុំឱ្យស្រែក តែគាត់មិនស្ដាប់ ហើយថែមទាំងស្ទុះមកប្រតាយប្រតប់ជាមួយខ្ញុំ ទើបខ្ញុំដកកាំបិតចាក់គាត់តែម្ដងទៅ ។ ពេលនេះ ខ្ញុំដណ្ដើមបានកាបូបរត់ចេញក្រៅ និងរត់ចោលកង់មកសំងំលាក់ខ្លួននៅមាត់ស្ទឹងខាងក្រោយផ្ទះ លុះប៉ុន្មានម៉ោងក្រោយក៏ត្រូវសមត្ថកិច្ចតាមមកចាប់ខ្ញុំដល់ផ្ទះតែម្ដង» ។
លោកឆាង វណ្ណឆៃ អធិការក្រុងបាត់ដំបងបានប្រាប់ថា រហូតដល់ពេលនេះ យើងមិនទាន់សុំការបំភ្លឺពីជនរងគ្រោះបាននៅឡើយទេ អំពីទ្រព្យសម្បត្តិដែលបាត់បង់ ព្រោះស្ត្រីរងគ្រោះកំពុងស្ថិតក្នុងស្ថានភាពធ្ងន់ធ្ងរនៅឡើយ ។ ប៉ុន្តែជាបឋម ក្រោយពេលចាប់ខ្លួនជនដៃដល់ មន្ត្រីជំនាញដកហូតបានវត្ថុតាង រួមមាន កង់មួយគ្រឿង និងកូនកាំបិចិតបន្តែចំនួន០២, កាបូបចំនួន០២ ដែលជារបស់ជនរងគ្រោះ និងសម្ភារពាក់ព័ន្ធមួយចំនួនទៀត ។ ពេលនេះ មន្ត្រីជំនាញកំពុងសួរនាំជនសង្ស័យរូបនេះ ដើម្បីកសាងណុំរឿងបញ្ជូនទៅកាន់សាលាដំបូងខេត្តហើយ៕
ចែករំលែកព័តមាននេះ