រាជធានីភ្នំពេញ ៖ បុរសម្នាក់សង្ស័យស្រវឹងជិះម៉ូតូមួយគ្រឿងដោយមិនពាក់មួកសុវត្ថិភាពបានព្យាយាមបើកគេចពីកម្លាំងគណៈបញ្ជាការណ៍ឯកភាពខណ្ឌទួលគោកដែលកំពុងដាក់គោលដៅត្រួតពិនិត្យអាវុធជាតិផ្ទុះនិងពង្រឹងច្បាប់ចរាចរណ៍ផ្លូវគោក រួចក៏ជ្រុលចង្កូតទៅបុកកម្លាំងប្រជាការពារភូមិម្នាក់បណ្តាលឲ្យសន្លប់ស្ដូកស្ដឹង និងបង្កឲ្យមានការភ្ញាក់ផ្អើលកាលពីវេលាម៉ោង១០និង៤០នាទីយប់ថ្ងៃទី២៣ ខែកុម្ភៈ ឆ្នាំ២០២០ ត្រង់ចំណុចខាងមុខទីស្ដីការក្រសួងសុខាភិបាល តាមបណ្ដោយផ្លូវ២៨៩ ស្ថិតក្នុងសង្កាត់បឹងកក់ទី២ ខណ្ឌទួលគោក។
ជនរងគ្រោះឈ្មោះ ឡុង ឃូច ភេទប្រុស អាយុ៥៨ឆ្នាំ ជាអនុភូមិទី៩ សង្កាត់បឹងកក់ទី២ ខណ្ឌទួលគោក ។ ចំណែកបុរសជាជនបង្កមិនស្គាល់អត្តសញ្ញាណនោះទេ ជាអ្នកបើកបរម៉ូតូមួយគ្រឿងម៉ាកហុងដាស្គូពី ពណ៌ប្រផេះ ពាក់ស្លាកលេខ ភ្នំពេញ ១HA-៤៦៩២ ។
តាមប្រភពព័ត៌មានពីកម្លាំងគណៈបញ្ជាការណ៍ឯកភាពខណ្ឌទួលគោកបានរៀបរាប់ប្រាប់ឲ្យដឹងថា មុនពេលកើតហេតុ កម្លាំងគណៈបញ្ជាការឯកភាពខណ្ឌបានដឹកនាំកម្លាំងចម្រុះចុះមកដាក់គោលដៅត្រួតពិនិត្យអាវុធជាតិផ្ទុះ និងរឹតបន្តឹងច្បាប់ចរាចរណ៍ផ្លូវគោកនៅត្រង់ចំណុចកើតហេតុខាងលើ ។
តាមប្រភពដដែលបានបន្តថា លុះមកដល់វេលាកើតហេតុ ក៏ស្រាប់តែមានបុរសម្នាក់ជិះម៉ូតូម៉ាកហុងដាស្គូពី មិនមានពាក់មួកសុវត្ថិភាព ធ្វើដំណើរតាមបណ្តោយផ្លូវ២៨៩ ក្នុងទិសដៅពីជើងទៅត្បូង និងក្នុងល្បឿនលឿនចូលមកក្នុងគោលដៅត្រួតពិនិត្យខាងលើ។ ពេលនោះដោយសារអ្នកបើកបរម៉ូតូបង្កមិនមានពាក់មួកសុវត្ថិភាពអោយបានត្រឹមត្រូវ ទើបកម្លាំងគណៈបញ្ជាការឯកភាពខណ្ឌហៅឲ្យឈប់ ដើម្បីធ្វើការឆែកឆេរនិងផាកពិន័យតាមច្បាប់។
តាមប្រភពដដែលបានបន្តទៀតថា ដោយសារអ្នកបើកបរម៉ូតូបង្កដឹងខ្លួនខុស ក៏បានបន្ថែមល្បឿនយ៉ាងលឿនព្យាយាមបើកគេចចេញពីគោលដៅត្រួតពិនិត្យខាងលើ រួចក៏ជ្រុលចង្កូតទៅបុកបុរសម្នាក់ជាប្រជាការពារភូមិ ដែលកំពុងឈប់ធ្វើប្រតិបត្តិការក្នុងគោលដៅត្រួតពិនិត្យចរាចរណ៍ បណ្ដាលឲ្យដួលបោកទៅនឹងថ្នល់សន្លប់ស្ដូកស្ដឹង ហើយត្រូវរថយន្តសង្គ្រោះបន្ទាន់របស់គ្លីនិកឯកជនមកដឹកយកទៅសង្គ្រោះភ្លាមៗ។ ចំណែកឯម៉ូតូបង្កបានដួលអូសជិត១០ម៉ែត្ររងការខូចខាតបន្តិចបន្តួច រីឯអ្នកបើកបរម៉ូតូបានរងរបួសរយះចិញ្ចើមខាងស្តាំនិងត្រូវបានកម្លាំងសមត្ថកិច្ចធ្វើការឃាត់បានភ្លាមៗតែម្តង។
បន្ទាប់ពីកម្លាំងសមត្ថកិច្ចចរាចរណ៍ផ្លូវគោកខណ្ឌទួលគោក បានធ្វើការសួរនាំនិងត្រួតពិនិត្យវាស់ជាតិអាកុលទៅលើអ្នកបើកបរម៉ូតូបង្ករួចមក ជាលទ្ធផលឃើញថាជនបង្កមានផ្ទុកជាតិអាកុលចំនួន០,៨៦ក្នុង១មីលីលីត្រខ្យល់។
ក្រោយពេលកើតហេតុ ម៉ូតូនិងអ្នកបើកបរត្រូវបានសមត្ថកិច្ចខណ្ឌទួលគោកធ្វើការបញ្ជូនទៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញដើម្បីរង់ចាំធ្វើការដោះស្រាយនិងចាត់ការទៅតាមនីតិវិធីជាបន្តទៀត៕ (កែសម្រួលដោយ ៖ ធីតា)
ចែករំលែកព័តមាននេះ