រាជធានីភ្នំពេញ ៖ អ្នកសិល្បៈមិនល្បីឈ្មោះ២នាក់ បានជួបរឿងកម្សត់ពេញបន្ទុកតែម្តង ក្រោយពេលបុរសជាប្តីរងគ្រោះថ្នាក់ចរាចរណ៍កាលពី១ឆ្នាំមុន ដោយប្តីរងរបួសផុងលលាដ៍រហូតត្រូវដកលលាដ៍ក្បាលទៅចិញ្ចឹមទុកនៅប្រទេសវៀតណាម។ ក្រោមការចំណាយអស់ច្រើនពីខ្លួនពេកធ្វើឱ្ កម្រិតជីវភាពគ្រួសារមួយនេះ កាន់តែជួបរឿងកម្សត់ៗជាច្រើន ដែលត្រូវលះបង់ ។ មហាជនដែលបានដឹងរឿងប្រាកដជាទប់អារម្មណ៍មិនបានអួលដើម.កមិនខាន។
កាលពីរសៀលថ្ងៃទី២១ ខែកុម្ភៈ ឆ្នាំ២០២០ នៅទីតាំងសមាគមសិល្បៈ ខាងក្រោយវិទ្យាល័យ ឥន្ទ្រៈទេវី បានរៀបចំពិធីប្រគល់ថវិកាមួយចំនួន និងរទេះរុញ១គ្រឿងជូនដល់អ្នកសិល្បៈលំបាក។ សម្រាប់អ្នកមកទទួលយកជំនួយ សំដៅទៅលើភាពលំបាកខ្លាំងបំផុត ដែលមិនអាចនៅឯកាចោលឆ្ងាយបាន។ ក្នុងនោះថវិកាច្រើនពាន់ដុល្លារ ប្រគល់ជូនទៅគ្រួសារ លោក កែវ ធិន ដែលរងគ្រោះថ្នាក់ចរាចរណ៍ផុងលលាដ៍ និងត្រូវការដើមទុនព្យាបាលបន្ត ហើយមួយផ្នែកទៀតជួយដល់លោកសួស សងវាចារ ដែលធ្លាក់ខ្លួនឈឺ និងនៅតែប្រឈមភាពខ្វះខាត។
យោងតាមសំដីរៀបរាប់របស់អ្នកនាង កែវ ហម ភរិយាលោកកែវ ធិន បានលើកឡើងថា ប្តីរបស់អ្នកនាង ជួបគ្រោះថ្នាក់នៅម្តុំផ្លូវកប់ស្រូវ ដោយមិនដឹងថា ប៉ះនឹងអ្វីទេ ព្រោះដឹងខ្លួននៅពេទ្យ។ គាត់ធ្វើដំណើរទៅយកប្រពន្ធចេញពីច្រៀង ក៏រងភាពអកុសលបែបនេះ។
ក្រោយជួបបញ្ហាមក ខ្ទង់ចំណាយការព្យាបាល គឺច្រើនទៅៗ រលេះអស់ពីខ្លួន ដីម្តាយបង្កើត ដីម្តាយក្មេក គឺលក់មកមើលគាត់។ ចំពោះខ្លួនជាប្រពន្ធអាណិតប្តី ពេលដឹងខ្លួនចេះតែនិយាយថា ចង់រស់ ចង់បានលលាដ៍មកវិញ ខ្លួនស្តាប់ហើយយំក៏មាន។
អ្នកនាង កែវ ហម ដែលច្រៀងតាមហាងរាល់យំបានតែ៥ដុល្លារ បានលើកដៃសំពះនិយាយមួយៗថា ច្រៀងរាល់យប់ពេលខ្លះបានធីប ខ្លះក៏អត់ ។ មានពេលខ្លះនាងចេញពីច្រៀងជិះម៉ូតូមកវិញ រើសសម្បកកំប៉ុងទុកសន្សំ ហើយប្តីក៏ជួយរើស បូកទាំងកូនស្រីច្បងអាយុ២០ឆ្នាំជាអ្នករាំអមឆាក ក៏រើសអេតចាយជួយគ្នាអត់ខ្មាស់ទៀតទេ។
អ្នកនាងបន្តថា មានពេលខ្លះទៅផ្សារ ឃើញបន្លែណាចោលនៅល្អក៏រើសយកមកលាងទឹក ធ្វើម្ហូបហូប ដើម្បីកិបកេងសន្សំលុយមើលជំងឺប្តី។ បើទោះបីជានាងអាចរស់នៅបាន តែពេលនេះមិនចោលប្តីជាដាច់ខាត ។ ស៊ូលំបាកជាមួយគាត់ និងមើលទៅគាត់ពិតជាមិនអាចខ្វះនាងបានទៅណាទៅតាម រហូតគេថាដូចកូនពៅ។ ទាំងអ្នកនាងហម និងលោកធិន បានទទួលអំណោយថវិការ៥៥០០ ដុល្លារ និង៥០០ដុល្លារទៀតរបស់សមាគមសិល្បៈ។
អំណោយសាច់ប្រាក់៥៥០០ដុល្លារនេះ ត្រូវបានលោក ហេង ឡុង បញ្ជាក់ឱ្យដឹងថា កើតចេញពីក្រុមឧកញ៉ាប៉ោ សំអឿន, ឧកញ៉ាលឹម ប៊ុនណា, ឧកញ៉ាឡេង ហ៊ួរ និងប៉ាប៉ា សុខ វិជ័យ ហើយចែកចាយដល់សមាជិកជិត៤០០នាក់។ ជារួមសម្រាប់លោកកែវ ធិន និងភរិយា មិនត្រឹមតែបានថវិកាខាងលើត្រឹមហ្នឹងឡើយ ។ ពួកគាត់ថែមទាំងការចេញថ្លៃផ្ទះជួលបង់ជូន៦ខែ ដោយក្នុងមួយខែ៦៥ដុល្លារសម្រួលគាត់ពេលនេះ។
ក្រៅពីនេះ ទៅដល់វៀមណាមព្យាបាលដាក់លលាដ៍វិញ បើខ្វះខាត ឬចំណាយច្រើនបែបណា ជូនដំណឹងមកសមាគម និងបន្តជូនប្រាប់គ្រុបឧកញ៉ា ដែលពួកគាត់ចាំជួយជានិច្ច។ ដោយឡែកលោក សួស សងវាចារ ក៏ទទួលបានរទេះរុញមួយមានតម្លៃ៣៨០០ ដុល្លារ និងថវិកា១០០០ ដុល្លារពីគ្រុបដដែល ដោយមិនទុកគាត់ចោលឡើយ។ (កែសម្រួលដោយ ៖ បុប្ផា)
ចែករំលែកព័តមាននេះ