ខេត្តបាត់ដំបង ៖ បើតាមសេចក្តីរាយការណ៍បឋមបានឱ្យដឹងថា ជនសង្ស័យពីបទជូញដូរគ្រឿងញៀនម្នាក់ ត្រូវបានឃាត់ខ្លួន រីឯជនម្នាក់ទៀតដែលជាមេខ្លោងរត់គេចខ្លួនបាត់ នៅក្នុងកិច្ចប្រតិបត្តិការបង្ក្រាបកាលពីម៉ោងជាង៣រសៀល ថ្ងៃទី២០ ខែកុម្ភៈ ឆ្នាំ២០២០…
ខេត្តបាត់ដំបង ៖ បើតាមសេចក្តីរាយការណ៍បឋមបានឱ្យដឹងថា ជនសង្ស័យពីបទជូញដូរគ្រឿងញៀនម្នាក់ ត្រូវបានឃាត់ខ្លួន រីឯជនម្នាក់ទៀតដែលជាមេខ្លោងរត់គេចខ្លួនបាត់ នៅក្នុងកិច្ចប្រតិបត្តិការបង្ក្រាបកាលពីម៉ោងជាង៣រសៀល ថ្ងៃទី២០ ខែកុម្ភៈ ឆ្នាំ២០២០ នៅចំណុចភូមិគោកឃ្មុំ ឃុំគោកឃ្មុំ ស្រុកថ្មគោល។
នាយការិយាល័យប្រឆាំងគ្រឿងញៀន លោកសុខ និមល បានឲ្យដឹងថា ជនសង្ស័យម្នាក់ឃាត់ខ្លួនបានឈ្មោះ វង់ បេឡា អាយុ៣៧ឆ្នាំ រស់នៅចំណុចកើតហេតុខាងលើ។ ជននេះត្រូវកម្លាំងការិយាល័យរបស់លោកសហការជាមួយកម្លាំងជំនាញ នៃអធិការស្រុកថ្មគោល បង្ក្រាប និងរឹបអូសគ្រឿងញៀនបានមួយចំនួនផង ខណៈជននេះកំពុងប្រព្រឹត្តបទល្មើសជាក់ស្ដែង។
នៅក្នុងរបាយការណ៍លោកសុខ និមល បានបញ្ជាក់ថា នៅពេលឃាត់ខ្លួនជនសង្ស័យនេះ មន្ត្រីជំនាញដកហូតបានវត្តុតាងមានថ្នាំញៀនប្រភេទ ICE (ម៉ាទឹកកក) ចំនួន១កូនថង់ និង ថ្នាំញៀនប្រភេទ Wy (យ៉ាម៉ា) ចំនួន០៨គ្រាប់។
ក្រោយពីសាកសួរ ជនសង្ស័យរូបនេះបានសារភាពអំពីប្រភពដែលខ្លួនបានទិញគ្រឿងញៀនទាំងនោះពីមេខ្លោង ទើបលោកស្នងការខេត្ត និងលោកព្រះរាជអាជ្ញា បញ្ជាឲ្យកម្លាំងការិយាល័យជំនាញ និងកម្លាំងអធិការស្រុកថ្មគោល បង្ក្រាបមេខ្លោងនោះបន្តទៀត តែត្រូវបរាជ័យ ដោយសារតែមេខ្លោងជូញដូរគ្រឿងញៀនដ៏ធំនោះ បានរត់គេចខ្លួន មុនពេលត្រូវសមត្ថកិច្ចឡោមព័ទ្ធផ្ទះ។ ប៉ុន្តែមេខ្លោងនោះ បានបន្សល់ទុកគ្រឿងញៀនយ៉ាងសន្ធឹកសន្ធាប់ រួមទាំងវត្ថុតាងពាក់ព័ន្ធមួយចំនួនផង។
លោកសុខ និមល នាយការិយាល័យប្រឆាំងគ្រឿងញៀន បានឲ្យដឹងថា មេខ្លោងជូញដូរគ្រឿងញៀន ដែលកំពុងរត់គេចខ្លួននោះត្រូវគេស្គាល់អត្តសញ្ញាណហើយ។ ពិតមែនតែកម្លាំងជំនាញមិនបានចាប់ខ្លួនមេខ្លោងរូបនេះ តែយើងបានដកហូតវត្ថុតាងជាច្រើន។ ដូចជាថ្នាំញៀនប្រភេទ ICE (ម៉ាទឹកកក) ចំនួន១៧ថង់ ស្មើនឹងទម្ងន់២៧៧,៨៧ក្រាម, ថ្នាំញៀនប្រភេទ Wy (យ៉ាម៉ា) ចំនួន១៣៦គ្រាប់, ជញ្ជីងសម្រាប់ថ្លឹងថ្នាំញៀនចំនួន០១ និង វត្ថុតាងពាក់ព័ន្ធមួយចំនួនទៀត។
លោកសុខ និមល បានបញ្ជាក់ដែរថា ពេលនេះមន្ត្រីជំនាញ កំពុងសួរនាំជនសង្ស័យម្នាក់ដែលត្រូវឃាត់ខ្លួន ដើម្បីរៀបចំសំណុំរឿងបញ្ជូនទៅតុលាការ ខណៈមន្ត្រីជំនាញកំពុងធ្វើការស្រាវជ្រាវ និងតាមចាប់ខ្លួនមេខ្លោង៕ (កែសម្រួលដោយ ៖ បុប្ផា)
ចែករំលែកព័តមាននេះ