ខេត្តព្រះសីហនុ ៖ បុរសម្នាក់បានបាត់បង់ជីវិត និង២នាក់ផ្សេងទៀតរងរបួសធ្ងន់ បន្ទាប់ពីជនរងគ្រោះទាំង៣នាក់ជិះម៉ូតូមួយគ្រឿងទៅបុកទុយោទឹកដ៏ធំមួយដែលគេទុកនៅតាមបណ្តោយផ្លូវសម្រាប់តបណ្តាញទឹក ដែលហេតុការណ៍នេះបានកើតឡើងកាលពីវេលាទៀបភ្លឺថ្ងៃទី២២ ខែកុម្ភៈ ឆ្នាំ២០២០ ត្រង់ចំណុចស្ពានឆេះ អូរត្រេះ…
ខេត្តព្រះសីហនុ ៖ បុរសម្នាក់បានបាត់បង់ជីវិត និង២នាក់ផ្សេងទៀតរងរបួសធ្ងន់ បន្ទាប់ពីជនរងគ្រោះទាំង៣នាក់ជិះម៉ូតូមួយគ្រឿងទៅបុកទុយោទឹកដ៏ធំមួយដែលគេទុកនៅតាមបណ្តោយផ្លូវសម្រាប់តបណ្តាញទឹក ដែលហេតុការណ៍នេះបានកើតឡើងកាលពីវេលាទៀបភ្លឺថ្ងៃទី២២ ខែកុម្ភៈ ឆ្នាំ២០២០ ត្រង់ចំណុចស្ពានឆេះ អូរត្រេះ តាមបណ្តោយផ្លូវ១៤៩C ស្ថិតក្នុងសង្កាត់លេខ៤ ក្រុងព្រះសីហនុ ។
តាមប្រភពពីនគរបាលបានឱ្យដឹងថា ជនរងគ្រោះទាំង៣នាក់ខាងលើនោះរួមមាន ឈ្មោះ ញឹល ម៉ៅ ភេទប្រុស អាយុ២០ឆ្នាំ ជាអ្នកបើកបរ មានទីលំនៅខេត្តកំពង់ធំ បានបាត់បង់ជីវិត ចំណែកអ្នករួមដំណើរចំនួន២នាក់ទៀតដែលរងរបួសធ្ងន់ ក្នុងនោះម្នាក់ឈ្មោះ លីន ភេទប្រុស អាយុ ៣០ឆ្នាំ មានទីលំនៅខេត្តសៀមរាប និងម្នាក់ទៀតឈ្មោះ លី ប៉ាសី ភេទប្រុស អាយុ២៧ឆ្នាំ មានទីលំនៅខេត្តត្បូងឃ្មុំ ។ ជនរងគ្រោះទាំង៣នាក់ជាកម្មករសំណង់នៅអូរត្រេះ ស្នាក់នៅក្នុងភូមិ៦ សង្កាត់លេខ៤ ក្រុងព្រះសីហនុ ។ ជនរងគ្រោះទាំង៣នាក់ជិះម៉ូតូមួយគ្រឿងម៉ាកហុងដាវ៉េវ ពណ៌ខ្មៅ គ្មានផ្លាកលេខ ។
ក្រោយពេលកើតហេតុ អ្នករងរបួសធ្ងន់ទាំងពីរត្រូវគេបានបញ្ជូនទៅសង្គ្រោះនៅមន្ទីរពេទ្យបង្អែកខេត្តព្រះសីហនុ ចំណែកបុរសម្នាក់ដែលបាត់បង់ជីវិតត្រូវបានសមត្ថកិច្ចប្រគល់ជូនក្រុមគ្រួសារដើម្បីយកទៅធ្វើបុណ្យតាមប្រពៃណី ៕ (កែសម្រួលដោយ ៖ ធីតា)
ចែករំលែកព័តមាននេះ