មហាសេដ្ឋី Jeff Bezos បង្ហាញថាធ្វើអាជីវកម្មត្រូវខ្វល់ពីបរិស្ថាន
នាយកប្រតិបត្តិរបស់ក្រុមហ៊ុន Amazon គឺលោកមហាសេដ្ឋី ជេហ្វ បេសូស (Jeff Bezos) ដែលជាបុរសដែលមានជាងគេលើលោកផងដែរ បានបង្កើតមូលនិធិមួយឈ្មោះថា Bezos…
នាយកប្រតិបត្តិរបស់ក្រុមហ៊ុន Amazon គឺលោកមហាសេដ្ឋី ជេហ្វ បេសូស (Jeff Bezos) ដែលជាបុរសដែលមានជាងគេលើលោកផងដែរ បានបង្កើតមូលនិធិមួយឈ្មោះថា Bezos Earth Fund កាលពីថ្ងៃច័ន្ទកន្លងមកដែលក្នុងនោះរួមមានមូលនិធិវិនិយោគប្រមាណ ១០ ប៊ីលានដុល្លារសម្រាប់ការផ្តួចផ្តើមផ្សេងៗដែលមានគោលដៅសង្គ្រោះដល់ពិភពលោក ។ វាជាជំហានគំរូមួយដែលអាជីវកម្មដទៃគួរតែរៀនសូត្រតាម ។
ក្រុមហ៊ុនដែលមិនទាន់មានគម្រោងការច្បាស់លាស់ទាក់ទិននឹងការចូលរួមក្នុងការរកដំណោះស្រាយសម្រាប់បញ្ហាបម្រែបម្រួលបរិយាកាសអាចនឹងចាញ់ដៃគូប្រកួតប្រជែងដទៃដែលបានចូលរួមរួចជាស្រេច ។
មុនពេលលោកបេសូសបង្កើតមូលនិធិខាងលើ បុគ្គលិករបស់ Amazon ជាច្រើនរូបបានរិះគន់ដល់ក្រុមហ៊ុន ខណៈដែលមានបុគ្គលិកមួយចំនួនទៀតថែមទាំងធ្វើកូដកម្មមិនទៅធ្វើការដើម្បីទាមទារឲ្យក្រុមហ៊ុនចូលរួមដល់ការរកដំណោះស្រាយនេះផងដែរ ។
ខណៈដែលបញ្ហាបម្រែបម្រួលបរិយាកាសកំពុងតែធ្ងន់ធ្ងរឡើងជារៀងរាល់ថ្ងៃ បុគ្គលិក និងអតិថិជនកាន់តែដាក់សម្ពាធលើក្រុមហ៊ុនឲ្យចូលរួមចំណែកក្នុងការធ្វើជាដំណោះស្រាយ ជាពិសេសក្រុមហ៊ុនដែលជំរុញដល់ការបំពុល ឬកង្វក់បរិយាកាសផ្សេងៗជាដើម ។ ជាក់ស្តែង វាមិនមែនជារឿងងាយស្រួលសម្រាប់វិស័យឯកជនទេ ព្រោះការផ្លាស់ប្តូរទៅប្រើបច្ចេកវិទ្យាដែលមិនប៉ះពាល់ដល់បរិស្ថានតម្រូវឲ្យក្រុមហ៊ុនចំណាយថវិកាជាច្រើន ប៉ុន្តែវាអាចជាយុទ្ធសាស្ត្រល្អមួយដែលកែប្រែរូបរាងរបស់ក្រុមហ៊ុនបាន ។
លោក បេសូស បាននិយាយលើ Instagram របស់លោកថា «បម្រែបម្រួលបរិយាកាស គឺជាការគម្រាមកំហែងធំជាងគេសម្រាប់ពិភពលោកយើង ។ ខ្ញុំចង់សហការជាមួយនឹងអ្នកដទៃក្នុងផ្នែកដំណោះស្រាយដែលមានស្រាប់ និងការរកដំណោះស្រាយថ្មីៗដើម្បីប្រឆាំងនឹងបញ្ហានេះលើពិភពលោករបស់ពួកយើង ។ ការផ្តួចផ្តើមខ្នាតពិភពលោកនេះនឹងផ្តល់មូលនិធិដល់អ្នកវិទ្យាសាស្ត្រ សកម្មជន អង្គការក្រៅរដ្ឋាភិបាល ដើម្បីចូលរួមក្នុងការអភិរក្ស និងការពារពិភពធម្មជាតិ» ។
ក្រៅពីការធ្វើអ្វីដែលត្រឹមត្រូវ និងល្អសម្រាប់ពិភពលោកហើយ ការដោះស្រាយបញ្ហានេះក៏អាចល្អសម្រាប់អាជីវកម្មរបស់លោកដែរ ។ ដោយហេតុដូចនេះទើបវាជាមេរៀនល្អដែលអាចដាស់តឿនម្ចាស់អាជីវករដទៃឲ្យចាប់ផ្តើមចូលរួមក្នុងយុទ្ធនាការនេះដែរ ៕ កែសម្រួលដោយ ៖ សុឃាក់
ចែករំលែកព័តមាននេះ