ខេត្តកណ្ដាល ៖ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបានដឹកនាំគណៈប្រតិភូក្រសួង និងក្រុមការងារបច្ចេកទេស ក្រោមឱវាទចុះពិនិត្យវឌ្ឍនភាពនៃការសាងសង់អាងហែលទឹកកោះធំជិះកង់ត្រួតពិនិត្យគុណភាពផ្លូវជាតិលេខ២១ និងជួបសំណេះសំណាលសាកសួរសុខទុក្ខបងប្អូនប្រជាពលរដ្ឋចំនួន១២ភូមិ ស្ថិតក្នុងឃុំព្រែកស្តី ស្រុកកោះធំ ខេត្តកណ្ដាល នាព្រឹកថ្ងៃទី២២ ខែកុម្ភៈនេះ ។ នេះបើយោងតាមផេកក្រសួងសាធារណការ និងដឹកជញ្ជូន ។
លោកទេសរដ្ឋមន្ត្រីបានអញ្ជើញចុះពិនិត្យមើលវឌ្ឍនភាពនៃការសាងសង់អាងហែលទឹកកោះធំ ដែលរហូតមកដល់ពេលនេះ ការសាងសង់សម្រេចបាន៩៥ភាគរយហើយ នៅសល់តែការងារមួយចំនួនដូចជា ការលាបថ្នាំ និងជម្រះស្មៅ និងបានជំរុញឲ្យក្រុមហ៊ុនសាងសង់ពន្លឿនការងារដែលនៅសេសសល់ ឲ្យបានចប់សព្វគ្រប់ ដើម្បីត្រៀមរៀបចំសម្ពោធដាក់ឲ្យប្រើប្រាស់ជាផ្លូវការ នៅខែមីនា ឆ្នាំ២០២០ ដោយគ្រោងរៀបចំឱ្យមានការប្រកួតលើវិញ្ញាសាកីឡាហែលទឹកចម្ងាយ១០០ម៉ែត្រ និងកីឡាបាល់ទឹកផងដែរ ។
សូមជម្រាបជូនថា ៖ អាងហែលទឹកកោះធំមានទទឹង២២ម៉ែត្រ បណ្តោយ៤២ម៉ែត្រ ឋិតនៅក្នុងបរិវេណ កីឡដ្ឋានស្រុកកោះធំ ក្នុងភូមិព្រែកថ្មី ឃុំព្រែកថ្មី ស្រុកកោះធំ ខេត្តកណ្តាល គ្រោងចំណាយថវិកាអស់សរុបប្រមាណ៣០ម៉ឺនដុល្លារសហរដ្ឋអាមេរិក សម្រាប់សិស្សានុសិស្សក៏ដូចជា កីឡាករហែលទឹកអាចហ្វឹកហាត់កីឡា ដើម្បីសុខភាព និងត្រៀមចូលរួមប្រកួតកីឡាស៊ីហ្គេមដែលកម្ពុជាគ្រោងធ្វើជាម្ចាស់ផ្ទះនៅ ឆ្នាំ២០២៣ខាងមុខ ៕
ចែករំលែកព័តមាននេះ