រាជធានីភ្នំពេញ ៖ សេចក្តីរាយការណ៍បឋមបានឲ្យដឹងថា លោកវរៈសេនីយ៍ព្រំ បូរ ត្រូវបានគេចោទប្រកាន់ថា អាជ្ញាធរខណ្ឌឬស្សីកែវចាប់វាយ បណ្តាលអោយរងរបួស និងដួលសន្លប់បញ្ជូនទៅកាន់មន្ទីរពេទ្យកាល់ម៉ែត ក្នុងរឿងទំនាស់ដីធ្លីដ៍រ៉ាំរ៉ៃ នៅតំបន់អភិបឌ្ឍន៍ឬស្សីកែវ ស្ថិតនៅតាមផ្លូវលេខ៥៩៨ ក្នុង ភូមិទទួលពពែ សង្កាត់ទួលសង្កែទី២ ខណ្ឌឬស្សីកែវ ។ ហេតុការណ៍ដួលសន្លប់នេះកាលពីវេលាម៉ោងប្រមាណ១១ព្រឹក ថ្ងៃទី២១ ខែកុម្ភៈនេះ បន្ទាប់ពីអាជ្ញាធរចាប់ខ្លួនលោកជាថ្មីម្តងទៀត បញ្ជូនទៅកាន់សាលាខណ្ឌឬស្សីកែវ ។
តាមព័ត៌មានអោយដឹងថា នៅព្រឹកថ្ងៃទី២១ ខែ កុម្ភៈនេះ អាជ្ញាធរខណ្ឌឬស្សីកែវក៏បានបន្តដាក់ពង្រាយកម្លាំងការពារគ្រឿងចក្របន្តឈួសឆាយ និងធ្វើរបងដីទំនាស់របស់លោកព្រំ បូរ ក្នុងចំណោម៨គ្រួសារ ដែលមានទំនាស់ដីធ្លីនៅតំបន់អភិវឌ្ឍន៍ឬស្សីកែវ ។ ខណៈនោះលោក ព្រំ បូរ បានចុះទៅហាមឃាត់ក៏មានទំនាស់ពាក្យដំដីគ្នា ហើយត្រូវបានកម្លាំងសណ្តាប់ធ្នាប់ទទួលបញ្ជាអោយចាប់ខ្លួនលោកវរៈសេនីយ៍ ព្រំ បូរ សែងយកដាក់ក្នុងរថយន្តរួមជាមួយកូនចៅម្នាក់ទៀតផងដែរ ។
តាមប្រជាពលរដ្ឋ ដែលជាក្រុមគ្រួសារអ្នកមានទំនាស់ដីធ្លីបានអោយដឹងថា កម្លាំងសណ្តាប់ធ្នាប់ខណ្ឌ ឬស្សីកែវបានចាប់ខ្លួនលោកព្រំ បូរ ខណៈពេលដែលលោកមិនមានកំហុសនោះទេ គឺគ្រាន់តែចុះទៅមើល ការវាសវែងធ្វើរបង ។ តាមក្រុមគ្រួសារបានអោយដឹងទៀតថា លោក ព្រំ បូរ ត្រូវបានកម្លាំងសណ្តាប់ធ្នាប់ខណ្ឌឬស្សីកែវចាប់វាយ បន្ទាប់ពីចាប់ខ្លួនចូលរថយន្តបញ្ជូនទៅសាលាខណ្ឌ ដោយដាក់ក្នុងបន្ទប់សាលប្រជុំ ។ ខណះនោះក៏បន្តវាយ និងទាក់ជើង បណ្តាលដួលផ្កាប់មុខទៅលើការ៉ូសន្លប់ដេកស្តូកស្តឹង ហើយ ត្រូវបានក្រុមគ្រួសារហៅរថយន្តបញ្ជូនទៅសង្គ្រោះនោះមន្ទីរពេទ្យកាលម៉ែត ។
លុះក្រោយមកបានបន្តបញ្ជូនទៅកាន់មន្ទីរពេទ្យខេមម៉ា ដោយពុំទាន់ដឹងខ្លួននៅឡើយនៅវេលារសៀលនេះម្សិលមិញនេះ ។ តាមក្រុមគ្រួសារបានអោយដឹងថា លោក ព្រំ បូរត្រូវបានសណ្តាប់ធ្នាប់វាយរងរបួសធ្ងន់ប៉ះពាល់ដល់ប្លោកនោម និងមានស្នាមជាំផងដែរ ។ ទោះបីជាយ៉ាងអាជ្ញាធរ បានអះអាងថា លោក ព្រំ បូរ ធ្វើពុត ។
លោកប្រាជ សីហា អភិបាលរងខណ្ឌឬស្សីកែវ ដែលដឹកកម្លាំងអនុវត្តន៍វិធានការរដ្ឋាបាលបានអោយកោះសន្តិភាពដឹងថា លោកព្រំ បូរ មិនត្រូវបានអាជ្ញាធរវាយដំនោះទេ បន្ទាប់ពីចាប់ខ្លួនជាច្រើនលើកមកហើយនោះ ។ ការដួលសន្លប់នោះ គឺលោកបានធ្វើជាសន្លប់តែប៉ុណ្ណោះ ។ គួរបញ្ជាក់ថា លោកវរៈសេនីយ៍យោធា ព្រំ បូរ ក្នុងចំណោមប្រជាពលរដ្ឋ៨គ្រួសារមានទំនាស់គ្នារ៉ាំងរ៉ៃនៅតំបន់អភិវឌ្ឍន៍ ឬស្សីកែវ ហើយត្រូវបានអាជ្ញាធរប្រើកម្លាំងជាទ្រង់ទ្រាយធំការពារគ្រឿងចក្រឈូសឆាយដីរបស់លោក កាលពីថ្ងៃទី២៦ ខែធ្នូ ឆ្នាំ២០១៩ បន្ទាប់រុះរើលោកដូចជា ប្រជាពលរដ្ឋ៧គ្រួសារទៀតក៏បានបន្តតវ៉ា ហើយ លោកត្រូវបានអាជ្ញាធរចាប់ខ្លួនជាច្រើនលើកមកហើយ ដោយអាជ្ញាធរចោទថា រារ៉ាំងកម្លាំងសមត្ថកិច្ចចុះអនុវត្តវិធានការណ៍រដ្ឋបាល ។
ទន្ទឹមនោះទីស្តីការគណៈរដ្ឋក៏បានចេញ ស ជ ណ ទៅរដ្ឋបាលរាជធានីភ្នំពេញអោយបន្តការដោះស្រាយ និងរាយការណ៍ជួនទៅសម្តេចតេជោនាយករដ្ឋមន្ត្រី តែរហូតមកដល់ពេលនេះពុំមានការជួបដោះស្រាយឡើយ ហើយអាជ្ញាធរក៏បានបន្តឈូសឆាយដីទំនាស់នោះ ៕
ចែករំលែកព័តមាននេះ