សហរដ្ឋអាមេរិក ៖ តាមរ៉យទ័រថាលោក ROGER STONE អតីតទីប្រឹក្សារបស់លោកដូណាល់ត្រាំ ត្រូវបានកាត់ទោសកាលពីថ្ងៃទី២០កុម្ភៈដាក់គុក៣ឆ្នាំនិង៤ខែ ពីបទភូតកុហកក្នុងឱកាសនៃការស៊ើបអង្កេតផ្លូវការ ស្ដីពីការសង្ស័យលើការជ្រៀតជ្រែករបស់រុស្ស៊ី ចូលក្នុងការបោះឆ្នោតប្រធានាធិបតីកាលពីឆ្នាំ២០១៦នៅសហរដ្ឋអាមេរិក។
ជាមិត្តនិងជាទីប្រឹក្សារបស់លោកត្រាំច្រើនទសវត្ស លោកROGER STONEអាយុ៦៧ឆ្នាំ កាលពីថ្ងៃទី១៥វិច្ឆិកា ជាប់ការចោទប្រកាន់៧ករណីប្រឆាំងរូបលោក ក្នុងនោះមានការចោទប្រកាន់ពីបទភូតកុហកសភា បន្ទុចបង្អាក់តុលាការនិងបំបិទមាត់សាក្សី។
លោកជាប់ការចោទប្រកាន់ជាពិសេស ពីបទភូតកុហកគណៈកម្មការស៊ើបការណ៍របស់សភា ពីរឿងដែលលោកផ្ដួចផ្ដើមគំនិត ទាក់ទងជាមួយវេបសាយWIKILEAKS ដែលផ្សព្វផ្សាយក្នុងពេលមានយុទ្ធនាការឃោសនាបោះឆ្នោតប្រធានាធិបតី បណ្ដាសារអេឡិចត្រូនិក ដែលវាយប្រហារបេក្ខជនគណបក្សប្រជាធិបតេយ្យ លោកស្រីហ៊ីលឡារីគ្លីនតុន។
ភ្នាក់ងារស៊ើបការណ៍អាមេរិកធ្លាប់សន្និដ្ឋានថា សារទាំងនេះមកពីការលួចព័ត៌មានវិទ្យាពីសំណាក់រុស្ស៊ី។
ទោសដែលប្រកាសនាថ្ងៃទី២០កុម្ភៈនោះពិតជាស្រាលជាងការទាមទារ ឲ្យកាត់ទោសលោកដាក់គុក៧ឆ្នាំនិង៩ខែ៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា)
ចែករំលែកព័តមាននេះ