ប្រទេសអ៊ុយក្រែន ៖ ពលរដ្ឋអ៊ុយក្រែនជាច្រើននាក់កាលពីថ្ងៃទី២០កុម្ភៈ បានលើកគ្នាធ្វើបាតុកម្មដើម្បីរាំងខ្ទប់ច្រកចូលមន្ទីរពេទ្យមួយ ដែលទទួលបណ្ដាមនុស្សដែលជម្លៀសពីចិន ដើម្បីដាក់ឲ្យនៅដាច់ពីគេនៅទីនោះ។
ពួកបាតុករបានប៉ះទង្គិចគ្នាជាមួយប៉ូលិសនៅភាគកណ្ដាលអ៊ុយក្រែនជាកន្លែងដែលមនុស្សប្រមាណ៧០នាក់ ជាជនជាតិអ៊ុយក្រែននិងបរទេស ត្រូវយកមកដាក់ឲ្យនៅដាច់ពីគេ ក្រោយជម្លៀសចេញពីចិនដែលមានការឆ្លងរាលដាលនៃវីរុស COVID-19។
ដោយខ្លាចការឆ្លងពួកបាតុករបានប្រមូលផ្ដុំគ្នានៅទីនោះតាំងពីពេលព្រឹក ហើយនាំគ្នារាំងខ្ទប់ផ្លូវទៅកាន់មន្ទីរពេទ្យ ដែលត្រូវទទួលមនុស្សនាំមកពីចិន។ ពួកគេបាននាំគ្នាដុតភ្លើង ហើយប៉ូលិសជាច្រើននាក់ បានរុញច្រាន ពួកគេចេញនាវេលាល្ងាច ដើម្បីបើកចរាចរណ៍ផ្លូវនោះវិញ។ ក្រោមកិច្ចការពាររបស់ប៉ូលិសបណ្ដារថយន្តបឺសដែលដឹកពួកអ្នកជម្លៀសមកពីចិន ទីបំផុតអាចបើកចូលក្នុងមន្ទីរពេទ្យ។
តាមបណ្ដាញសង្គមពលរដ្ឋអ៊ុយក្រែនជាច្រើនបានថ្កោលទោសពួកអ្នកតវ៉ាទាំងនេះ ហើយនិយាយថា ទង្វើបែបនេះជារឿងគូរឲ្យអាម៉ាស់មួយ៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា)
ចែករំលែកព័តមាននេះ