ខេត្តបន្ទាយមានជ័យ ៖ មន្ត្រីនគរបាលចរាចរណ៍ផ្លូវគោក នៅថ្ងៃទី២១ ខែកុម្ភៈ បានធ្វើការ ត្រួតពិនិត្យរថយន្តចំនួន២៥៣គ្រឿង ហើយរកឃើញរថយន្តល្មើសចំនួន១៧០គ្រឿងនៅទូទាំងខេត្ត។
មន្ត្រីនគរបាលចរាចរណ៍ផ្លូវគោកនៃអគ្គស្នង ការដ្ឋាននគរបាលជាតិបានឲ្យដឹងថា យោងតាម ការណែនាំរបស់សម្តេចក្រឡាហម ស ខេង ឧប នាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងការ
ដាក់វិធានការពីលោកនាយឧត្តមសេនីយ៍ នេត សា វឿន អគ្គស្នងការនគរបាលជាតិ មន្ត្រីនគរបាល ចរាចណ៍ផ្លូវគោកនៃអគ្គស្នងការដ្ឋាននគរបាល ជាតិ បានសហការជាមួយមន្ត្រីនគរបាលចរា ចរណ៍ខេត្ត កំពុងអនុវត្តច្បាប់ស្តីពីចរាចរណ៍ផ្លូវ គោក នៅក្នុងភូមិសាស្ត្រខេត្តបន្ទាយមានជ័យ ។
មន្ត្រីដដែលបន្តថា ការអនុវត្តច្បាប់ស្តីពីចរា ចរណ៍ផ្លូវគោក ស្តីពីការពិន័យអន្តរការណ៍ចំពោះអំពើល្មើសនឹងច្បាប់ស្តីពីចរាចរណ៍ផ្លូវគោក កំណត់ អំពីសមត្ថកិច្ច អំពីល្មើស និងចំនួនទឹកប្រាក់ដែលត្រូវពិន័យអន្តរការណ៍ចំពោះអំពើល្មើសនឹងច្បាប់ស្តីពីចរាចរណ៍ផ្លូវគោក ក្នុងគោលបំណងបង្ការ
ទប់ស្កាត់បទល្មើស និងគ្រោះថ្នាក់ចរាចរណ៍ផ្លូវ គោក រក្សាសណ្តាប់ធ្នាប់ចរាចរណ៍ផ្លូវគោក និងការពារអាយុជីវិតមនុស្ស សត្វ ទ្រព្យសម្បត្តិ និងបរិស្ថាន ។ ជាមួយនេះ លើកកម្ពស់ការយល់ដឹងអំពីច្បាប់ស្តីពីចរាចរណ៍ផ្លូវគោក ដើម្បីធ្វើឲ្យប្រសើរឡើងនូវសណ្តាប់ធ្នាប់និងសុវត្ថិភាពចរាចរណ៍ផ្លូវគោក និងវិសាលភាពអនុវត្តចំពោះអំពើល្មើសនឹងច្បាប់ស្តីពីចរាចរណ៍ផ្លូវគោក ដែលត្រូវពិន័យអន្តរការណ៍ ។
មន្ត្រីដដែលបញ្ជាក់ថា អំពើល្មើសនិងចំ នួនទឹកប្រាក់ត្រូវពិន័យអន្តរការណ៍ចំពោះអ្នក បើកបរទោចក្រយានយន្ត ឬទោចក្រយានយន្តសណ្តោងរ៉ឺម៉ក ឬត្រីចក្រយានយន្ត ចំនួនទឹក ប្រាក់១៥.០០០រៀល អ្នកបើកបរយានយាន្តធុនស្រាលចំនួន២៥.០០០រៀល អ្នកបើករថយានយន្តធុនធ្ងន់ចំនួន៥០.០០០រៀល។
ជាក់ស្តែង ការអនុវត្តច្បាប់ស្តីពីចរាចរណ៍ផ្លូវគោកក្នុងភូមិសាស្ត្រខេត្តបន្ទាយមានជ័យ គឺ ត្រួតពិនិត្យលើអ្នកបើកបររថយន្តមិនពាក់ខ្សែក្រវាត់ ពិនិត្យជាតិអាល់កុល ប្រើប្រាស់គ្រឿង
ញៀន បំពាក់ភ្លើងបំភ្លឺខុសបច្ចេកទេស ស៊ីផ្លេឮ សូរខ្លាំង បិទស្កុតខ្មៅនៅកញ្ចក់ និងបិតស្កុតលើស្តុបចង្គៀងរថយន្ត ។ ជាមួយនេះ បានបិទ ចំណាំងប្លាតនៅទ្រុងគោយន្តកន្ត្រៃជូនប្រជាកសិករ និងអ្នកជិះទោចក្រយានយន្តមិនពាក់មួកសុវត្ថិភាព ឬបំពាក់ភ្លើងខុសបច្ចេកទេស ត្រូវអនុវត្តតាមច្បាប់ ។
ជាលទ្ធផល បានត្រួតពិនិត្យរថយន្តសរុប ២៥៣គ្រឿង ក្នុងរថយន្តធំ៤៨គ្រឿងស្មើ១៩% រកឃើញរថយន្តល្មើស១៧០គ្រឿង ស្មើ២៥៩ករណី(រថយន្តធំ២០គ្រឿង ស្មើ៥៩ករណី ស្មើ២៣%) ។ ករណីល្មើសមានដូចជា កំហុសឯកសារចំនួន៥៦ករណី ស្មើ២២% កំហុសបច្ចេកទេស៤១ករណី ស្មើ២០% និងកំហុសសកម្មភាព១៦៣ករណី ស្មើ៦៣% ៕ (កែសម្រួលដោយ ៖ បុប្ផា)
ចែករំលែកព័តមាននេះ