ខេត្តកណ្តាល ៖ ស្ទើរតែរៀងរាល់ថ្ងៃនាម៉ោង៤ជិតភ្លឺ គេតែងតែឮសំឡេងគោយន្តកន្ត្រៃដែលផ្ទុកដោយចំបើងពេញបានបំពងសំឡេងប្រដាក់គ្នាតាមផ្លូវ ប្រៀបដូចជាក្បួនអ្វីមួយអ៊ីចឹង ។ ប៉ុន្តែតាមពិតនោះគឺគោយន្តដើរលក់ចំបើងសម្រាប់ដាំដំណាំ ឬទុកសម្រាប់ឲ្យគោស៊ីឯណោះទេ ដែលមើលពីក្រោយ ពីចំហៀងដូចជាសម្បើមណាស់ មានកំពស់ស្ទើរតែប៉ះខ្សែភ្លើង ។
ក្នុងវ័យប្រមាណជាង៤០ឆ្នាំ ដែលជាអ្នកដើរលក់ចំបើងតាមគោយន្តបានឲ្យដឹងថា គាត់បានដឹកលក់ស្ទើរពេញមួយឆ្នាំ ពោលគឺទាំងរដូវប្រាំងនិងរដូវវស្សា ដើម្បីយកប្រាក់ទៅផ្គត់ផ្គង់គ្រួសារប្រចាំថ្ងៃ។ លោកពូបានឲ្យដឹងថា លោកមានផ្ទះនៅខាងត្បូងផ្សារព្រៃល្វាខេត្តតាកែវ ហើយលោកបានដើរលក់ចំបើងមានចំងាយឆ្ងាយប្រមាណជាង១០០គីឡូម៉ែត្រ ឬតិចជាងនេះ ក៏មាន ។
លោកបានបន្តថា ចំបើងដែលលក់ ក្នុងមួយគោយន្តកន្ត្រៃយ៍នេះតម្លៃ៦ម៉ឺនរៀលឬអាចលើសពីនេះតិចតួច។ ប៉ុន្តែបើសម្រាប់រដូវវស្សាវិញចំបើងក្នុងមួយគោយន្តដឹងតែបានថ្លៃ ដោយសារគ្មានចំបើងលក់។
ខណៈដែលកំពុងឈប់សម្រាកនៅតាមចិញ្ចើមផ្លូវអ្នកលក់រូបនេះបានបញ្ជាក់ថា៖ «ខ្ញុំបានដើរលក់ចំបើងជាច្រើនគីឡូម៉ែត្រ ព្រោះថា ផ្ទះខ្ញុំនៅខាងត្បូងផ្សារព្រៃល្វា ។ ពេលខ្លះខ្ញុំលក់ដល់ក្បាលកោះ ចុងកោះបារ៉ែន ។ លោកពូបានឲ្យដឹងទៀតថា ការដើរលក់ចំបើងនេះមានលក្ខខណៈជាក្រុម ព្រោះថា ដើម្បីជួយគ្នានៅពេលមានគេទិញម្តងៗ។ ហើយអ្នកដែលទិញចំបើងភាគច្រើននោះ គឺយកក្រាលទៅដាំបន្លែ ហើយភាគតិចណាស់យកទុកឲ្យគោក្របីស៊ីនៅរដូវវស្សា។ លោកពូដដែលក៏បានឲ្យដឹងទៀតថា ពេលខ្លះម៉ូយអ្នកដាំបន្លែគេទូរស័ព្ទប្រាប់ឲ្យយកក៏មាន ហើយពេលខ្លះដើរលក់តាមភូមិរហូតអស់ ទើបត្រឡប់មកផ្ទះវិញ។
គាត់ថា ចំបើងដែលយកមកលក់នេះ គឺទិញពីគេដោយមួយគោយន្តក្នុងតម្លៃ៥ពាន់រៀល។ លោកក៏បានឲ្យដឹងថា ក្នុងមួយថ្ងៃលោកអាចលក់បានចំបើង២ទៅ៣ជើងទៅតាមផ្លូវឆ្ងាយនិងជិត ដោយមួយជើងឬមួយគោយន្តលក់បានក្នុងតម្លៃ៦ម៉ឺនរៀល (រដូវប្រាំង) ។ តាមរយៈការដើរលក់ចំបើងនេះត្រូវបានអះអាងថា អាចជួយដោះស្រាយជីវភាពក្នុងគ្រួសារបានមួយចំនួនផងដែរ ព្រោះថាបើគ្មានការងារធ្វើនោះនឹងពិបាកជាមិនខានក្នុងការផ្តត់ផ្គង់ជីវភាពគ្រួសារ ។
ចំពោះរដូវវស្សាវិញលោកពូបានឲ្យដឹងថា អ្នកភូមិក៏ដូចជាអ្នកដែលលក់ចំបើងទាំងអស់គ្នាបានដើរទិញចំបើងពីចំការគេប្រមូលមកគរជាស្នឹមដោយប្រក់ទុកឲ្យស្រួលកុំឲ្យភ្លៀងត្រូវរលួយ។ដោយមួយឆ្នាំៗក្នុងរដូវវស្សា លោកពូបានប្រមូលចំបើងប្រមាណ៧០គោយន្តឬ១០០គោយន្តដើម្បីទុកត្រៀមសម្រាប់លក់នៅរដូវវស្សា ព្រោះម៉ូយខ្លះគេដាំដំណាំនៅរដូវវស្សា។ លោកពូថា នៅរដូវវស្សាចំបើងមានតម្លៃជាងរដូវប្រាំង ដោយក្នុងមួយគោយន្តមានតម្លៃរហូតដល់១៥ម៉ឺនរៀល ឬលើសពីនេះតិចតួច តាមកន្លែងឆ្ងាយឬជិត។ បើតាមលោកពូដដែលបានឲ្យដឹងថា ក្នុងមួយឆ្នាំលោកពូអាចលក់ចំបើងបានប្រមាណពី១០០០ដុល្លារទៅ២០០០ដុល្លារ ដែលគ្រាន់សម្រាប់ដោះស្រាយជីវភាពប្រចាំថ្ងៃមិនអាចធ្វើមានបានទេ ។
ចំណែកលោកពូម្នាក់ដែលប្រកបរបរលក់ចំបើងដែរបានលើកឡើងស្រដៀងគ្នាដែរថាលោកពូបានដើរលក់ចំបើងជាមួយគ្នា ដោយធ្វើការសហការគ្នា ពេលខ្លះជួយដឹកប្រវាស់ដៃគ្នាទុកសម្រាប់លក់រដូវវស្សា ហើយដើរលក់តាមគោយន្តជាមួយគ្នាផងដែរ ។ លោកបន្តថា ចំបើងដែលយកមកដើរលក់នេះគឺទិញម្ចាស់ស្រែគេដែលច្រូតស្រូវរួច ដោយពេលខ្លះម៉ៅស្រែ និងពេលខ្លះគិតជាគោយន្តដោយមួយគោយន្តតម្លៃ៥ពាន់រៀល ។
សូមជម្រាបថា បើយើងធ្វើដំណើរប្រហែលម៉ោង៤ ឬម៉ោង៥ជិតភ្លឺតាមផ្លូវជាតិលេខ២១ នោះបានឃើញក្បួនគោយន្តដឹកចំបើងដើរលក់ជាមិនខាន ។ គោយន្តដឹកចំបើងនោះ ក៏មានបំពាក់ដោយផ្លាកសញ្ញាចំណាំងភ្លើង ឬដាក់អំពូលភ្លើងពីក្រោយផងដែរ ដើម្បីចៀសវាងមានគ្រោះថ្នាក់ចរាចរណ៍ដោយប្រការណាមួយ ពោលគឺខ្លាចអ្នកបើកបរពីក្រោយមើលមិនឃើញជាដើម ៕ (កែសម្រួលដោយ ៖ បុប្ផា)
ចែករំលែកព័តមាននេះ