ប្រទេសចិន ៖ ប្រទេសចិនកាលពីថ្ងៃទី២០ ខែកុម្ភៈ សម្ដែងក្ដីសាទរ ចំពោះការចុះថយគួរឲ្យភ្ញាក់ផ្អើលនៃចំនួន អ្នកឆ្លងវីរុស COVID-19 តែការព្រួយបារម្ភមានការកើនឡើងនៅជប៉ុនជាមួយការបាត់បង់ជីវិតអតីតអ្នកដំណើរលើនាវាកម្សាន្ត២នាក់ និងនៅកូរ៉េខាងត្បូងដែលមានអ្នកបាត់បង់ជីវិតម្នាក់…
ប្រទេសចិន ៖ ប្រទេសចិនកាលពីថ្ងៃទី២០ ខែកុម្ភៈ សម្ដែងក្ដីសាទរ ចំពោះការចុះថយគួរឲ្យភ្ញាក់ផ្អើលនៃចំនួន អ្នកឆ្លងវីរុស COVID-19 តែការព្រួយបារម្ភមានការកើនឡើងនៅជប៉ុនជាមួយការបាត់បង់ជីវិតអតីតអ្នកដំណើរលើនាវាកម្សាន្ត២នាក់ និងនៅកូរ៉េខាងត្បូងដែលមានអ្នកបាត់បង់ជីវិតម្នាក់ ជាមួយអ្នកឆ្លងកាន់តែកើនដល់១៥៦នាក់ជាមួយអ្នកឆ្លងថ្មី៥២នាក់ទៀត។
ទោះបីយ៉ាងណាគណៈកម្មាធិការសុខាភិបាលជាតិចិន រៀបរាប់នាថ្ងៃទី២១កុម្ភៈពីមនុស្សបាត់បង់ជីវិតថ្មី ១១៨នាក់ថែមទៀតនៅចិន រយៈពេល២៤ម៉ោងចុងក្រោយនេះ ភាគច្រើនក្នុងខេត្តហ៊ូប៉ី នាំឲ្យចំនួនអ្នកបាត់បង់ជីវិតសរុបនៅចិនដីគោក ឡើងដល់២.២៣៦នាក់។ ប៉ុន្ទែគណៈកម្មាធិការនោះប្រកាសជាពិសេស ពីការចុះថយនៃចំនួនអ្នកឆ្លងថ្មីប្រចាំថ្ងៃមកត្រឹម៨៨៩នាក់។ ក្នុងចំណោមអ្នកឆ្លងថ្មីមាន៤១១នាក់ក្នុងខេត្តហ៊ូប៉ី ក្នុងនោះ៣១៩នាក់នៅក្រុងវូហាន។ សរុបមនុស្សជាង៧៥.០០០នាក់បានឆ្លងវីរុសនេះនៅចិន ចាប់តាំងពីលេចចេញពីខែធ្នូមក។
ម្យ៉ាងវិញទៀតលើពិភពលោកក្រៅពីចិនដីគោក ការឆ្លងបណ្ដាលឲ្យមនុស្សបាត់បង់ជីវិត១១នាក់ ក្នុងនោះ៣នាក់នៅជប៉ុន ២នាក់នៅហុងកុង ម្នាក់នៅបារាំង ២នាក់នៅអ៊ីរ៉ង់ ម្នាក់នៅតៃវ៉ាន់ ម្នាក់នៅហ្វ៊ីលីពីននិងម្នាក់នៅកូរ៉េខាងត្បូង។
នៅកូរ៉េខាងត្បូងចំនួនអ្នកឆ្លងវីរុសកើនដល់ទ្វេដង រយៈពេល២៤ម៉ោងចុងក្រោយនេះគឹឡើងដល់១៥៦នាក់ ជាមួយអ្នកឆ្លងថ្មី៥២នាក់ ពិសេសក្នុងព្រះវិហារគ្រឹស្តមួយ ដែលមានអ្នកឆ្លងជាង៨០នាក់។ បុរសអាយុប្រមាណជា៦០ឆ្នាំម្នាក់បានបាត់បង់ជីវិតកាលពីថ្ងៃទី១៩កុម្ភៈ ក្នុងទីក្រុងCHEONGDO ចម្ងាយ៣២០គីឡូម៉ែត្រខាងត្បូងក្រុងសេអ៊ូល។
បុរសនោះស្ថិតក្នុងក្រុមអ្នកជំងឺ១៥នាក់និងបុគ្គលិកដែលឆ្លងក្នុងមន្ទីរពេទ្យមួយជាមួយគ្នា។ មិនឆ្ងាយពីទីនោះគឺនៅក្រុងDAEGU ជាទីក្រុងធំទី៤របស់ប្រទេស ជាមួយប្រជាជន២,៥លាននាក់ នារីអាយុ៦១ឆ្នាំម្នាក់កាន់គ្រឹស្តសាសនា មិនដឹងថាគាត់ឆ្លងវីរុស ត្រូវបានគេសង្ស័យថាបានចម្លងតែគាត់ម្នាក់ នូវវីរុសដល់មនុស្សជាង៨០នាក់ ពិសេសពេលគាត់ទៅចូលរួមសួត្រធម៌ក្នុងព្រះវិហារនេះ។ អភិបាលក្រុងនេះបានអំពាវនាវដល់ប្រជាជនឲ្យស្ថិតនៅក្នុងផ្ទះ។
នៅចិនអាជ្ញាធរវាយតម្លៃថា បណ្ដាវិធានការដែលប្រកាន់យក ដើម្បីកម្រិតការដើរហើរពិសេសការបង្ខាំងមនុស្សជាង៥០លាននាក់ ឲ្យនៅដាច់ពីគេក្នុងខេត្តហ៊ូប៉ី ចាប់ផ្ដើមទទួលបានផ្លែផ្កាហើយ។
រដ្ឋមន្ត្រីការបរទេសចិន លោកវ៉ាងយីសម្ដែងការសាទរថា វិធានការម៉ឺងម៉ាត់ទាំងឡាយ អាចទប់ការឆ្លងវីរុសក្នុងប្រទេសនិងក្នុងផ្នែកឯទៀតៗនៃពិភពលោក។ យោងតាមតួលេខផ្លូវការថាចំនួនអ្នកឆ្លងថ្មីនៅចិន បានចុះថយ៤ថ្ងៃជាប់ៗគ្នា។ ចំណែកអ្នកជំងឺជាង១៦.០០០នាក់ពេលនេះបានជាសះស្បើយ៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា)
ចែករំលែកព័តមាននេះ